ޗައިނާއިން އެފްރިކާއަށް 51 ބިލިއަން ޑޮލަރުގެ އެހީއާއި 1 މިލިއަން ވަޒީފާގެ ފުރުޞަތު ހޯދައިދޭނެކަމަށް ވަޢުދުވެއްޖެ!

ޗައިނާއިން އެފްރިކާއަށް 51 ބިލިއަން ޑޮލަރުގެ އެހީއާއި 1 މިލިއަން ވަޒީފާގެ ފުރުޞަތު ހޯދައިދޭނެކަމަށް ވަޢުދުވެއްޖެއެވެ.

ބޭޖިންގގައި ބޭއްވުނު ޗައިނާ-އެފްރިކާ އެއްބާރުލުމުގެ ސަމިޓުގައި ޗައިނާގެ ރައީސް ޝީ ޖިންޕިންގ ވަނީ އެފްރިކާއަށް 51 ބިލިއަން ޑޮލަރުގެ އިތުރު އެހީ ދޭނެކަމަށާއި، މަދުވެގެން 1 މިލިއަން ވަޒީފާގެ ފުރުޞަތު ހޯދައިދޭނެކަމަށް ވަޢުދުވެފައެވެ.

ބުރާސްފަތި ދުވަހު ބޭއްވުނު މި ސަމިޓުގައި ރައީސް ޝީ ވިދާޅުވީ، އެފްރިކާގެ 30 އިންފްރާސްޓްރަކްޗަރ މަޝްރޫޢުތަކަށް އެހީތެރިކަން ފޯރުކޮށްދޭނެ ކަމަށެވެ. އަދި އެފްރިކާގެ ވިޔަފާރިތަކަށް ޗައިނާގެ މާކެޓަށް ވަނުމުގެ ފުރުޞަތު ފަހިކޮށްދޭނެ ކަމަށްވެސް ވިދާޅުވިއެވެ.

50 އަށްވުރެ ގިނަ އެފްރިކާ ޤައުމުތަކުގެ މަންދޫބުން ބައިވެރިވި މި ސަމިޓަކީ، ދުނިޔޭގެ ދެވަނައަށް އެންމެ ބޮޑު އިޤްތިޞާދާއި އެންމެ ބާރު ދުވެލީގައި ކުރިއަރަމުންދާ ބައްރާ ދެމެދު އޮންނަ ގުޅުން ކުރިއަށް އޮތް ތިން އަހަރަށް ކަނޑައަޅާ ބައްދަލުވުމެކެވެ.

"އަޅުގަނޑުމެން މިތިބީ އެފްރިކާގެ ބައްރުގެ މިނިވަން ވިޔަފާރި ސަރަޙައްދު ތަރައްޤީކުރުމަށް އެހީތެރިވުމަށް ތައްޔާރަށް. އަދި އެފްރިކާގެ ސަރަޙައްދުތަކުގެ މެދުގައި ކުރިއެރުން ގެނައުމަށްޓަކައި ލޮޖިސްޓިކްސް އަދި މާލީ އެއްބާރުލުން އިތުރަށް ފުޅާކުރުމަށް މިތިބީ ތައްޔާރަށް" ޝީ އިތުރަށް ވިދާޅުވިއެވެ.

ސަމިޓުގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޝީ ވިދާޅުވީ، ޗައިނާއިން އެފްރިކާގައި 30 ސާފު ހަކަތައިގެ މަޝްރޫޢު ފަށައި، އެފްރިކާގެ ނިއުކްލިއަރ ހަކަތައިގެ ލަނޑުދަނޑިތަކަށް އެހީތެރިވެދޭނެ ކަމަށެވެ. މިއީ އެފްރިކާގެ ސިނާޢީ ތަރައްޤީއަށް ހުރަސްއަޅަމުން އައި ކަރަންޓުގެ ދަތިކަން ޙައްލުކުރުމަށް އެހީތެރިވެދޭނެ ކަމެއް ކަމަށް ވެސް އޭނާ ވިދާޅުވިއެވެ.