އެމްޑީޕީ މުޒާހަރާއިން ހައްޔަރުކުރި 6 މީހަކު 15 ދުވަހަށް ބަންދުކޮށްފި

ރޭ އިދިކޮޅު އެމްޑީޕީން މާލޭގައި ބޭއްވި މުޒަހަރާގެ ތެރެއިން ހައްޔަރުކުރި 6 މީހަކު، 15 ދުވަހަށް ބަންދުކުރުމަށް ކްރިމިނަލް ކޯޓުން އަމުުރުކޮށްފިއެވެ.

އެމްޑީޕީން ރޭ ބޭއްވި އެއްވުމުގެ ތެރެއިން ޕީގެ ރައްޔިތުންގެ މަޖިލީހުގެ ކުރީގެ ދެ މެންބަރުންކަމުގައިވާ ކުޅުދުއްފުށީ އުތުރު ދާއިރާގެ ކުރީގެ މެންބަރު ޔާސިރު އަބްދުއްލަތީފް އަދި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ އާއި އެ ޕާޓީގެ ކ. މާފުށީ ކައުންސިލުގެ ރައީސް ހަސަން ސޮލާޙް ވެސް ހައްޔަރުކޮށްފައެވެ.

އެގޮތުން އެ ތިން ބޭފުޅުންނާއެކު އިތުރު ހަތަރު މީހެއްގެ ބަންދަށް 15 ދުވަސް ޖެހުމަށް މިއަދު ކޯޓުން ވަނީ ނިންމާފައެވެ.

އެމީހުންގެ އިތުރުން ވެސް އިތުރު އެކަކު ފުލުހުން ބަންދުކުރިއެވެ. އެހެން ނަމަވެސް އޭނާ ވަނީ މާލެއިން ބޭރަށް ނުދިއުން ފަދަ ޝަރުތުތަކާ އެކު ކޯޓުން ދޫކޮށްފައެވެ.

އެ ފަރާތްތައް ހައްޔަރުކުރުމާއެކު މިއަދު އެމްޑީޕީން ނެރުނު ބަޔާނެއްގައި ވަނީ ރޭގެ މުޒާހަރާގެ ތެރޭގައި ސުލްހަވެރި އާންމުންނާ ދެކޮޅަށް ބާރުގެ ބޭނުންކުރުން ހަރުކަށި އިބާރާތުން ކުށްވެރިކޮށްފައެވެ.

އެގޮތުން ރައީސް މުއިއްޒުގެ އިސްތިއުފާއަށް ގޮވާލައި އެތައް ހާސް ބަޔަކު މުޒާހަރާ ކުރިއިރު، ސުލްހަވެރިކަމާއެކު އެއްވެ އުޅުމުގެ ހައްގު ނިގުޅައިގަތުމަށް ފުލުހުން ހުރަސްއަޅައިފައިވާ ކަަމަށް އެޕާޓީން ބުންޏެވެ. އަދި މުޒާހަރާގެ ބައިވެރިންނާއި ނޫސްވެރިންނާ ދެކޮޅަށް ފުލުހުން ޕެޕާ ސްޕްރޭ އާއި ރަޔަޓް ޝީލްޑް ބޭނުންކުރުމުގެ ސަބަބުން މުޒާހަރާގެ ބައިވެރިންނަށް އަނިޔާވެފައިވާ ކަމަށް ވެސް އެ ބަޔާނުގައި އެމްޑީޕީން ބުންޏެވެ.

އަދި އެ ފަރާތްތަކަށް ޤާނޫނީ ވަކީލެއްގެ ހައްގު ނުދިނުމުގެ ކަންބޮޑުވުން ވެސް އެ ޕާޓީން އެ ބަޔާނުގައި ވަނީ ފާޅުކޮށްފައެވެ.