ޗައިނާގެ މައިނެއްގައި ހިނގި ގޮވުމުގެ ހާދިސާއާ ގުޅިގެން ރައީސް ޑރ.މުއިއްޒު ތައުޒިޔާ ފޮނުއްވައިފި

ޗައިނާގެ ޝަންޒީ ޕްރޮވިންސްގެ ލިއުޝެންޔޫ ކޯލް މައިންގައި ހިނގި ނުރައްކާތެރި ގޮވުމުގެ ހާދިސާއާ ގުޅިގެން، ޗައިނާގެ ރައީސް ޝީ ޖިންޕިންގްއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، ގިނަ ބައެއްގެ ފުރާނަ ގެއްލި، އެތައް ބަޔަކަށް އަނިޔާވި މި ހާދިސާގެ ޚަބަރު އެއްސެވީ ފުން ހިތާމަޔާއެކު ކަމަށް ވިދާޅުވިއެވެ.

ރައީސް ޑރ.މުއިއްޒުގެ ތައުޒިޔާ މެސެޖްގައި ވަނީ ދިވެހި ސަރުކާރާއި ރައްޔިތުންގެ ނަމުގައި، މި ހާދިސާގައި ފުރާނަ ގެއްލުނު ފަރާތްތަކުގެ އާއިލާތަކަށާއި، ޗައިނާގެ ސަރުކާރަށާއި ރައްޔިތުންނަށް އިޚްލާޞްތެރި ތައުޒިޔާ ރައްދުކުރައްވާފައެވެ.

މީގެ އިތުރުން، ދިވެހިރާއްޖެ އޮތީ ޗައިނާއާއެކު ސާބިތުކަމާއެކު ކަން ފާހަގަކުރައްވައި، މި ހާދިސާގެ އަސަރު ކުރި ފަރާތްތަކަށް ކެތްތެރިކަމާއި ހިތްވަރު ދެއްވުމަށް އެދިވަޑައިގަންނަވާކަމަށް ވަނީ ވިދާޅުވެފައެވެ. އަދި މީހުން ސަލާމަތްކުރުމުގެ މަސައްކަތްތަކަށް ކާމިޔާބީއަށް އެދިވަޑައިގަންނަވާކަމަށްވެސް ރައީސުލްޖުމްހޫރިއްޔާގެ މެސެޖުގައި ވިދާޅުވިއެވެ.

މި ހާދިސާގައި 80 އަށްވުރެ ގިނަ މީހުންގެ ފުރާނަ ގެއްލުނުއިރު، 130 ހަށްވުރެ ގިނަ މީހުން ވަނީ ޒަހަމްވެފައެވެ. ހާދިސާ ހިނގިއިރު 247 މީހަކު މައިނު ގޮވި ސަރަހައްދުގައި މަސައްކަތު އުޅުނުކަމަށް ޗައިނާގެ މީޑިއާތަކުން ބުނެއެވެ.