ދުޅަހެޔޮ ސިއްހަތެއްގައި ހުރުމަށް ކާންވީ ދޮންކެޔޮ

ދޮންކޭލަކީ ރާއްޖެއިން ވަރަށް ފަސޭހައިން ލިބެން ހުންނަ މޭވާއެކެވެ.

އަތޮޅުތެރޭގެ ރަށްތަކުގައި ދޮންކެޔޮ ގަސްތައް ގިނައިން ހައްދާފައި ހުރެއެވެ. ދިވެހިންގެ މެދުގައި ދޮންކޭލުގެ މަގުބޫލުކަން އެންމެ ބޮޑަށް އިތުރުވެގެންދަނީ ރޯދަމަހުއެވެ. ދޮންކޭލަކީ ފަނި ގިރުމުގެ އިތުރުން، އެކި ޒާތްޒާތުގެ ފޮނިކާތަކެތީގެ ރަހައަށް އިތުރު ފުރިހަމަ ކަމެއް ގެނެސްދޭ މޭވާއެކެވެ.

އެނގޭހެއްޔެވެ؟ ދޮންކޭލަކީ ހަމައެކަނި މީރު މޭވާއެއް ނޫނެވެ. އެއީ ފައިދާއިން ފުރިގެންވާ މޭވާއެއްވެސް މެއެވެ. އަގުމާތްވި ކާނާއެކެވެ. ކީރިތި ޤުރުއާނުގައިވެސް ދޮންކޭލުގެ ވާހަކަ ބަޔާންކުރައްވާފައިވެއެވެ. އެގޮތުން ސުވަރުގެއިންވެސް ދޮންކެޔޮ ލިބެން ހުންނާނެ ކަމަށް މާތްﷲ ކީރިތި ޤުރުއާނުގައި ވަނީ ހާމަކޮށްދެއްވާފައެވެ. މި ލިޔުމުގައި މި ހިމަނާލަނީ ދޮންކޭލުން ލިބޭ ބައެއް ފައިދާތަކެވެ.

ދޮންކޭލުގައި ވަރަށް ގިނައިން ދަގަނޑު ހުރެއެވެ. ދަގަނޑަކީ ލޭގެ ރަތް ސެލްގެ ތެރޭގައި ހުންނަ ހިމޮގްލޯބިން އުފެއްދުމަށާއި، އޭގެ މަސައްކަތަށް ވަރަށް ބޭނުންތެރި މާއްދާ އެކެވެ. އެހެންކަމުން ލޭގައި ހިމޮގްލޯބިންގެ މިންވަރު ދަށްވެ، ލޭމަދުވެފައިވާކަމަށް ލެބޯޓްރީ ޓެސްޓްތަކުން ފާހަގަވެއްޖެނަމަ، ވަރަށް ގިނަ ފަހަރު ދޮންކެޔޮ ގިނައިން ބޭނުންކުރުމަށް ޑޮކްޓަރުން އިރުޝާދު ދެއެވެ. މީގެ އިތުރުން ދޮންކޭލުގައި ހިމެނޭ ވިޓަމިން ބީ 6 އަކީ ލޭގެ ދަގަނޑުގެ ބައި ހިމޮގްލޯބިން އުފެއްދުމުގައި އެހީތެރިވުމުގެ އިތުރުން، ހަށިގަނޑަށް ވަންނަ ހަށިގަނޑާއި ބީރައްޓަހި މާއްދާތަކާ ދެކޮޅަށް ހަށިދަމަނަ އުފެއްދުމުގައި ވެސް އެހީތެރިވެދޭ މާއްދާ އެކެވެ.

ދޮންކޭލުގައި ފައިބަރު ހުރުމަކީ ގޮހޮރުގެ ހަރަކާތް ހަމައަކަށް އަޅުވައިދޭ ކަމެކެވެ. ބޭރަށް ހިންގުމަކީ ހަށިގަނޑުގައި ހިމެނޭ ލޮނުގެ ބައި މަދުވެ، އޭގެ ހަމަހަމަކަން ގެއްލޭކަމެކެވެ. ދޮންކޭލުގައި ޕޮޓޭސިއަމް ވަރަށް ގިނައިން ހުރެއެވެ. އެހެންކަމުން ބޭރަށްހިންގުން ޖެހުމުން ދޮންކެޔޮ ބޭނުންކުރުމަށް ޑޮކްޓަރުން އިރުޝާދު ދެއެވެ. ސަބަބަކީ ބޭރަށްހިންގުމުގެ ސަބަބުން އުނިވެގެންދިޔަ، ޕޮޓޭސިއަމްގެ މިންވަރު ހަމައަކަށް އަޅުވާލުމަށް ދޮންކެޔޮ ބޭނުންކުރުން އެހީތެރިވެދޭތީ އެވެ.

ދޮންކެޔޮ ބޭނުންކުރުމަކީ ދުންފަތުގެ އިސްތިއުމާލު ކުރުން ހުއްޓާލުމަށް ވެސް ވާގިވެރިވެދޭ ކަމެކެވެ. ދޮންކޭލުގައި ވިޓަމިން ބީ 6 ، ވިޓަމިން ބީ12 ، މެގްނީޒިއަމް، އަދި ޕޮޓޭސިއަމް ހުރެއެވެ. މިއީ ނިކޮޓީން ބޭނުންކުރަމުންދާ މީހަކު، އެހުއްޓާލުމުން މެދުވެރިވާ އުދަގޫތަކުން ދުރުވެ، އުނދަގޫތައް ކުޑަކުރުމަށް އެހީތެރިވެދޭ މާއްދާ ތަކެކެވެ.

މިދެންނެވި ފައިދާތަކުގެ އިތުރުންވެސް ދޮންކޭލަކީ އެކި ބަލިތަކަށް ހުރި ޝިފާއެކެވެ. އެގޮތުން އާންމު ބަލިތައް ކަމަށްވާ، ހުންފަދަ ބަލިތަކުން ސަލާމަތްވުމަށްވެސް ދޮންކެޔޮ އެހީތެރިވެދެއެވެ..