މިނިވަންކަމުގެ އިހުސާސް ހީނަރުވާން ފެށީ އެމްޑީޕީގެ ވެރިކަންތަކުގެ ސަބަބުން: ރައީސް ޔާމީން
ރާއްޖެއަށް ފުރިހަމަ މިނިވަންކަން ލިބިފައިވާކަމުގެ އިހުސާސް ހީނަރުވާން ފެށީ އެމްޑީޕީގެ ވެރިކަންތަކުގެ ސަަބަބުންކަމަށް ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި ސަންގު ޓީވީއަށް ދެއްވި ހާއްސަ ބަސްދީގަތުމެއްގައި ރައީސް ޔާމީނު ވިދާޅުވީ މިނިވަންކަމުގެ އިހުސާސަކީ ދެ ފަންތިއެއްގައި އޮންނަ އިހުސާސެއްކަމަށާއި، އެއީ ގައުމެއްގެ ފެންވަރުގައި މިނިވަންކަމުގެ އިހުސާސް ކުރެވުމާއި، ވަކިވަކި ފަރުދުންގެ ފެންވަރުގައި ރައްޔިތުންނަށް މިނިވަންކަމުގެ އިހުސާސްކުރެވުން ކަމަށެވެ.
މިނިވަންކަމަށް ފަސްދޮޅަސް އަހަރު ފުރޭއިރު ރައްޔިތުން ތިބީ ވަރަށް ދަތި ހާލުގައިކަން ފާހަގަކުރައްވަމުން ފަރުދުންގެ ފެންވަރުގައި މިނިވަންކަމުގެ އުފާވެރިކަމުގެ އިހުސާސް އޮތްކަމށް ދެކެވަޑައިނުގަންނަވާ ކަމަށް ވިދާޅުވެ އެމަނިކުފާނުވަނީ ދައުލަތެއްގެ ހައިސިއްޔަތުން ރާއްޖޭގެ މިނިވަންކަން އޮތްކަމާމެދު ސުވާލު އުފައްދަވާފައެވެ.
"އަހަރުމެންނަށް އަހަރުމެންގެ ކަންކަން ނިންމުމުގެ އިހުތިޔާރު އެބައޮތް ހެއްޔޭ. އެއީ ސިޔާސީ މިނިވަންކަން ނުވަތަ ސިޔާސީ އިސްތިލާހުގައި ހަގީގީ މިނިވަންކަން. ދައުލަތެއްގެ ގޮތުގައި މިނިވަންކަން އޮތްކަމަށް ފޮތުގައި ލިޔެވިދާނެ. ނަމަވެސް ދައުޮލަތުގެ މިނިވަންކަން ދަމަހައްޓާނެ އިގުތިސާދީ ފަންވަރު އެބަހުރިހެއްޔޭ، ނުވަތަ ސިޔާސީ ފަންވަރު އެބަހުރި ހެއްޔޭ. ދައުލަތް ތަމްސީލުކުރަން މިނިވަންކަމުގެ ވާހަކަދައްކަން ތިބި މަންދޫބުންގެ ކިހައި އެކަޑެމިކް ފެންވަރު ނުވަތަ ފަންނީ ގާބިލުކަނަް އެބަހުރިހެއްޔޭ؟ މިކަންކަމަށް ބަލާއިރު އަޅުގަނޑަކަށް ގަބޫލެއް ނުކުރެވޭ ދައުލަތެއްގެ ފެންވަރުގައިވެސް މިނިވަންކަން އޮތްކަަމަށް ރައްޔިތުން ގަބޫލުކުރާނެ ކަމުގައި،" އެމަނިކުފާނު ވިދާޅުވިއެވެ.
ރައީސް ޔާމީނު ވިދާޅުވީ ރާއްޖޭގެ ކަނޑުގެ ސަރަހައްދުގެ ބޮޑު ބައެއް ގެއްލިގެން ހޯދުމަށް ކުރެވޭ މަސައްކަތެއް ނެތްކަމަށާއި، ރާއްޖޭގައި އިންޑިޔާގެ ސިފައިން ގާއިމުވެގެން ބަނޑަހަޖަހައިގެން ނެތްކަން ރައްޔިތުންނަށް ގަބޫލުކުރެވޭ ފެންވަރަށް ބުނެނުދެވޭ ކަމަށްވެސް ރައީސް ޔާމީން ވިދާޅުވިއެވެ. އަދި އެހެން ބަޔަކަށް ބަރޯސާނުވެ ރާއްޖޭގެ އިގުތިސާދީ ދުވެލި ހިފަހެއްޓުމުގެ ގާބިލުކަން ނެތްކަމުގައި ދެކެވަޑައިގަންނަވާ ކަމަށްވެސް ވިދާޅުވިއެވެ.
ރާއްޖޭގެ މިނިވަންކަމުގެ 60 އަހަރުގެ ރާސްތާގެ ބޮޑު ބައެއް ފާއިތުވީ މިނިވަންކަމުގެ ފުރިހަމަ އިހުސާސް ރާއްޖެއަށް ކުރެވެމުން ކަމަށާއި، ނަަމަވެސް އެމްޑީޕީގެ ފުރަތަމަ ވެރިކަމުގައި ރާއްޖޭގެ މައި ވައިގެ ބަނދަރު ވިއްކައިލުމާއި އިންޑިޔާ ސިފައިން ރާއްޖެއަށް ގެނައުން ފަދަ ކަންކަމާއެކު ރާއްޖޭގެ މިނިވަންކަމުގެ އިހުސާސް ހީނަރުވި ކަމަށް ޔާމީނު ވިދާޅުވިއެވެ.
ޔާމީނު ވިދާޅުވީ މިނިވަންކަމުގެ އިހުސާސް ބީވެގެންދާން ފެށީ މަޑުމަޑުން ނޫންކަމަށާއި، މިނިވަންކަން ގެއްލޭކަމުގެ އިހުސާސްކުރެވެން ފެށީ އެމްޑީޕީގެ ދެ ވެރިކަމުގައި ރާއްޖޭގެ ވެރިކަމަށް އެރި ލޮޅުންތަކުގެ ސަބަބުންކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
