އުމްރާވެރީން އަންނަން ފެށުން: ވީއައިއޭއަށް ބާރުބޮޑުވާނެތީ ފުރާ މީހުން ކުރީން ދިއުމަށް އެދިއްޖެ
ލިޔުންތެރިޔާ
އަހުމަދު ހަމީދު އާދަމް
މާދަމާ އަކީ ވެލާނާ އިންޓަނޭޝަނަލް އެއާޕޯޓަށް ބާރުބޮޑު ދުވަހަކަށް ވާނެތީ ފުރާ މީހުން ވީހާވެސް ކުރީން އެއާޕޯތަށް ދިއުމަށް އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޑެޓް (އެމްއޭސީއެލް) އިން އިލްތިމާސް ކޮށްފި އެވެ.
ރާއްޖެއިން މި އަހަރު އުމްރާގެ އަޅުކަމަށް ދިޔަ މީހުންގެ ތެރެއިން ގިނަ ބަޔަކު މާދަމާ ރާއްޖެ އަންނާނެ އެވެ. އެމްއޭސީއެލުން ބުނި ގޮތުގައި މާދަމާގެ ދެ ވަގުތެއްގައި ގިނަ އަދަދެއްގެ އުމްރާވެރީން ރާއްޖެ އަންނާނެ އެވެ. އެއީ މެންދުރު ފަހު 2:00 ގައި އަދި ހަވީރު 4:00 ގަ އެވެ.
އެ ވަގުތުތަކުގައި އެއާޕޯޓަށް ވަރަށް ބާރުބޮޑުވާނެ ކަމަށް ލަފާކުރެވޭތީ މާދަމާ ފުރާ މީހުން ވަގުތުގެ ކުރީން އެއާޕޯޓަށް ގޮސް ފުރުމުގެ ކަންކަން ނިންމުމަށް ވަނީ އެދިފަ އެވެ.
އުމްރާގެ އަޅުކަމަށްދާ މީހުންނަށް އެއާޕޯޓުން މަރުހަބާ ކިޔުމަކީ ދިވެހީންގެ އާދަ އެކެވެ. އެހެން ކަމުން ވަރަށް ގިނަ ބަޔަކު އެއާޕޯޓަށް ދާނެ އެވެ. ޚާއްސަކޮށް ދުވަސްވީ އާއިލީ މެންބަރުން އުމްރާ ނުވަތަ ހައްޖުގެ އަޅުކަމަށް ދާނަމަ އެ މީހުން ފުުރުވަން އަދި އެ މީހުން ރާއްޖެ އައުމުން އިސްތިޤުބާލަށް މުޅި އާއިލާ އެކުގައި އެއާޕޯޓަށް ދެ އެވެ.
ފުލުހުން ވެސް ވަނީ ކުރިއަށް އޮތް ދެ ދުވަހު އެއާޕޯޓަށް ބާރުބޮޑުވާނެތީ އެއާޕޯޓަށް ދަތުރުކުރާ ވެހިކަލްތަކުން ފުލުހުންގެ އިރުޝާދަށް ޚާއްސަ ސަމާލު ކަމެއް ދިނުމަށް އެދިފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
