މިދިޔަ ހަފުތާގައި މާލެ އަދި ބުރިޖުގައި 40 އެކްސިޑެންޓު، ދުވެލި މަޑުކުރޭ

މި މަހުގެ ފަސް ވަނަ ދުވަހުން ފެށިގެން މި މަހުގެ 11 ވަނަ ދުވަހުގެ ނިޔަލަށް މާލެ، ބުރިޖު އަދި ހައިވޭގައި 40 އެކްސިޑެންޓު ހިނގާފައިވާ ކަމަށް ދިވެހި ފުލުހުންގެ ޚިދުމަތުގެ ތަފާސް ހިސާބުތަކުން ދައްކައިފިއެވެ.

ފުލުހުން މިއަދު އާންމުކުރި ހިސާބުތަކުން ދައްކާ ގޮތުން މިދިޔަ ހަފުތާގެ ތެރެއިން އެންމެ ގިނަ އެކްސިޑެންޓު ހިނގައިފައިވަނީ މިދިޔަ ބުރާސްފަތި ދުވަހުއެވެ. އެގޮތުން އެ ދުވަހު 10 އެކްސިޑެންޓެއް ހިނގައިފައިވާއިރު، އެންމެ މަދު އެކްސިޑެންޓެއް ހިނގައިފައިވަނީ ބުރިޖު އަދި ހައިވޭއަށް ވެސް އެންމެ ބާރުބޮޑުވާ ހުކުރު ދުވަހުއެވެ. އެ ދުވަހު ދެ އެކްސިޑެންޓެއް ހިނގައިފައިވެއެވެ.

ހަފުތާގެ ބަންދުގައި މުޅި ޖުމްލަ ފަސް އެކްސިޑެންޓެއް ހިނގިއިރު، އެ ނޫން ދުވަސްތަކުގައި 35 އެކްސިޑެންޓެއް ހިނގި ކަމަށް އެ ހިސާބުތަކުން ދައްކައެވެ.

އެ އެކްސިޑެންޓުތަކުގެ ތެރެއިން 75 އިންސައްތަ އެކްސިޑެންޓުތަކަކީ ދުވާލު ހިނގައިފައިވާ އެކްސިޑެންޓުތަކަށްވާއިރު، އެ 40 އެކްސިޑެންޓުގެ ތެރެއިން ހަތަރު މީހަކަށް އަނިޔާވެފައިވެއެވެ. އަދި 90 އިންސައްތަ އެކްސިޑެންޓުތަކުގައި ދުއްވި އުޅަނދަށް ވަނީ ގެއްލުން ވެފައެވެ.

އޭގެ ތެރޭގައި ނުރައްކާތެރި އެއް އެކްސިޑެންޓެއް ހިނގައިފައިވާއިރު މުޅި ޖުމްލަ 32 އެކްސިޑެންޓަކީ މާލޭގައި ހިނގި އެކްސިޑެންޓުތަކެވެެ. 8 އެކްސިޑެންޓެއް ވަނީ ބުރިޖު އަދި ހައިވޭގައި ހިނގާފައެވެ. އޭގެ ތެރެގައި އެންމެ ގިނައި ސައިކަލާއި ކާރު ޖެހިގެން ހިނގި އެކްސިޑެންޓުތަކެވެ.

އެގޮތުން އޭގެ 11 އެކްސިޑެންޓެއް ހިނގައިފައިވާއިރު، ދެ ސައިކަލު ޖެހިގެން 8 އެކްސިޑެންޓެއް ވަނީ ހިނގާފައެވެ. އަދި ދެ ކާރެއް ޖެހިގެން 4 އެކްސިޑެންޓު، ސައިކަލަކާއި ވޭނެއް ޖެހިގެން އަދި ކާރަކާއި ޕިކަޕެއް ޖެހިގެން ވެސް 3 އެކްސިޑެންޓު ހިނގައިފައިވެއެވެ.

އެ އެކްސިޑެންޓުތަކުގެ ތެރޭގައި އުޅަނދަކުން ޖެއްސުމަށްފަހު ފިލި އެއް އެކްސިޑެންޓު ހިމެނޭ ކަމަށް ވެސް އެ ހިސާބުތަކުން ދައްކައެވެ.