ވިޔަފާރިވެރިން ބޭނުނުންވާ މިންވަރަށް އެސްޓީއޯއިން ކާށި އެތެރެކޮށްދެނީ!

ވިޔަފާރިވެރިން ބޭނުންވާ މިންވަރަށް އެސްޓީއޯއިން ކާށި އެތެރެކޮށްދިނުމަށް ނިންމައިފިއެވެ.

ބާޒާރުގައި ކާށީގެ އަގު މައްޗަށް ދިއުމާއި ގުޅިގެން އަގުތައް ތިރިކުރުމަށް އެސްޓީއޯއިން ވަނީ ރާއްޖެއަށް ކާށި އެތެރެކޮށް ވިއްކަން ފަށާފައެވެ. ނަމަވެސް ކާށީގެ އަގުތައް އަދިވެސް ހުރީ ނިސްބަތުން މަތީގައެވެ. މިކަމާ ގުޅޭގޮތުން އެސްޓީއޯއިން ބުނީ، އެސްޓީއޯ މެދުވެރިވެ ރާއްޖޭގެ ބާޒާރަށް ދިމާވެފައިވާ ކާށީގެ ސަޕްލައި ޝޯޓޭޖް ހައްލުކުރުމަށް މަސައްކަތްތައް ކުރަމުންގެންދާކަމަށެވެ.

މިގޮތުން ބާޒާރުގެ އަގުތައް ތިރިކުރުމަށްޓަކައި ވިޔަފާރިވެރިންނަށް ބޭނުންވާ މިންވަރަށް ކާށި އިމްޕޯޓްކޮށްދިނުމަށް ނިންމައި، ކާށީގެ ސްޓޮކް ބުކްކުރުމުގެ ފުރުޞަތު މިހާރު ހޯލްސޭލަރުންނަށް ހުޅުވާލާފައިވާކަމަށް އެސްޓީއޯއިން ބުންޏެވެ. ކާށީގެ އަގު ތިރިކުރުމަށް އެސްޓީއޯއިން ވަނީ ޕީޕަލްސް ޗޮއިސް މެދުވެރިކޮށް ކިލޯއެއް 20 ރުފިޔާގެ ރޭޓުން ސީދާ އާންމުންނަށް ކާށި ވިއްކަން ފަށާފައެވެ. އަދި އުފެދޭ ޑިމާންޑާ އެއްވަރަށް ކާށީގެ އިތުރު ސްޓޮކްތައްވެސް އަންނަނީ ބާޒާރަށް ނެރެމުންނެވެ.

ދަތުރުވެރިންގެ މާރުކޭޓުގައި ކާށީގެ އަގު ހުރިގޮތަށް ބަލާއިރު، މިއަދު 100 ކާށީގެ ބަސްތާއެއް ލިބެންހުރީ 1650 ރުފިޔާއަށެވެ. ބައެއް ގޮޅިތަކުގައި 50 ކާށި 850 އަށް ލިބެން އެބަހުއްޓެވެ. ވަކިން ކާށި ވިއްކާ އަގުތަކަށް ބަލާއިރު ހުނިގަނޑި ތިލައަށް ނުފެތޭ ވަރުގެ ކާއްޓެއް ލިބެންހުރީ 10 ރުފިޔާ އާއި 15 ރުފިޔާ އާ ދެމެދުގެ އަގުތަކެއްގައެވެ. ހެޔޮވަރު ސައިޒެއްގެ ކާއްޓެއްގެ އަގު ލިބެންހުރީ 50 ރުފިޔާ އަށެވެ.

މާލެއަށް ކާށި ގެންނަ ބައެއް ފަރާތްތަކުން ވޮއިސްއާ ވާހަކަދައްކަމުން ބުނީ ބާޒާރުގައި ވިއްކާވަރަށް ކާށި ލިބުމުގައި މިހާވަރަށް ދަތިވަނީ ރާއްޖޭގެ ރުއްތައް މުސްކުޅިވުމުގެ ސަބަބުން މީގެކުރިން ކާށި ލިބޭވަރަށް ކާށި ނުލިބުމެވެ. މީގެ އިތުރުން ރުއް އެރުމުގައި އަގުބޮޑުވުމަކީވެސް އޮތް ކަމެކެވެ.

ރާއްޖޭގައި ރުކުގެ އައު ޖީލެއް ބިނާކުރުމުގެ މަސައްކަތުގެ ދަށުން ދަނޑުވެރިކަމާ ބެހޭ ވުޒާރާއިން އަންނަނީ ރުއް އިންދުމުގެ މަސައްކަތްކުރަމުންނެވެ.