އޮތް އެންމެ ބޮޑު ވަބާ އަކީ ކޮރަޕްޝަން، ޑިޖިޓަލައިޒް ކުރުމުގެ ބޭނުމަކީ އެވަބާ ނައްތާލުން: ރައީސް

މުޖްތަމައުގެ ތެރޭގައި އޮތް އެންމެ ބޮޑު ވަބާ އަކީ ކޮރަޕްޝަން ކަމަށާ ރާއްޖެ ޑިޖިޓަލައިޒް ކުރުމުގެ އެންމެ ބޮޑު ބޭނުމަކީ އެ ވަބާ ނައްތާލުން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ނަސަންދުރާ ބާސެލޯސް ގައި މިރޭ ފެށި "މޯލްޑިވްސް 2.0 ސައިޓް" ހުޅުވުމުގެ ރަސްމިއްޔާތު ޝަރަފުވެރިކޮށް ދެއްވާ ވާހަކަފުޅު ދައްކަވަމުންނެވެ. ރައީސް ވިދާޅުވީ ރާއްޖެ ޑިޖިޓަލައިޒް ކުރުމުގެ މަޝްރޫއު "ދިވެހިރާއްޖެ 2.0" އަކީ 2040 ވަނަ އަހަރު އަންނަން ވާއިރަށް ރާއްޖެއަކީ ތަރައްގީ ވެފައިވާ ގައުމަކަށް ހެދުމުގެ ފެށުން ކަމަށެވެ.

އެމަނިކުފާނު ވިދާޅުވީ އެ ރާސްތާއަށް ދިއުމަށް ރަނގަޅު ކުރަން ޖެހޭ ވަރަށް ގިނަ ކަންކަން އެބަހުރި ކަމަށެވެ. އަދި ދިވެހި މުޖްތަމައުގައި ހުރި ނުރަނގަޅު އެތައް އާދަތަކެއް ބަދަލު ކުރަަން ޖެހޭ ކަމަށެވެ.

އެމަނިކުފާނުގެ ތަސައްވުރަކީ އަދި އަމާޒަކީ ވަށާޖެހޭ ގޮތަކަށް ހުރިހާ ކަމެއް ރަނގަޅު ކުރުން ކަމުގައި ވިދާޅުވި އެވެ.

"އަޅުގަނޑުމެންގެ ތެރޭގައި އޮތް އެންމެ ބޮޑު ވަބާ އަކީ ކޮރަޕްޝަންގެ ވަބާ. އެއީ ދެބަސް ނުވެވޭނެ ހަޤީޤަތެެއް," މިރޭގެ ރަސްމިއްޔާތުގައި ރައީސް ވިދާޅުވި އެވެ.

ރައީސް ވިދާޅުވީ ހިދުމަތް ދިނުމުން ފެށިގެން ގޮސް ހުރިހާ ދިމާއެއްގައި ކޮރަޕްޝަންގެ ނުރައްކާ އެބަ އޮތް ކަމަށެވެ. އަދި މިހާރު ހިނގަމުންދާ ގޮތް ބަދަލުނުކޮށް އެކަން ރަނގަޅު ކުރެވެން ނެތް ކަމުގައި ވިދާޅުވި އެވެ.

https://x.com/thevoice_mv/status/1920887908052910479?t=JHDYEvGOsThxS32TWiIJHw&s=19

ހިދުމަތް ދިނުމުގައި މުވައްޒިފުން ހަރަކާތްތެރިވާއިރު އަމިއްލަ ނަފްސު އިސްކުރެވޭ ކަންކަމުގައި ވަރަށް ގިނަ ފަހަރަށް ގޯސް ހެދޭ ފަހަރު އަންނަ ކަން ފާހަގަ ކުރައްވާ ރައީސް ވިދާޅުވީ ޑިޖިޓަލައިޒް ކުރެވޭ މިންވަރަކުން ކޮރަޕްޝަންގެ ވަބާ ނައްތާލެވޭނެ ކަމަށެވެ.

އެކަން އެންމެ ސާފުކޮށް ފެންނަން އޮތް ގައުމީ މިރޭ ފެށުނު "މޯލްޑިވްސް 2.0 ސައިޓް" ބޭއްވުމަށް އެހީތެރިވެދޭ އެސްޓޯނިއާ ކަން ފާހަގަ ކުރައްވާ ރައީސް ވިދާޅުވީ އެ ގައުމު މިސާލަކަށް ބަދަލައިގެން ރާއްޖެ ޑިޓިޖަލް ކުުރުމުގެ މަސައްކަތް ކުރައްވާނެ ކަމަށެވެ.

އައިޑީކާޑުގައި ޑިޖިޓަލައިޒް ސާވިސްތައް ހިމެނުން

އެގޮތުން އެންމެ ފާހަގަކޮށްލެވޭ އެއް ކަމަކަށް އެމަނިކުފާނު ފާހަގަ ކުރެއްވީ އައިޑީކާޑުގައި ޑިޖިޓަލައިޒް ސާވިސްތައް ހިމެނުމެވެ. ރައީސް ވިދާޅުވީ އެކަމުން ވަރަށް ގިނަ ފައިދާތަކާއި ފަސޭހަތައް ލިބިގެން ދާނެ ކަމަށެވެ.

އަދި ސައިބާ ސެކިއުރިޓީ ދާއިރާ ވަރުގަދަ ކުރުމާއި ޚިދުމަތުގެ ނިޒާމު ވަރުގަދަ ކުރުމުގެ މަސައްކަތް ކުރެވޭނެ ކަމުގައި ވިދާޅުވި އެވެ. ރައީސް ވިދާޅުވީ ޚިދުމަތުގެ ނިޒާމު ވަރުގަދަ ކުރުމުން ނަތީޖާ ހާސިލު ކުރެވޭ މިންވަރު އިތުރުވާނެ ކަމަށެވެ.

"މި މަޝްރޫއު މި ފަށަނީ މި ގައުމަކީ ވަރަށް ބޮޑަށް ހުޅުވިފައިވާ މައުލޫމާތު ފަސޭހައިން ލިބޭ ޒިންމާދާރުކަމާއެކީ ހިދުމަތްދޭ ވަރަށް އަވަހަށް އަވަސް މިނުގައި ހިދުމަތްދޭ ގައުމަކަށްވުމުގެ އަޒުމުގައި," ރައީސް ވިދާޅުވި އެވެ.

ރައީސް އިތުރަށް ވިދާޅުވީ ގައުމެއް ކުރިއަށް ގެންދަން ބޭނުން ވަނީ ހަމައެކަނި ބޮޑެތި އިމާރާތްތަކެއް ނޫން ކަމަށެވެ. ގައުމެއްގެ ކުރިއެރުމަށް އަތްލެވޭ އުމްރާނީ ތަރައްގީގެ ވަސީލަތްތައް ހުންނަން ޖެހޭ ކަމަށާ އެކަން ވަރަށް މުހިންމު ނަމަވެސް އެއާއެކު އެ މިންވަރަށް މުހިންމު އެހެން ކަންކަން އެބަހުރި ކަމަށް ވިދާޅުވި އެވެ.

އެގޮތުން ކޮރަޕްޝަން ނައްތާލާ ހިންގުމުގެ ނިޒާމު ހަރުދަނާ ކުރުމާއި ދެފުށް ފެންނަ ނިޒާމެއް އޮތް ގައުމަށް ރާއްޖެވުން މުހިންމު ކަމުގައި ވިދާޅުވި އެވެ.