އެމްޑީޕީގެ "ސަޅި" ކެމްޕެއިން: އެހެން ޕާޓީތަކުން ދަސްކުރަންޖެހިފައި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަކީ ރާއްޖޭގެ ރައްޔިތުންގެ ހައްޤުތައް ކަށަވަރުކޮށް، ސިޔާސީ ހަރަކާތްތަކަށް ދިވެހިން ހޭލުންތެރިކުރުވި ޕާޓީކަމާ މެދު ސުވާލު އުފައްދާނެ މީހަކު ނުވާނެއެވެ. އެމްޑީޕީއަކީ ރާއްޖޭގެ ދެވަނަ ޖުމްހޫރިއްޔާގެ ދަށުން ފުރަތަމަ ރެޖިސްޓާރ ކުރެވުނު ސިޔާސީ ޕާޓީއެވެ.

އެމްޑީޕީ ވުޖޫދުވުމާއެކު ދިވެހިން ދެކިފައިނުވާފަދަ ސިޔާސީ ސީދާ އަދި ނުސީދާ ހަރަކާތްތަކަށް ޕާޓީ ނިކުމެގެން ދިޔައެވެ. ކޮޅުބުން ފެށުނު އިސްލާހީ ހަރަކާތް މާލޭގެ ދުންފިނި ޖަގަހައިން މާލޭގެ ފަޅުން ބޭރުވެ މުޅި ރާއްޖެ ރަންރީދޫކޮށްލީ އެމްޑީޕީގެ "ސަޅި" ކެންޕެއިންތަކެވެ.

"ތާހިރު ދިރިއުޅުމަކުން" ފެށި ކެންޕެއިން ނިންމާލީ "އަނެއް ދިވެހިރާއްޖެ"އަށެވެ. ކެންޕެއިންތައް ކުރިއަށް ގެންދެވުނީ ނުހަނު ރޭވުންތެރި އިންތިޒާމްތަކެއްގެ ތެރެއިންނެވެ. ޖަލްސާ ޒީނަތްތެރި ކުރުމާއި ޖަލްސާގެ ފްލޯ މުޅިން ބަދަލުވެގެންދިޔައެވެ. ރަންޒަމާނުގެ ރަން އަޑުތަކުން ކިޔާފައިވާ ޤައުމީ ލަވަތަކުން ޖޯޝްގެނުވި ކެންޕެއިންގެ ތެރެއަށް އެތައް ދިވެހިންނެއް، ޙާއްސަކޮށް ޒުވާނުން ގެނބިގެން ދިޔައީއެވެ.

ދޮރުން ދޮރަށް ޕާޓީގެ އެންމެ އިސް ފަރާތްކަމުގައިވާ ރައީސް އަދި ޗެއާޕާސަން ވަނީ އޭރު ސަރުކާރު ހިންގަވަން ތިއްބެވި ބޭފުޅުން މިސާލު ޖަހަމުން ދިޔަ "ބޭފުޅުޒަމް" ގެ އަބުއި ގޮތް ދޫކުރައްވައި ރައްޔިތުމީހާގެ ގާތައް ވަޑައިގެން އެންމެ ގާތުން ހާލު ބައްލަވާފައެވެ. މިއީ ވެސް ދިވެހިންނަށް "ސަޅި" ކަމެކެވެ. ހިތާ ހިތުގެ ގުޅުން އުފެދި ލާމެހުނު ކަމަކެވެ. ޕާޓީތަކުން ފިލާވަޅުނަގައި ނަކަލު ކުރަން ޖެހޭ ކަމެކެވެ.

ދެން ފެނިގެން ދިޔައީ މެނިފެސްޓޯ ނަމުގައި ރައްޔިތުންނަށް ސިޔާސަތު ހިފައިގެން ނިކުތްތަނެވެ. ސިޔާސަތަކައިގެން ވެރިކަމަށް ވަޑައިގެންނެވި ފުރަތަމަ ސިޔާސީ ޕާޓީއަކަށް ވެސް އެމްޑީޕީ ވީއެވެ.

