ސިޔާސީ ފިކުރަށް ނުބަލައި އިލްމީ މަސައްކަތްތައް މި ސަރުކާރުން ބަލައިގަންނަކަމަށް ހީކުރިން: ޑރ.ޝަހީމް

މި ސަރުކާރުގެ ފަރާތުން މީހުންގެ ސިޔާސީ ފިކުރަށް ނުބަަލައި، އެމީހުންގެ އިލްމީ މަސައްކަތްތައް ބަަަލައިގަންނާނެކަމަށް ހީކުރެވުނުކަމަށް އިސްލާމިކް ޔުނިވަރސިޓީ އޮފް މޯލްޑިވްސްގެ ކުރީގެ ޗާންސެލަރ ޑރ.މުހައްމަދު ޝަހީމް އަލީ ސަޢީދު ވިދާޅުވެއްޖެެއެވެ.

އެބޭފުޅާ މިހެން ވިދާޅުވީ ކީރިތި ރަސޫލާ މުހައްމަދު ސައްލަﷲ އަލައިހި ވަސައްލަމްގެ ހަޔާތްޕުޅުގެ މައްޗަށް ބިނާކޮށް ހުށައަޅުއްްވައިދެއްވި ރަހުމަތުގެ ނަބިއްޔާ ޕްރޮގްރާމް، މިފަހަރު ޕީއެސްއެމްގެ ޓީވީއެމްއިން ނުގެެނެސްދޭނެކަން ހާމަކުރައްވާ ނެރުއްވި ފޭސްބުކް ސްޓޭޓަސްއެއްގައެވެ.

ޑރ.ޝަހީމް ވިދާޅުވީ މިޕްރޮގްރާމަކީ އެބޭފުޅާ ވަރަށް ބުރަަ މަސައްކަތްތަކެއް ކުރައްވައިގެން އުފެއްދެވި، ހުރިހާ އުމުރަކާއިވެސް ގުޅޭ ޕްރޮގްރާމެއް ކަމަށާއި އެޕްރޮގްރާމްގެ ފުރުސަތު ދެއްވީތީ ޕީއެސްއެމްގެ އޭރުގެ ޓީމަށް ޝުކުރު ދަންނަވާ ކަމަށެވެ.

އެބޭފުޅާ ވިދާޅުވީ ސިޔާސީ ކަމެއްގައި ބައިވެރިވެފައި ހުރުމުން އެ ޕްރޮގްރާމް ނުގެނައުމަކީ އުޒުރަކަށް ވެދާނެކަމަށެވެ. ޑރ.ޝަހީމް ވަނީ އެ އުުޒުރަށް އިހުތިރާމްކުރައްވާ ކަމަށާއި އެކަމާއި މެދު އެއްވެސް ހިތްބުރަކަމެއް ނެތްކަމަށް ފާހަގަކުރައްވާފައެވެ.

"އެކަމަކު އަޅުގަނޑު ކުރިން ހީކުރީ އެމީހެއްގެ ސިޔާސީ ފިކުރަށް ނުބަލައި، އިލްމީ މަސައްކަތް މި ސަރުކާރުންވެސް ބަލައިގަންނަ ކަމަށެވެ"، ޝަހީމް ވިދާޅުވިއެވެ.

މި ސްޓޭޓަސް ނިންމާލައްވަމުން ޑރ.ޝަހީމް ވަނީ ފޭސްބުކް މެދުވެރިކޮށް މި ރޯދަމަހު ދީނީ ޕްރޮގްރާމެއް ގެންނަވާނެކަން އިއުލާންކުރައްވާފައެވެ.