ޑޮލަރުގެ މައްސަލަ ހައްލުކުރުމަށް ވެރިކަމުގެ މުއްދަތު ދަންމާލުން މުހިންމު: އުއްޗު

ދިވެހިރާއްޖެއަށް ކުރިމަތިވެފައިވާ ޑޮލަރުގެ މައްސަލަ ހައްލުކުރުމަށް ވެރިކަމުގެ މުއްދަތު ދަންމާލުން މުހިއްމުކަމަށް މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ ވިދާޅުވެއްޖެއެވެ.

ޔޫޓިއުބް ޗެނަލް ދެނޯގެ އެޕިސޯޑެއްގައި ވާހަކަދައްކަވަމުން ރާއްޖޭގެ ފަތުރުވެރިކަމުގެ ސިނާއަތާއި އަދި އެނޫންވެސް ބޮޑެތި ވިޔަފާރިތައް ވޫޖޫދަށް ގެނެސް ކާމިޔާބުކަމާއެކު ހިންގަވަމުން އަންނަ އުއްޗު ވިދާޅުވީ ރާއްޖެއަށް ދިމާވެފައިވާ ޑޮލަރުގެ މައްސަލަ ހައްލުކުރުމަށް އެންމެ ރަނގަޅު އެއް ނިންމުމަކަށް ވާނީ ވެރިކަމުގެ ދައުރު ދަންމާލުންކަމަށް ދެކެވަޑައިގަންނަވާކަމަށެވެ.

ފަތުރުވެރިކަމުގެ ގިނަ ވިޔަފާރިތަކެއްގެ ހިއްސާދާރު އަދި ބޭރުފައިސާއިން އެންމެގިނައިން ޓެކްސް ދައްކަވާ އެއްކުންފުނީގެ ހިއްސާދާރު އުއްޗު ވިދާޅުވީ، މުޅި ދުނިޔޭގެ ނިސްބަތަށް ބެލިނަމަވެސް ދިވެހިރާއްޖެއަކީ އެންމެގިނައިން އިގްތިސާދަށް ޑޮލަރު ވަންނަ އެއް ޤައުމުކަމަށެވެ. އެގޮތުން ވާރޭ ވެހޭހެން ރާއްޖެއަށް ޑޮލަރު ލިބޭކަން އުއްޗު ވިދާޅުވިއެވެ.

ދިވެހިރާއްޖެ އަކީ ހަމަ ޑޮލަރު، ވާރޭ ވެހޭހެން ވެހޭ ގައުމެއް. މުޅި ދުނިޔޭގެ ނިސްބަތުންވެސް. އެކަން އެންމެން ގަބޫލުކުރަން ޖެހޭނެ

ޗަމްޕާ މުހައްމަދު މޫސާ، އުއްޗު ވިދާޅުވިއެވެ

ޑޮލަރު ލިބުން ދަތިވާ މައްސަލާގައި އުއްޗު ވަނީ އޭނާ ދެކެވަޑައިގަންނަވާގޮތް ވަރަށް ސާފުކޮށް ވިދާޅުވެ ދެއްވާފައެވެ. އެންމެބޮޑު އެއް ސަބަބެއްގެ ގޮތުގައި ވިދާޅުވީ ވަކިވަކި ރަށްތަކެއްގެ ގޮތުގައި އޮތްނަމަވެސް އަދި ކިތަންމެ މީސްކޮޅު މަދުނަމަވެސް ރާއްޖެއަކީ ނިސްބަތުން ބޮޑު ތަނެއްކަމަށެވެ. އުއްޗު ވިދާޅުވީ 200 ވަރަކަށް ރަށުގައި މީހުން ދިރިއުޅޭއިރު، އެ ހުރިހާ ތަނަކަށް ބޭނުންވާ ކަންކަން ސަރުކާރުން ކޮށްދޭންޖެހޭ ކަމަށާއި، ރާއްޖެ އުފެދިފައިވާގޮތުން ކަންކަން ކޮށްދިނުމަށް ބޮޑެތި ހަރަދުތަކެއް ހިނގާކަމަށެވެ.

އެކަންކަން ކޮށްދެނީ ވެރިކަމަށް އަންނަ މީހާގެ ޖީބުން ނޫންކަމަށާއި އެ ހުރިހާ ހަރަދެއް ކުރަނީ ރައްޔިތުން ދައުލަތުގެ ބައިތުލްމާލަށް ދޭ ފައިސާއިންކަމަށް ވާއިރު، އެފައިސާއިން ނުވާ ކަންކަން ކުރަންޖެހެނީ ލޯނު ނަގައިގެންކަން އުއްޗު ވިދާޅުވިއެވެ.

