މި ސަރުކާރުން އަޅާ އާ ފްލެޓްތަކަށް ކުރީ ސަރުކާރުގެ ލިސްޓަށް ނުބަލާނަން: ޑރ. މުއްޠަލިބް

މި ސަރުކާރުގެ ބޯހިޔާވަހިކަމުގެ ދަށުން އަޅާ ސޯޝަލް ހައުސިން ޔުނިޓްތަކުން  ފުލެޓް ދޫކުރާއިރު ނިމިދިޔަ ސަރުކާރުން އާންމުކުރި ލިސްޓަށް ނުބަލާނެ ކަމަށް ގެދޮރުވެރިކަމާ ބެހޭ ވަޒީރު ޑރ. އަބްދުالله މުއްޠަލިބް މިއަދު ވިދާޅުވެއްޖެ އެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ކުރީ ސަރުކާރުން އާއްމު ކުރި ފުލެޓް ލިސްޓާ ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން ވަޒީރު ވިދާޅުވީ، އެ ލިސްޓް އާއްމު ކޮށްފައި ވަނީ ރިޔާސީ އިންތިޚާބުގެ ދެވަނަ ބުރުގެ ވޯޓުލުން ވަރަށް ކައިރިވެފައި ވަނިކޮށް ކަމަށެވެ.

”ފުލެޓަށް އެޕްލައިކުރި އެންމެނަށް އިންނަނީ ޖަހާފައި ޝަރުތު ހަމަވޭ ފުލެޓް ލިބޭ. އެއީ ކޮން ތަނަކުން ކޮން ގޮތަކަށް ލިބޭ އެއްޗެއްތޯ އެއިން އެއްވެސް އެއްޗެއް ނެތް. ހަމަ ހުރިހާ ފަރާތަކަށްވެސް މި އޮންނަނީ ޖަހާފައި ޝަރުތު ހަމަވޭ ފުލެޓް ލިބަޭ. ކޮން ގޮތަކަށްތޯ؟“ ވަޒީރު ވިދާޅުވިއެވެ.

”އަޅުގަނޑުމެން ގަބޫލެއް ނުކުރަން އޭރުގެ އެ ސްކީމަކީ އިންސާފުވެރިކަމާއެކު ބެލޭނެ ސްކީމެއް ކަމަށްވެސް. މިސާލަކަށް އޭގައި ޖަހާފައި އިންނަނީ އެއް ކޮޓަރީގައި ހަ މީހަކު އުޅޭކަމަށް. އެއް ފާހާނައެއް ބޭނުންކުރާ ހަ މީހަކު އުޅޭ ކަމަށް. އެކަމަކު އެ އުސޫލުގައި ނޯވޭ އެއީ ކޮން ބަޔަކަށް ކަމެއް ވާން ޖެހޭނީ. ހަމަ ބޭރުން ބަޔަކު އައިސް ބޭނުންކޮށްލަނީ ކަމެއް. ހަމަހަމަ އިންސާފުވެރި އުސޫލަކުން ޗެކްކޮށްލެވޭނެ ގޮތަކަށް އޮތް އެއްޗެއް ވެސް ނޫން،"

ވަޒީރު ޑރ މުޢްޠަލިބު

އެހެންކަމުން ސަރުކާރު ނިމެން ކައިރިވެފައިވަނިކޮށް އެގޮތަށް އާއްމު ކޮށްފައިވާ ލިސްޓަކަށް ބަލައިގެން މި ސަރުކާރުގެ ފުލެޓް ދޫނުކުރައްވާނެ ކަމަށް ވަޒީރު ވިދާޅުވިއެވެ.

"އެއީ ރައްޔިތުންނަށް އޮޅުވާލަން ކޮށްފައި އޮތްކަމެއް…އެހެންވީމާ އަޅުގަނޑުމެން އެއްވެސް ވަރަކަށް ތި ވިދާޅުވާ ދެވަނަ ބުރުގައި ނެރެފައި އޮތް ލިސްޓަކަށް އެއްވެސް ވަރަކަށް ކޮންސިޑާއެެއް ނުކުރާނަން،" މުއްޠަލިބް ވިދާޅުވި އެވެ.

ވަޒީރު ވިދާޅުވީ މި ސަރުކާރުން ފުލެޓް ދިނުމުގެ ކަންކަން ހަމަހަމަ ކަމާއެކު ކުރިއަށް ގެންދިޔުމަށް އުސޫލެއް ކަނޑައަޅައި އާއްމު ކޮށްފައިވާ ކަމަށާ، މި ސަރުކާރުން ފުލެޓް ދޭނީ އެ އުސޫލުގެ ތެރެއިން ޝަރުތު ހަމަވާ ފަރާތްތަކަށް ކަމަށެވެ.

މިދިޔަ 16 ނޮވެމްބަރުގައި މި ސަރުކާރުން ވަނީ 'ބޯހިޔާވަހިކަން އެންމެނަށް' ނަމުގައި ސަރުކާރުގެ ބޯހިޔާވަހިކަމުގެ ސިޔާސަތަކާއި އެ ސިޔާސަތުގެ ދަށުން ގޯއްޗާއި ފްލެޓް ދޫކުރާނެ ގޮތުގެ އުސޫލެއް އާންމުކޮށްފަ އެވެ.

މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން މާލެ ސަރަހައްދުގައި 3000 ހައުސިން ޔުނިޓް އެޅުމަށް ސަރުކާރުން މިހާރުވެސް ބީއެމްއެލްއަށް ބިން ހަވާލުކޮށްފައިވާ ކަމަށާ، އޭގެ ތެރޭގައި ވިލިނގިލީގައި އަޅާ 300 ޔުނިޓާއި ހުޅުމާލޭގެ ފޭސް 1 އަދި 3 ގައިއަޅާ 2700 ކަމަށް ވަޒީރު ވިދާޅުވިދާޅުވިއެވެ.

މީގެ އިތުރުން އިންޑިއާގެ އެހީގައި އަޅާ 4،000 ޔުނިޓާއި، ބައިލެޓެރަލް އެކި އިންތިޒާމުތަކުގެ ތެރެއިން 700 ޔުނިޓް ހިމެނޭހެން ޖުމުލަ 7،700 ސޯޝަލް ހައުސިން ޔުނިޓް ހިމެނޭކަން ވަޒީރު ފާހަގަކުރެއްވިއެވެ.