އެމްޑީއެންގެ މައްސަލައިގައި ހުކުރަށްފަހު ދުއާކޮށްފި

މޯލްޑިވްސް ޑިމޮކްރަސީ ނެޓްވޯކުން ނެރުނު ރިޕޯޓާއި ގުޅިގެން މިއަދުގެ ހުކުރު ނަމާދަށްފަހު އިސްލާމީ މަރުކަޒު ސަރަހައްދުގައި ދުއާކޮށްފިއެވެ.

މި ދުއާކުރުމުގައި އިސްކޮށް ހުންނެވީ އަބްދުﷲ މުހައްމަދު (މަދަނީ އަބްދުﷲ) އެވެ.

މި ދުއާގެ ބައިވެރިން ވަނީ ދިވެހިރާއްޖޭގައި ލާދީނީ ފިކުރުތައް ފަތުރަން ކުރަމުންދާ މަސައްކަތްތައް ނާކާމިޔާބުކުރެއްވުމަށް އެދި ދުއާދަންނަވާފައެވެ. އަދި އިސްލާމްދީނާއި ކީރިތި ރަސޫލާ އަށް މަލާމަތާއި ފުރައްސާރަކޮށް، ހަޖޫޖަހާ މީހުން ބަލިކަށި ކުރައްވާ ފަޟީހަތް ކުރެއްވުމަށްވެސް ވަނީ އެދިފައެވެ.

މީގެ އިތުރުން އެފަރާތްތަކުން ވަނީ ދީނަށް ފުރައްސާރަކޮށް ހަޖޫޖެހުމުގައި އެހީތެރިވާ މީހުން ނިކަމެތި ކުރެއްވުމަށާއި އަދި އެމީހުންނަކީ ގައުމުގެ ވެރިން ކަމުގައި ވާނަމަ، އެމީހުންނަށް ތެދުމަގު ދެއްކެވުމަށް އެދި ދުއާކޮށްފައެވެ.

ފާހަގަކޮށްލެވޭ ގޮތުގައި އެމްޑީއެންއިން ނެރުނު ރިޕޯޓްގައި އިސްލާމްދީނާއި ކީރިތި ރަސޫލާއަށް ފުރައްސާރަކޮށްފައިވާ ކަމަށްބުނެ އެ ޖަމްއިއްޔާއާއި ދެކޮޅަށް ފިޔަވަޅު އެޅުމަށް ގިނަ އަދަދެއްގެ އާންމުންނާއި ކައުންސިލްތަކުން ވަނީ އެދިފައެވެ.

ރޭ ފުލުހުން ނެރުނު ބަޔާނެއްގައިވެސް ވަނީ އެމްޑީއެންއިން އިސްލާމްދީނަށް ފުރައްސާރަކޮށްފައިވާކަމަށް ނިންމާފައިވާކަމަށްވެސް ބުނެފައެެވެ.

ފޮޓޯ: ދަ ޕްރެސް