ރާއްޖެ އުފެދިފައިވާ ގޮތުންނާއި ތަރައްޤީ އާއި އެނޫންވެސް ކަންކަން ކުރުމަށް އެހުންނަ ވެރިއަކަށް ލިބެނީ 5 އަހަރުގެ މުއްދަތެއްކަން ފާހަގަކުރައްވަމުން އުއްޗު ވިދާޅުވީ އެ ހުރިހާ ކަމަކަށް ބަލައި އެ މުއްދަތުގެ ތެރޭގައި ކަންކަން ކުރުމަކީ ވާނޭކަމެއް ނޫންކަމަށެވެ. ދެންޖެހެނީ ތެޅިގަނެގެން ލޯނުތަކާ އެއްޗެހި ނަގައިގެން ކަންކަން ކުރަން ކަމަށާއި ނަތީޖާއަކަށް ވެގެންދަނީ ނަގާ ލޯނާ ނުބައްދަލު ހަރަދުތަކެއް ދައުލަތުގެ ބައިތުލްމާލުން ކުރަންޖެހުންކަމަށް އުއްޗު ފާހަަގަކުރެއްވިއެވެ.

އެގޮތުން ރާއްޖެއިން ބޭރުން ލޯނު ނެގިނަމަވެސް އެއީ ސީދާ ނަގުދު ޑޮލަރުން ރާއްޖެއަށް ލިބޭ ފައިސާ ނޫންކަން ފާހަގަކުރައްވަމުން އުއްޗު ވަނީ އަވައްޓެރި ގައުމުތަކުން ދޭ އެފަދަ ލޯނު ކޮންމެވެސް މަޝްރޫޢުއަކަށް މަތިކޮށް އެޤައުމުގެ މަސައްކަތްތެރިން ރާއްޖެއަށް މަޝްރޫޢުތައް ހިންގުމަށް އައިސް ކުރާ މަސައްކަތްތަކަށް ފައިސާ ދައްކަންޖެހެނީ ޑޮލަރުންކަމަށެވެ. މިއީ ރާއްޖެއަށް ވަންނަ ޑޮލަރުގެ ބޮޑުބައެއް ބޭރުވަމުންދާ ގޮތްކަމަށް އުއްޗު ވިދާޅުވިއެވެ.

މީގެ އިތުރުން މަޝްރޫޢުތައް ހިންގުމަށް އެމީހުން ރާއްޖެ އަންނަނީ ފިލަޔާއި ދަގަނޑާއި ހިލަ އަދި ސިމެންތިފަދަ ތަކެތިވެސް ހިފައިގެންކަން ފާހަގަކުރަމުން އުއްޗު ވިދާޅުވީ، ސަރުކާރުގެ ހެޔޮފުޅުކަމުން އެމީހުންނަށް ކާޑުގެ ބާވަތްތައްވެސް ރާއްޖެއިން ގަންނަން ލިބެނީ ދިވެހި ރައްޔިތުންނަށް ދޭ ސަބްސިޑީގެ އަގުގައިކަމަށެވެ.

އުއްޗު ވިދާޅުވީ ވެރިއަކަށް ހަމަޖެހިލައިގެން ޤައުމު ހިންގޭނީ ވެރިކަމުގެ މުއްދަތި 10 ނުވަތަ 15 އަހަރަށް ދީގެންކަމަށް ގަބޫލުކުރައްވާކަމަށެވެ. އެއީ ރާއްޖެ އޮންނަގޮތުން ވެރިއަކަށް ހުންނަވާ ބޭފުޅަކަށްވެސް މަޝްރޫޢުތައް ކުރިއަށްގެންދެވޭނީ ރަނގަޅު މުއްދަތެއް ލިބިގެންކަމުގައިވާތީކަމަށް އުއްޗު ވިދާޅުވިއެވެ. ވެރިކަމުގެ ދައުރު 5 އަހަރު ކުރުކަން ފާހަގަކުރައްވަމުން އެހާ ކުރު މުއްދަތެއްގައި ގިނަ ކަންކަން ކުރަންޖެހި މެނޭޖްކުރުމަށް އޮންނަ ދަތިތަކުގެ ސަބަބުން ހަރަދުތައް އިންތިހާއަށް މައްޗަށްގޮސް އިތުރު ގޮންޖެހުންތައްވެސް ކުރިމަތިވަމުން އަންނަކަމަށް އުއްޗުގެ ވާހަކާގައި ވަނީ ފާހަގަކުރައްވާފައެވެ.