ޔާމީނާއި އަދީބުގެ ޕާޓީގައި 3،000 މެންބަރުން ހަމައެއް ނުވޭ

ކުރީގެ ރައީސް އަބްދުﷲ ޔާމީންގެ ޕީޕަލްސް ނެޝަނަލް ފްރަންޓް (ޕީއެންއެފް) އާއި ކުރީގެ ނާއިބު ރައީސް އަހްމަދު އަދީބުގެ މޯލްޑިވްސް ތާޑްވޭ ޑިމޮކްރެޓްސް (އެެމްޓީޑީ) ގައި 3,000 މެންބަރުން ހަމަނުވާ ކަމަށް އިލެކްޝަންސް ކޮމިޝަންގެ ހިސާބުތަކުން ދައްކައިފި އެވެ.

ސިޔާސީ ޕާޓީތަކުގެ ގާނޫނުގައި ބުނާ ގޮތުން ސިޔާސީ ޕާޓީއެއް ދެމި އޮތުމަށް 3,000 މެންބަރުން ބޭނުންވެ އެވެ.

ކޮމިޝަނުން މިހާރު ވަނީ ސިޔާސީ ޕާޓީތަކުގައި މެންބަރުން ތިބި އަދަދު ހާމަކޮށްފަ އެވެ. ސިޔާސީ ޕާޓީތަކުގެ ދަފްތަރު ގައި ނުވަ ޕާޓީއެއް އެބަ އޮތެވެ. އޭގެ ތެރެއިން 10,000 މެންބަރުން ހަމަވަނީ ތިން ޕާޓީގަ އެވެ. ދެ ޕާޓީއެއްގައި އެ އަދަދާއި ގާތަށް މެންބަރުން އެބަ ތިއްބެވެ.

ޕާޓީއެއްގައި އެންމެ މަދުން ހަމަވާން ޖެހޭ 3,000 މެންބަރުން ނެތީ ދެ ޕާޓީގައެވެ. އެއީ ޕީއެންއެފާއި އެމްޓީޑީ ގަ އެވެ.

* ޕީޕަލްސް ނޭޝަނަލް ކޮންގްރެސް - 68,968 މެންބަރުން

* ދިވެހިރައްޔިތުންގެ ޑިމޮކްރެޓިކް ޕާޓީ - 43,755 މެންބަރުން

* ޖުމްހޫރީ ޕާޓީ - 13,826 މެންބަރުން

* އަދާލަތު ޕާޓީ - 9,049 މެންބަރުން

* މޯލްޑިވްސް ޑިވެލޮޕްމަންޓޔް އެލަޔަންސް - 9,210 މެންބަރުން

* މޯލްޑިވްސް ނެޝަނަލް ޕާޓީ - 6,050 މެންބަރުން

* ދަ ޑިމޮކްރެޓްސް - 3,667 މެންބަރުން

* މޯލްޑިވްސް ތާޑްވޭ ޑިމޮކްރެޓްސް - 2,350 މެންބަރުން

* ޕީޕަލްސް ނެޝަނަލް ފްރަންޓް - 2,822 މެންބަރުން

ޕާޓީއެއްގައި އެންމެ މަދުން ހަމަވާން ޖެހޭ 3,000 މެންބަރުން ނެތް ނަމަ އެ އަދަދު ހަމަކުރަން ތިން މަސް ދުވަހުގެ މުއްދަތެއް ދޭން ޖެހެ އެވެ. އެ މުއްދަތުގަައި ހަމަނުވެއްޖެނަމަ އެ ޕާޓީއެއް އުވާލުމުގެ މަރުހަލާ ފަށާނެ އެވެ.

މި ދެ ޕާޓީއަށް މެންބަރުން ހަމަކުރުމުގެ ނޯޓިސް ދިނުމާއި ގުޅޭގޮތުން އިލެކްޝަންސް ކޮމިޝަނުން އަދި އެއްޗެއް ނުބުނެ އެވެ.