ސަރުކާރުގެ ކުންފުނިތަކާ ގުޅުންހުރި 896 މައްސަލައެއް ދަނީ ބަލަމުން: އޭސީސީ
ސަރުކާރުގެ ކުންފުނިތަކާ ގުޅުންހުރި 896 މައްސަލައެއް ބަލަމުން އަންނަކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
ރައްޔިތުންގެ މަޖިލީހުގެ އިގުތިސާދީ ކޮމިޓީއަށް ހާޒިރުވެވަޑައިގެން އޭސީސީގެ ރައީސް އާދަމް ޝާމިލް ވިދާޅުވީ އެ ކޮމިޝަނުން ދެ މަރުހަލާއަކަށް ބަހާލައިގެން މައްސަލަތައް ބަލާކަމަށާއި، އެއީ ޕްރިމިލަނީ މަރުހަލާއާއި، ތަހުގީގު ކުރާ މަރުހަލާ ކަމަށެވެ.
ޝާމިލް ވިދާޅުވީ، މިމަރުހަލާތަކުގެ ތެރެއިން ޕްރިމިލަނީ މަރުހަލާގައި ސަރުކާރުގެ ކުންފުނިތަކާ ގުޅުންހުރި 316 މައްސަލައެއް އޮތް ކަމަށާއި ތަހުގީގު ކުރާ މަރުހަލާގައި 580 މައްސަލަ އެބަ އޮތް ކަމަށެވެ.
މިއީ ކަންބޮޑުވާން ޖެހޭ ވަރުގެ އަދަދެއްކަން ފާހަގަކުރައްވާ ޝާމިލް ވިދާޅުވީ، މީގެ ތެރެއިން ފާއިތުވެ ދިޔަ ފަސް އަހަރުގެ ތެރޭގައި، އޭސީސީއަށް ވަރަށް ހައްސާސީ ދެ ވަގުތެއް އައިސްފައިވާ ކަމަށެވެ. އެއީ ނިމިދިޔަ ރިޔާސީ އިންތިޚާބާއި މަޖިލިސް އިންތިޚާބު ބޭއްވުންކަމަށާއި، އެދުވަސްވަރު އެހެން އިންތިހާބުތަކެކޭވެސް އެއްފަދައިން އެ ދުވަސްވަރު އޭސީސީއަށް ވަރަށް ގިނަ މައްސަލަތައް ހުށަހެޅުނު ކަމަށެވެ.
"މިއީ ކަންބޮޑުވާން ޖެހޭ ވަރުގެ އަދަދެއް. މީގެ ތެރެއިން އަދި އަޅުގަނޑު ޚާއްސަކޮށް ފާހަގަކޮށްލަން ފާއިތުވެ މިދިޔަ ފަސް އަހަރު ތެރޭގައި އަޅުގަނޑުމެންނަށް، ވަކިން ޚާއްސަކޮށް އަޅުގަނޑުމެން މި މަސައްކަތާ ހަވާލުވި ފަހުން މި ހޭދަވި ވަގުތުގައި އެބައޮތް ވަރަށް ހައްސާސީ ދެ ވަގުތެއް އައިސްފައި،"
ޝާމިލް ވިދާޅުވިއެވެ.
ޝާމިލް ވިދާޅުވީ، އެދުވަސްވަރު އޭސީސީއަށް ފަސޭހައިން މައްސަލަތައް ހުށަހެޅޭނެ ނިޒާމެއް ގާއިމުކުރުމާއިއެކު، ހުށަހެޅުނު މައްސަލަތައް އިތުރުވި ކަމަށެވެ.
އޭސީސީގެ މައިގަނޑު ދައުރަކީ މައްސަލަތައް ތަހުގީގުކުރުން ކަމަށްވާއިރު، ދައުވާ ކުރާ މައްސަލަތައް ޕްރޮސެކިއުޓާ ޖެނެރަލް (ޕީޖީ) އޮފީހަށް ހުށަހަޅާކަމަށް ވެސް ޝާމިލް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
