ރައީސުލްޖުމްހޫރިއްޔާ ހުޅުމާލެ ފޭސް 1 ގެ ރައްޔިތުންނާ ބައްދަލުކުރެއްވުން މާދަމާ ރޭ

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހުޅުމާލެ ފޭސް 1 ގައި ދިރިއުޅެމުންދާ ރައްޔިތުންނާ ބައްދަލުކުރެއްވުން މާދަމާ ރެއަށް ތާވަލްކޮށްފިއެވެ.

ސަރުކާރުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ.މުއިއްޒު ހުޅުމާލެ ފޭސް އެކެއްގައި ދިރިއުޅުއްވާ ރައްޔިތުންނާ ބައްދަލުކުރެއްވުން މާދަމާ ރޭ 20:30 ގައި ރެހެނދި ސްކޫލުގައި އޮންނާނޭ ކަމަށެވެ.

ރައްޔިތުންނާ ބައްދަލުކުރެއްވުމަށް ރައީސް ބާއްވަވާ މި ބައްދަލުވުންތަކަކީ، ރައްޔިތުންނާ ގާތުން ބައްދަލުކުރައްވައި، އެކި ކަންކަމުގައި ރައްޔިތުންގެ ޚިޔާލާއި މަޝްވަރާ ހޯއްދެވުމަށާއި، ރައްޔިތުން ކަންބޮޑުވާ ކަންތައްތަކާއި ޙިއްސާކުރައްވަން ބޭނުންފުޅުވާ ކަންކަން ސީދާ އަޑު އެއްސެވުމަށް ބާއްވާ ސިލްސިލާ ބައްދަލުވުން ތަކެކެވެ. ރައީސް އޮފީހުން ވަނީ މި ބައްދަލުވުމަށް ފޭސް އެކެއްގެ ރައްޔިތުންނަށް އާއްމުކޮށް ދައުވަތު އަރުވާފައެވެ.

ރައީސް އެންމެފަހުން ބައްދަލުކުރައްވާފައިވަނީ ފޭސް 2 ގެ ރައްޔިތުންނާއެވެ. މި ބައްދަލުވުންތަކުގައި ފޭސް ދޭއްގައި ދިރިއުޅުއްވަމުން ގެންދަވާ ރައްޔިތުން ވަނީ އެ ފަރާތްތަކުގެ ޝަކުވާތައް ރައީސްއަށް ހުށަހަޅުއްވާފައެވެ. މީގެ ތެރެއިން އެންމެގިނައީ ބޯހިޔާވަހިކަމާ ގުޅުން ހުރި ޝަކުވާތަކެވެ. ރައީސް ވަނީ އެ ބައްދަލުވުމުގައި އެފަރާތްތަކުގެ މުހިންމު ބައެއް ޝަކުވާތަކަށް އުއްމީދީ ޖަވާބުތަކެއް ދެއްވާފައެވެ. ރައީސް ފޭސް ދޭއްގައި ދިރިއުޅެމުންދިޔަ ރައްޔިތުންނާ ބައްދަލުކުރުމަށް ބޭއްވި ބައްދަލުކުރެއްވުން ނިންމަވާލައްވާފައިވަނީ އެރޭގެ މެންދަމު ދޭއް ޖެހިފަހުންކަން ފާހަގަކޮށްލެވެއެވެ.

އޭގެ ތެރެއިން ބައެއް ޝަކުވާތަކަށް ސަރުކާރުގެ ކަމާބެހޭ އިދާރާތަކުން ވަނީ 24 ގަޑިއިރުގެ ތެރޭގައި ރައްޔިތުން އެދުނު ގޮތަށް ކަންކަން ކޮށްދެއްވުމަށް ނިންމިކަން އިއުލާނުކޮށްފައެވެ. މީގެ ތެރެއިން އެންމެ ފާހަގަކޮށްލެވެނީ، ގެދޮރުވެރިޔާ ސްކީމުގެ ދަށުން ތަރައްގީކޮށްފައިވާ ފްލެޓްތަކުގެ ޑައުންޕޭމަންޓް ކުޑަކުރަން ނިންމި ނިންމުމެވެ. އެގޮތުން ހައުސިން މިނިސްޓްރީން ވަނީ ފްލެޓްތަކުގެ ޑައުންޕޭމަންޓް ކުޑަކުރަން ނިންމާފައިވާތީ ޑައުންޕޭމަންޓް ދައްކާފައިވާ މީހުންނަށް މަހު ކުލީން އެބައި އުނިކޮށްދޭން ނިންމި ކަމަށް ބުނެފައެވެ.

އެގޮތުން ތިން ކޮޓަރީގެ ފްލެޓްތަކަށް މިހާރު ދައްކަން ޖެހޭ އެޑްވާންސް ޕޭމަންޓުން 17,000 ރުފިޔާ އުނިކުރަން ވަނީ ނިންމާފަ އެވެ. އެހެން ކަމުން ޑައުންޕޭމަންޓަށް ދައްކަން ޖެހޭ 25,000 ރުފިޔާގެ ބަދަލުގައި ދެން ދައްކަން ޖެހޭނީ 8,500 ރުފިޔާ އެވެ.

އަދި ތިން ކޮޓަރީގެ ފްލެޓްތަކަށް ކުއްޔާއި މެއިންޓަނަސް ފީގެ ގޮތުގައި ދައްކަން ޖެހޭ 10,500 ރުފިޔާއިން ވަނީ 500 ރުފިޔާ އުނިކޮށްފަ އެވެ. އެހެން ކަމުން ދެން ދައްކަން ޖެހޭނީ މަހަކު 10,000 ރުފިޔާ އެވެ.