ކުނި ނެގުން ރޭގަނޑު 10 އަށް ބަދަލުކޮށް، ދުވާލު ގަޑީ ބޮޑެތި އުޅަނދުތަކުގައި މުދާ އުފުލުން މަނާ ކުރަނީ
ލިޔުންތެރިޔާ
ޚަދީޖާ އަރުފާ
މާލެ ސަރަހައްދުގެ ޓްރެފިކް ތޮއްޖެހުމުގެ މައްސަލައަށް ހައްލެއް ކުރުމަށް ކުނި އުކާ ވަގުތު ރޭގަނޑު 10 އަށް ބަދަލުކޮށް، ބޮޑެތި އުޅަނދުފަހަރު ހަމައެކަނި ރޭގަނޑު ދުއްވާ ގޮތަށް ހަދަން ނިންމައިފިއެވެ.
ދަތުރުފަތުރާއި މަދަނީ ޚިދުމަތްތަކާއި ބެހޭ ވުޒާރާއިން ރޭ އިފްތިތާހުކުރި "މާލެފަހި" ޕްރޮގުރާމުގައި ހިމަނާފައިވާ ކަންކަމުގެ ތެރޭގައި، ވަކި ސައިޒަކަށްވުރެ ބޮޑެތި އުޅަނދު ބޭނުންކޮށްގެން މުދާ މާލޭގައި މުދާ އުފުލޭނީ ރޭގަނޑު 08:00 އިން ފަތިހު 05:00 އަށެވެ. މި މަސައްކަތް ކުރުމަށް ހަމަޖެހިފައިވަނީ އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ ބެލުމުގެ ދަށުންނެވެ.
ހަމަ އެހެންމެ، މާލޭގެ މަގުތައް ތޮއްޖެހުން ކުޑަކުރަން މާލޭގެ ގެތަކުން މިހާރު ކުނި ނަގަމުން އަންނަ ގަޑިތަކަށް ގެންނަންވެސް އެ ވުޒާރާއިން ވަނީ ނިންމާފައެވެ.
އެގޮތުން، މާލޭގެ ގެތަކުން ކުނި ނަގާނީ ރޭގަނޑު 10:00 ފެށިގެން ފަތިހު 5 ޖަހަން ދެން ކަމަށް ބުބެފައިވެއެވެ. މި މަސައްކަތް ކުރުމަށް ހަމަޖެހިފައިވަނީ މޫސުމީ ބަދަލުތަކާއި ތިމާވެއްޓާއި ޙަކަތައާއި ބެހޭ ވުޒާރާގެ ބެލުމުގެ ދަށުންނެވެ.
މާލެ އާއި ހުޅުމާލެ އަދި ވިލިމާލޭގެ ގެތަކުން ވެމްކޯ އިން މިހާރު ކުނި ނަގަނީ ރޭގަނޑު 7 އިން 10 ޖަހަންދެންނެވެ. ދުވާލުގެ އެކި ގަޑިތަކުގައި ވެސް ބައެއް ސަރަހައްދުތަކުން ކުނި ނަގަން ވެމްކޯގެ ބޮޑެތި އުޅަނދުތައް މިހާރު ދުއްވާކަން ފާހަގަކޮށްލަންޖެހެއެވެ.
ދަތުރުފަތިރާއި ބެހޭ ވުޒާރާއިން ބުނެފައިވާ ގޮތުން، މި ބަދަލަށް އަމަލުކުރަން ފަށާނީ އަންނަމަހުގެ ފުރަތަމަ ދުވަހުން ފެށިގެންނެވެ. އަދި މި ދެ ބަދަލުވެސް ކުރިއަށްއޮތް 6 މަސްތެރޭގައި އެއްކޮށް ތަންފީޒުކުރުމަށް ހަމަޖެހިފައިވާކަމަށް ސަރުކާރުން ހާމަކުރައްވައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
