ރާއްޖޭގެ މިނިވަންކަމަށް، ޒައްރެއްގެ މިންވަރުވެސް ބުރޫއަރާފަދަ ކަމެއް އިންޑިޔާ ދަތުރުގައިވެސް، ރައީސް ނުކުރައްވާ: ޣައްސާން
ލިޔުންތެރިޔާ
ޚަދީޖާ އަރުފާ
ރާއްޖޭގެ މިނިވަންކަމާއި، އިސްތިޤްލާލަށް، ޒައްރެއްގެ މިންވަރުވެސް ބުރޫއަރާފަދަ ކަމެއް އިންޑިޔާ ދަތުރުގައިވެސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނުކުރައްވާ ކަމަށް ޑިފެންސް މިނިސްޓަރ މުޙައްމަދު ޣައްސާން މައުމޫން ވިދާޅުވެއްޖެއެވެ.
ރައީސް މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅާ ގުޅޭ ގޮތުން މީޑިއާތަކަށް މައުލޫމާތު ދެއްވަމުން ޣައްސާން ވިދާޅުވީ، ރައީސް މުއިއްޒުގެ އެ ދަތުރުފުޅަކީ ވަރަށް ކާމިޔާބު އަދި ދިވެހިންނަށް ވަރަށް ފައިދާވާ ދަތުރުފުޅެއް ކަމަށެވެ.
ރާއްޖޭގެ މިނިވަންކަމާއި ސިޔާދަތާއި އިސްތިޤްލާލަށް، ޒައްރެއްގެ މިންވަރުވެސް ބުރޫ އަރާނެފަދަ އެއްވެސް ކަމެއް، މި ދަތުރުފުޅުގައިވެސް އެހެން ދަތުރުފުޅެއްގައިވެސް ކުރައްވާފައެއް ނެތް. އެއްވެސް އެއްބަސްވުމެއްގެ ދަށުން، ދިވެހިންގެ ފުރިހަމަ ސިޔާދަތީ ބާރު ގެއްލޭފަދަ، ނޫނީ ގެއްލުންވާފަދަ އެއްވެސްކަމެއް ރައީސުލްޖުމްހޫރިއްޔާ މުހައްމަދު މުއިއްޒުގެ ސަރުކާރަކުން ކޮށްފައެއް ނުވޭ.
ޣައްސާން މައުމޫން
މިއާއެކު ޣައްސާން ވިދާޅުވީ ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކުރާނީ މޯލްޑިވްސް ނެޝަނަލް ޑިފެންސް ފޯސްއިން ކަމަށާ އެކަން ކުރާނީ ދިވެހި ރައްޔިތުން ބޭނުންވާ ގޮތަށްކަށެވެ. އަދި ދިވެހި އަސްކަރިއްޔާގެ ގާބިލުކަން އިތުރުކުރުމުގެ މަސައްކަތް ރައީސް މުއިއްޒު ކުރައްވަމުން ގެންދަވާ ކަމަށެވެ.
އަދި އެއްބަސްވުންތަކުގައިވެސް އޮތީ، ދިވެހި ރާއްޖެއިން އެދޭ ޙާލަތްތަކެއްގައި، އެދޭ ގޮތަކަށް ދިވެހި އަސްކަރިއްޔާގެ ޤާބިލިއްޔަތު އިތުރު ކުރެވޭނެ ވާހަކަ. އެއްވެސް ހާލެއްގައި އަޅުގަނޑުމެންގެ ޒިންމާތައް އެހެން އެއްވެސް ގައުމަކާ ހަވާލު ކުރެވޭގޮތަށް ވާހަކަދެކެވިފައެއް ނޯންނާނެ
ޣައްސާން މައުމޫންް
ޣައްސާން އިތުރަށް ވިދާޅުވީ، މިވަގުތު ރާއްޖޭގައި ތިބީ އިންޑިއާގެ ސިވިލިއަނުން ކަމަށާއި އެމީހުން ވެސް ތިބޭނީ ދެ ގައުމުގެ ދެމެދުގައި ބަދަލުކުރެވިފައި ލެޓާ އޮފް އެކްޗޭންޖުގައިވާ މުއްދަތަށް ކަމަށެވެ.
އަދި އިންޑިއާއަކީ ރާއްޖެއާ ޒަމާނުއްސުރެ ގާތް ގުޅުމެއް ބާއްވައި ގައުމަކަށްވާތީ މިފަހަރު ފެނިގެން މިދިޔައީ ޑިޕްލޮމެޓިކް ރީތި އުސޫލުގެ ދަށުން އިންޑިއާ އާ ވާހަކަ ދައްކައިގެން ދިވެހިންނަށް އެންމެ ރަނގަޅު ގޮތް ހޯދައިދެއްވި މަންޒަރުކަމަށް ޣައްސާން ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
