ޗައިނާގެ ކުންފުނިން ހިންގާ ބަަނދަރުގެ އެއްބަސްވުން ބަދަލެއް ނުކުރާނަން: ލަންކާ
ޗައިނާގެ އެގްޒިމް ބޭންކްގެ ލޯނެއްގެ ދަށުން އަވައްޓެރި ސްރީލަންކާގެ ހަމްބަންޓޯޓާ އަވަށުގައި ތަރައްގީކުރި ބަނދަރުގެ އެއްބަސްވުން ބަަދަލުކުރުމަށް މަސައްކަތް ނުކުރާނެކަމަށް އެގައުމުން ބުނެފިއެވެ.
ސްރީލަންކާގެ ފަރާތުން މިކަން ހާމަކޮށްފައިވަނީ މިދިޔަ ބުރާސްފަތި ދުވަހު އެގައުމުގެ ރައީސް ގޯޓާބަޔަ ރާޖަޕަކްސަ، ބޭރުގައުމުތަކުގެ މީޑިޔާތަކުގެ ފަރާތްތަކާއި ބައްދަލުކުރައްވައި ވާހަކަފުޅު ދައްކަވަމުންނެވެ.
ހަމްބަންޓޯޓާގެ ބަނދަރު ހިންގުމަށް ދިޔަ ޚަރަދު ބޮޑުވެ، ޗައިނާގެ އެގްޒިމް ބޭންކުން ނެގި ލޯނު އަނބުރާ ދެއްކުމަށް ދަތިތަކަކާއި ކުރިމަތިވެދާނެކަމަށް ބުނެ، 2016ވަނަ އަހަރުގައި ލަންކާގެ ސަރުކާރުން ވަނީ އެ ބަނދަރު ހިންގުމުގެ 70ޕަސެންޓް ހިއްސާ ޗައިނާ ސަރުކާރުގެ ހިއްސާ އޮންނަ ކުންފުންޏަކަށް ދިނުމަށް ނިންމާފައެވެ. މި އެއްބަސްވުމުގެ ދަށުން އެކުންފުނީގެ ފަރާތުން އެ ބަނދަރުގެ ތަރައްގީއަށް ޕަބްލިކް-ޕްރައިވެޓް ޕާޓްނާރޝިޕްގެ އުސޫލުން އެއް ބިލިޔަނަށްވުރެ ގިނަ ޑޮލަރު ޚަރަދުކުރުމަށްވަނީ ނިންމާފައެވެ.
ނަމަވެސް ފާހަގަކޮށްލެވޭ ގޮތުގައި ޗައިނާގެ ކުންފުންޏަށް ލިބޭ ހިއްސާގެ ތެރެއިން 20އިންސައްތަ ހިއްސާ، ދިހަ އަހަރުގެ ތެރޭގައި ސްރީލަންކާގެ ކުންފުންޏަކަށް ބަދަލުކުރަންޖެހެއެވެ. މި މުއާމަލާތް ހިންގާފައިވަނީ ޑެބްޓް ފޯ އިކުއިޓީ ސްވެޕް އުސޫލުގެ ދަށުންނެވެ.
އިއްޔެގެ ބައްދަލުވުމުގައި ވާހަކަފުޅު ދައްކަވަމުން ރައީސް ގޯޓާބަޔަ ވިދާޅުވީ މި މަޝްރޫއުގެ ވިޔަފާރީގެ އެއްބަސްވުމުގައި ސޮއިކުރެވިފައިވާތީ އެ އެއްބަސްވުން އަލުން މުރާޖައާނުކުރާނެ ކަމަށެވެ. ނަަމަވެސް އެ ބަނދަރުގެ ސަލާމަތީ ކަންކަން އޮތީ ސްރީލަންކާގެ ކަމާއިބެހޭ އިދާރާތަކުގެ ދަށުގައިތޯ ބައްލަވާނެކަމަށް ގޯޓާބަޔަ ވިދާޅުވިއެވެ.
މި ބަނދަރުގެ ސަލާމަތީ ކަންކަމުގެ ބާރު އޮންނަންވާނީ ސްރީލަންކާގެ އަތުގައިކަމަށް ޗައިނާއިންވެސް އެއްބަސްވާކަމަށް ރައީސް ގޯޓާބަޔަ ރާޖަޕަކްސަ ވަނީ ވިދާޅުވެފައެވެ.
އެބޭފުޅާ އިތުރަށް ވިދާޅުވީ އެ ބަނދަރުގެ ހިންގުން 99އަހަރަށް ކުއްޔަށްދީފައިވާ އެއްބަސްވުން މުރާޖައާ ނުކުރައްވާނެކަމަށާއި، އެއީ ވިޔަފާރީގެ މުއާމަލާތެއްކަމަށެވެ. އަދި އެގޮތަށް އަމަލުކުރަން ބޭނުންފުޅުވެ ވަޑައިނުގަންނަވަނީ އާ ސަރުކާރެއް އަންނަ ކޮންމެ ފަހަރަކު ވިޔަފާރީގެ އެއްބަސްވުންތައް ބަދަލުނުވާނެކަން ދެއްކުމުގެ މަގުސަދުގައިކަމަށް ލަންކާގެ ރައީސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
