ބިޒީ ވިޔަސް، މިކަހަލަ ޗީޒީ ގާލިކް ޓޯސްޓް ތައްޔާރުކޮށްލެވިދާނެ؛ ނަގާނީ ކުޑަވަގުތުކޮޅެއް

ރޯދަމަހު ސަރުކާރު ބަންދު ނަމަވެސް، އަޅުކަމުގައި ގިނަ މީހުން އުޅެނީ ވަރަށް ބުރަކޮށެވެ. އެހެންކަމުން ރޯދަ ވީއްލާ ގަޑިއަށް ތައްޔާރު ކުރަން ބޭނުން ވަނީވެސް ފަސޭހަ މީރު އެއްޗެކެވެ. އެފަދަ ފަރާތްތަކުން މި ރެސިޕީ ޓްރައި ކޮށްލަން ރަނގަޅު ވާނެއެވެ.

ބޭނުންވާ ތަކެތި

4 މޭޒުމަތީ ސަމުސާ ސޯލްޓެޑް ބަޓަރު (މަޑުކޮށްފައި، މެލްޓް ނުކޮށް)

1 މޭޒުމަތީ ސަމުސާ ޗިލީ ފްލޭކްސް

1/2 ސައި ސަމުސާ ލޮނުމެދު ޕޭސްޓް

1/2 ސައި ސަމުސާ އޮރެގާނޯ

3-4 ފޮތި ޕާން

މޮޒަރެލާ ޗީޒް

ތައްޔާރުކުރާނެ ގޮތް

1) ބަޓަރ، ޗިލީ ފްލޭކްސް، ލޮނުމެދު ޕޭސްޓް އަދި އޮރެގާނޯ އެއްކޮށްލައި ޕޭސްޓެއް ހަދާލާށެވެ.  ދިޔާވެއްޖެނަމަ އިތުރު ބަޓަރ އަޅާލާށެވެ.

2) ޕާނުގެ އެއްފަރާތުގައި ބޯކޮށް ޕޭސްޓް އުނގުޅާށެވެ

3) ދެން ޕާނުގެ މަތީގައި ގާނާފައިވާ މޮޒަރެލާ ޗީޒް ބޭނުން ވަރަކަށް އަޅާށެވެ.

4) އެއަށްފަހު އެއަރ ފްރަޔަރ 200 ޑިގްރީ ސެލްސިއަސްއަށް ހޫނުކުރާށެވެ. އަދި ޕާން 3-5 މިނެޓަށް ބޭކްކުރާށެވެ (3 މިނެޓުގައި ޗެކްކުރާށެވެ)

މި ޓޯސްޓް އެ ހުރި ގޮތަށް ކާލަންވެސް މީރުވާނެއެވެ. ނުވަތަ ހޮޓް ސޯސް އުނގުޅާލައިގެންވެސް ވަރަށް މީރު ވާނެއެވެ.