މަޖިލިސް އިންތިހާބާއި ކައުންސިލް އިންތިހާބް ކެންޕެއިންތަކަށް މުޅި ރައްޖެއަށް ޕާޓީގެ ލީޑާޝިޕް އަރާނެއެވެ. ރައްޔިތުންގެ ގާތަށެވެ. ކެނޑިޑޭޓް ތައާރަފްކުރުމާއި ޕާޓީ ރޫހް އާލާކުރުމަށެވެ. މިއީ އެމްޑީޕީއެވެ. "ސަޅި" ސިޔާސީ ކެންޕެއިންތަކެވެ.

ރާއްޖެ ޑިމްކްރަސީއަށް އުފަންވިފަހުން އަޅުގަނޑުމެން މިކުރިމަތިލަނީ ތިންވަނަ ރައްޔިތުންގެ މަޖިލިސް އިންތިހާބާއެވެ. މީގެ 14 އަހަރު ކުރިން އެމްޑީޕީން ދައްކައިދިން މިސާލާ އެއްގޮތައް ކެނޑިޑޭޓުން ގޭގެއަށް ނުވަދެ މިހާރު ފަރަކުޖެހޭކަށް ނެތެވެ. ކެންޕެއިން ޕޯސްޓަރަކުން ވެސް މިކަން ކުރެވޭކަށް ނެތެވެ. މިއަދު ކެނޑިޑޭޓުން ރައްޔިތުމީހާގެ ހާލު ބަލައެވެ. ޕާޓީތަކުން ވަފުދުހަދައި ރަށްރަށަށް އަރައި ފޯރި ހިއްޕަން ޖެހެއެވެ. ޕާޓީތައްކުގެ ޖަލްސާ ބާއްވަން ޖެހެއެވެ. އެތެރޭގެ ޕްރައިމެރީތައް ބާއްވައި ވާދަވެރިކަން ވެސް އިތުރުކުރަން ޖެހެއެވެ. ނަމަވެސް އަދިވެސް ރާއްޖޭގައި ހަރަކާތްތެރިވާ ސިޔާސީ ޕާޓީތަކުން އެމްޑީޕީއާއި އެއްހަމަޔަށް ކެންޕެއިން ކުރެވޭވަރެއް ނުވެއެވެ.

އެންމެ ބޮޑު އިދިކޮޅު ޕާޓީ ޕީޕީއެމްގެ ކެނޑިޑޭޓުން ކެންޕެއިން ކުރައްވަން ޖެހެނީ ގިނިކަންޏާއެވެ. ޕާޓީގެ ލީޑާޝިޕް ނެތްކަހަލައެވެ. ކެންޕެއިން ފެއްޓުމަށް ބޮޑު ޖަލްސާއެއް ބާއްވައި ކެނޑިޑޭޓުން ތައާރަފްކުރުމެއްނެތެވެ. ޓިކެޓް ދީފައި އަތުވެސްލަނީއެވެ. ޕާޓީގެ ސިޔާސަތެއް ރައްޔިތުންނަށް ސާފުކޮށްދެވޭތަނެއްވެސް ނުފެނެއެވެ.

ޕީޕީއެމްގެ އިތުރުން ބާކީ ތިބި ޕާޓީތަކުންވެސް ކެންޕެއިންތަކުގައި ޕާޓީއެއްގެ ގޮތުގައި ހަރަކާތްތެރިވާތަނެއް ނުފެނެއެވެ. ރައީސް ނަޝީދުފަދައިން ކެނޑިޑޭޑުންނަށް ހިތްވަރު ދެއްވައި ރަށްރަށަށް ވަޑައިގަނެވޭވަރުގެ ގަޓު ހުރި ލީޑަރުންތަކެއް ނުފެނެއެވެ. މިއީ ވާދަވެރި ސިޔާސީ މާހައުލެއްގޮތުގައި ބޭއްވުމަށް ދެންތިބި ޕާޓީތަކުން އަދިވެސް ދަސްކުރަން ޖެހިފައިވާ މުހިންމު ކަމެކެވެ. އެމްޑީޕީގެ ފިކުރު ރާއްޖެއަށް ފެތުރެމުން ދިޔައީ ރޭވުންތެރި ރައްޔިތުންނާއި ގާތުން ކުރިއަށް ގެންދިޔަ "ސަޅި" ކެންޕެއިންތަކުން ކަމީ ޝައްކެއްނެތްކަމެކެވެ.