މި މަޖިލިސް ވެގެންދާނީ ރައީސް މުޢިއްޒުގެ ފިޔަވަޅު ހަމަކޮށް ހިނގާނެ މަޖިލީހަކަށް: އަބްދުއްރަހީމް

20 ވަނަ ރައްޔިތުންގެ މަޖިލިސް ވެގެންދާނީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ފިޔަވަޅު ހަމަކޮށް ހިނގާނެ މަޖިލީހަކަށް ކަމަށް 20 ވަނަ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

20 ވަނަ މަޖިލީހުގެ ރައީސްކަމާއި ހަވާލުވެވަޑައިގެން ދެއްވި ހިތާބުގައި އަބްދުއްރަހީމް ވަނީ، ރައީސް ޑރ މުހައްމަދު މުއިއްޒު، އެމަނިކުފާނުގެ ނަން، މަޖިލީހުގެ ރައީސްކަމުގެ މަގާމަށް ހުށަހަޅުއްވާފައިވާތީ ޝުކުރު ދަންނަވާފައެވެ. އަދި އެމަނިކުފާނު އެ މަގާމަށް އިންތިޚާބު ކުރުމަށް ވޯޓު ދެއްވި މެމްބަރުންނާއި ފޮނަދޫ ދާއިރާއަށް އިންތިހާބުކޮށްދެއްވި ދާއިރާގެ ރައްޔިތުންނަށްވެސް ޝުކުރު އަދާކުރެއްވިއެވެ.

މިއާއެކު އެމަނިކުފާނު ވަނީ ނިމިދިޔަ 19 ވަނަ މަޖިލީހަށާއި މަޖިލީހުގެ ރިޔާސަތަށްވެސް ޝުކުރު ދަންނަވައި ކޮށްދެއްވި މަސައްކަތުގެ އަގުވަޒަން ކުރައްވާފައެވެ.

އަބްދުއްރަހީމް ވިދާޅުވީ، 20 ވަނަ މަޖިލިސް އެކުލަވާލެވިފައިވަނީ ގައުމަށް މުހިންމު ވަގުތެއްގައިކަމަށެވެ. އެގޮތުން 20 ވަނަ މަޖިލިސް އެކުލަވާލެވިފައިވަނީ މުހިންމު އައު ސިޔާސަތުތަކަކާއި އެކީގައި އިންގިލާބީ ހެޔޮ ބަދަލެއް ރާއްޖެއަށް ގެނެސްދިނުމުގެ އިހުލާސްތެރި ވިސްނުމުގައި ރާއީސުލްޖުމްހޫރިއްޔާ ޑރ މުޢިއްޒު ރާއްޖޭގެ ވެރިކަމާއި ހަވާލުވެފައިވަނިކޮށްކަމަށް އެމަނިކުފާނު ވިދާޅުވިއެވެ.

މި މަޖިލިސް ވެގެންދާނީ ރައީސް މުއިއްޒުގެ މަސައްކަތްޕުޅާއި، އެމަނިކުފާނުގެ ފިޔަވަޅު ހަމަކޮށް ހިނގާނެ، ހިނގަންވާނެ މަޖިލީހަކަށް. މިބދަނޑިވަޅަކީ ގައުމެއްގެ ގޮތުގައި މުހިންމު ނިންމުންތަކެއް ނިންމަންޖެހުފައުވާ ދަނޑިވަޅެއް.

އަބްދުއްރަހީމް އަބްދުالله

“އިގްތުސާދީ އަސާސްތައް ފުޅާކުރުން، އާ މަސައްކަތްތަކާއި ފަންނުތަކާއު ވިޔަފާރިތައް އުފަން ކުރުން. ފައިސާ އާއި މާލީ ފުދުންތެރިކަން އިތުރު ކުރެވޭނެ ގޮތްތައް ހޯދުން. އުމްރާނީ ތަރައްގީގެ އައު ހަރުފަތްތަކެއް ރާއްޖެއަށް ތައާރަފްކުރަމުން ގެންދިޔުން” އަބްދުއްރަހީމް ވިދާޅުވިއެވެ.

މީގެ އިތުރުން، ވީދެމުންދާ ރާއްޖޭގެ އިޖްތިމާއީ ފޭރާން އަލުން އައުކުރުމަކީވެސް އަމާޒެއްކަމަށްވާއިރު، މަސްތުވާތަކެތީގެ ވަބާގެ މައްސަލައާއި ދެކޮޅަށް މަސައްކަތްައް ކުރުމާއި ނުގަވައިދުން ބިދޭސީން ވަންނަމުންދާ ދޮރުތައް ބަންދުކުރުމަކީވެސް މި ދައުރުގެ ޒިންމާއެއްކަމަށް އަބްދުއްރަހީމް ވިދާޅުވިއެވެ.

ހަމަ އެހެންމެ، ގާނޫނުގެ ވެރިކަން ނެގެހެއްޓުމާއި ޝަރުއީ ދާއިރާގެ މިނިވަންކަން ކަށަވަރުކޮށް މަޖިލީސްގެ އަބުރު ހިފެހެއްޓުމަކީވެސް ކުރައްވާނެ މަސައްކަތެއްކަމަށާ، ކުރިއަށް އޮތް ދުވަސްތަކުގެ ތެރޭގައި މި ކަންކަމާއި ގުޅޭގޮތުން މަޖިލީހުގެ ތެރޭގައި ބަހުސްކުރެވި ސަރުކާރާއިއެކު މަސައްކަތައް ކުރެވި ގޮތް ނިންމަންޖެހޭކަމަށްވެސް އެމަނިކުފާނު ވިދާޅުވިއެވެ. އަދި އައު ގާނޫނުތައް ތައާރަފްކޮށް ހުރި ގާނޫނުތައް އަލުން ބަލައި އިސްލާހުކުރުމާއި އަމަލުކުރަމުންދާ ގާނުނުތަކުން ވަގުތާއި ފައި ހަމަނުވާ ގާނޫނުތައް އުވާލުމަށްވެސް ކަނޑައެޅިފައިވާކަމަށް ވިދާޅުވިއެވެ.