ސަމާލުވާތި! ހައްޖު ކޯޕަރޭޝަންގެ ނަމުގައި ތި ލިބެނީ ސްކޭމް މެސެޖެއް

މޯލްޑިވްސް ހައްޖު ކޯޕަރޭޝަންގެ ނަމުގައި ސްކޭމް މެސެޖުތަކެއް ފޮނުވަމުންދާތީ ސަމާލުވާން އެދިއްޖެ އެވެ.

އިއްޔެއާ ރޭ ވަރަށް ގިނަ ބަޔަކަށް ވަނީ މި މެސެޖު ލިބިފަ އެވެ. އެ ކޯޕަރޭޝަނުން ވެސް ވަނީ އެކަން ސަމާލު ކަމަށް ގެނެސް ޕޯސްޓެއް ކޮށްފަ އެވެ. ހައްޖު ކޯޕަރޭޝަނުން ބުނީ އޮޅުވާލައިގެން ފައިސާ ހޯދުމުގެ މަގްސަދުގައި މޯލްޑިވްސް ހައްޖު ކޯޕަރޭޝަންގެ ނަމުގައި އާންމު ރައްޔިތުންގެ ފޯނަށް މެސެޖުތަކެއް ފޮނުވަމުންދާ ކަމަށް އެ ކުންފުންޏަށް މައުލޫމާތު ލިބިފައިވާ ކަމަށެވެ.

އެ ކަމަށް ސަމާލުވާން އެދި ހައްޖު ކޯޕަރޭޝަނުން ބުނީ އެ ކުންފުނިން އެއްވެސް މީހަކަށް ލިންކު ފޮނުވައިގެން ފައިސާ ދައްކަން މެސެޖު ނުކުރާނެ ކަމަށެވެ. އަދި އެ ކޯޕަރޭޝަނުން އެއްވެސް މީހަކަށް ގުޅައި ނުވަތަ މެސެޖުކޮށް އެއްވެސް އަމިއްލަ މީހެއްގެ އެކައުންޓަށް ފައިސާ ޖަމާކުރަން ނާންގާނެ ކަމަށް ވެސް ބުންޏެވެ.

ހައްޖު ކޯޕަރޭޝަންގެ ހިދުމަތްތަކަށް ފައިސާ ޖަމާކުރަން އަންގާނީ އެ ކޯޕަރޭޝަންގެ ނަމުގައި ހެދިފައި ހުރި ރަސްމީ ބޭންކު އެކައުންޓްތަކަށް ކަމަށް ވަނީ ބުނެފަ އެވެ.

އެހެން ކަމުން އޮޅުވާލައިގެން މިފަދަ ގޮތްގޮތަށް ފައިސާ ހޯދަން ކުރާ މެސެޖުތަކާއި ފޮނުވާ ލިންކުތަކަށް ސަމާލުވެ އެފަދަ ލިންކުތަކަށް ނުފިތުމަށް ވަނީ އެދިފަ އެވެ. އަދި އެފަދަ މެސެޖެއް އަދި ކޯލެއް ލިބިއްޖެނަމަ ކަމާބެހޭ އިދާރާތަކަށް ރިޕޯޓް ކުރުމަށް އެދޭ ކަމަށް ބުންޏެވެ.

ސްކޭމްގެ މައްސަލަތައް ރާއްޖޭގައި ވަނީ ވަރަށް ބޮޑުވެފަ އެވެ. މިދިޔަ ހަފްތާގައި ވެސް ސްކޭމް މައްސަލަތަކުގެ ސަބަބުން 270,270 ރުފިޔާ ގެއްލިފައިވާ ކަމަށް ތަފާސް ހިސާބުތަކުން ދައްކަ އެވެ.