ހުޅުމާލޭގެ ދެވަނަ ފިޔަވަހީގެ ސަބްސްޓޭޝަން ގްރޭޓާމާލެ އިންޓަކަނެކްޝަން ގްރިޑާއި ގުޅާލައިފި

ހުޅުމާލޭގެ ދެވަނަ ފިޔަވަހީގައި ގާއިމްކޮށްފައިވާ 132 ކޭ.ވީ. ގެ ހައިވޯލްޓޭޖް ސަބްސްޓޭޝަން ގްރޭޓާމާލެ އިންޓަކަނެކްޝަން ގްރިޑާއި ގުޅާލުމުގެ މަސައްކަތް ކާމިޔާބުކަމާއެކު ނިންމާލައިފިއެވެ.

މިކަން ހާމަކޮށް ސްޓެލްކޯއިން ބުނީ، މި މަސައްކަތް ކުރިއަށް ގެންދިއުމަށްޓަކައި މާލޭގެ 10 ސަރަހައްދަކުން ކަރަންޓުގެ ޚިދުމަތް މެދުކަނޑާލަންޖެހޭނެ ކަމަށް ކުރިން އަންދާޒާ ކުރެވުނު ނަމަވެސް، މޫސުން ތަންދިނުމާއެކު ކަރަންޓް ކަނޑާލަން ޖެހުނީ މާލޭގެ 2 ސަރަހައްދަކުން ކަމަށެވެ.

އަދި އެ ސަރަހައްދުންވެސް ކަރަންޓް ކަނޑާލަން ޖެހުނީ އެއްގަޑިއިރަށްވުރެވެސް މަދު ވަގުތުކޮޅަކަށް ކަމަށް ސްޓެލްކޯއިން ފާހަގަކޮށްފައިވެއެވެ.

ސްޓެލްކޯއިން ވަނީ އެ ކުންފުނީގެ ޚިދުމަތް އިތުރަށް ފުޅާކޮށް، ފުރިހަމަ ކުރުމަށްޓަކައި ކުރެވޭ މިފަދަ މަސައްކަތްތަކުގައި ކަސްޓަމަރުންގެ ފަރާތުން އަބަދުވެސް ލިބެމުން އަންނަ އެއްބާރުލުމަށް ޝުކުރު އަދާކޮށްފައެވެ.

މިކަމާ ގުޅިގެން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އެކްސް ގައި ކުރެއްވި ޕޯސްޓެއްގައި ވިދާޅުވެފައިވަނީ 132 ކޭ.ވީ. ސަބްސްޓޭޝަންގެ ނެޓްވޯކް ފުޅާކުރުމާއި ހަކަތަ ދިނުމުގެ މަސައްކަތް ވަރަށް މަދު ވަގުތުކޮޅަކަށް ކަރަންޓު މެދުކަނޑާލައިގެން ކާމިޔާބުކަމާއެކު ނިންމާލެވިފައިވާ ކަމަށެވެ.

އަދި މި ކާމިޔާބީ ހޯދުމުގައި ސްޓެލްކޯގެ އިންޖިނިއަރުންނާއި މުވައްޒަފުން ދެއްކި ހިތްވަރާއި ޕްރޮފެޝަނަލިޒަމަށް ތަޢުރީފުކުރައްވާ ކަމަށާއި، މި މަސައްކަތުގައި ރައްޔިތުން ދެއްވި ކެތްތެރިކަމާއި އެއްބާރުލުމަށް ޝުކުރު އަދާކުރައްވާ ކަމަށެވެ.

ހުސައިން ފަހުމީ އިތުރަށް ވިދާޅުވެފައިވަނީ މި ކާމިޔާބީ ހާސިލުކުރުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންތެރި ލީޑަރޝިޕާއި ދެއްވި އެއްބާރުލެއްވުމަށް އިޚްލާޞްތެރިކަމާއެކު ޝުކުރު ދަންނަވާ ކަމަށެވެ.