ހިޔާވެހި ފައިނޭންސް ސްކީމަކީ ދާއިމަށް ކޮންމެ އަހަރަކުވެސް ކުރިއަށްގެންދާނެ މަޝްރޫއެއް: ރައީސް ޑރ.މުޢިއްޒު

"ހިޔާވެހި ފައިނޭންސް ސްކީމް" އަކީ ދާއިމަށް ކޮންމެ އަހަރަކުވެސް ކުރިއަށްގެންދާނެ މަޝްރޫއެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، "ހިޔާވެހި ފައިނޭންސް ސްކީމް" އިފްތިތާހް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، މިއަދު ފެށިގެން އެދަނީ އެމަނިކުފާނު ވައުދުވެވަޑައިގެންނެވި ފަދައިން އަދި މެނިފެސްޓޯގައިވެސް ހިމަނާފައިވާ 5 ޕަސެންޓްގެ އިންޓްރެސްޓްގައި ހިމެނޭ، އެއަށްވުރެ ބޮޑު ނުވާނެ އިންޓްރެސްޓްގެ ލޯނު ސްކީމް ދޫކުރާނެ ކަމަށް ވީ ވައުދު ފުއްދުން ކަމަށެވެ.

ރާއްޖޭގެ ކޮންމެ ރަށެއްގައި ހުރި މީހެއް ކަމުގައި ވިޔަސް އެމީހެއްގެ އަމިއްލަ ގޯތި، އަމިއްލަ ބިމަކީ ނުވަތަ އިމާރާތަކީ ދިރިއުޅެވޭވަރުގެ ބޯހިޔާވައްސަކަށް ހެދުމަށްޓަކައި މި ސްކީމްގެ ބޭނުން ހިފޭނެކަމަށާއި، މިއީ އަމިއްލަ ގެދޮރުވެރިކަން ގާއިމު ކުރުމަށްޓަކައި ފޯރުކޮށްދޭ އެހީތެރިކަމެއް ކަމަށް ރައީސް ޑރ.މުޢިއްޒު ވިދާޅުވިއެވެ.

"މިއީ މިއަދު ފަށާފައި މިއަންނަ އަހަރު ހުއްޓާލާ ސްކީމެއް ނޫން، މިއީ ދާއިމަށް އިރާދަކުރެއްވީތީ ކޮންމެ އަހަރަކުވެސް ކުރިއަށްގެންދާނެ މަޝްރޫއެއް."

ރައީސް ޑރ.މުޢިއްޒު ވިދާޅުވިއެވެ.

މިއަދު އިފްތިތާހްކުރެވުނު "ހިޔާވެހި ފައިނޭންސް ސްކީމް" ގެ ދަޑުން ހިޔާވެހި ރަށްވެހި ވަސީލަތަށް އެއްވެސް އިކުއިޓީއެއް ދައްކަން ނުޖެހުނު ނަމަވެސް ޝަރީޢާ އުސޫލުތަކާ އެއްގޮތަށް އަމަލުކުރުމަށްޓަކައި "ނޮމިނަލް ކޮންޓްރިބިޔުޝަން" އެއް ދައްކަން ޖެހޭނެއެވެ.

މި ސްކީމްގައި ހިމެނޭ ވަސީލަތްތަކަށް ޝަރުޠު ހަމަވަ ފަރާތްތަކަށް ހިޔާވެހި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު ހުޅުވާލެވޭނެކަމަށް ގެދޮރުވެރިކަމާއި ބެހޭ ވުޒާރާއިން ހާމަކޮށްފައިވާއިރު، މިއީ، ހުސްބިމެއްގައި އަލަށް އިމާރާތެއް ކުރުމަށް ނުވަތަ ނުނިމި ހުރި އިމާރާތެއް އެއްކޮށް ނިންމުމަށް ނުވަތަ ބާވެ ހަލާކުވެފައިވާ އިމާރާތެއް މަރާމާތުކުރުމަށް ހަމަޖައްސާ ފައިސާއަށްވާތީ ދޫކުރެވޭ ޖުމްލަ އަދަދުން މަޝްރޫޢު އެއްކޮށް ނިންމޭވަރު ވާންޖެހޭނެކަމަށް އެ ވުޒާރާއިން ބުނެއެވެ.