ސަރުކާރު މަތިބަރެއް ނޫން؛ ސިޔާސީ މަގާމުތަކުގެ އަދަދު 500 އަށްވެސް ނާރާ: އަބްދުއްރަހީމް
ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ސަރުކާރު މަތިބަރޭކިޔައިގެން ސަރުކާރާއި އިދިކޮޅު ފަރާތްތަކުން ދައްކަމުން އަންނަނީ ހަޤީގަތެއް ނެތް ވާހަކަތަކެއް ކަމަށް ރައީސްގެ ޙާއްސަ މުޝީރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.
އަބުދުއްރަޙީމް މިފަދައިން ވިދާޅުވެފައި ވަނީ ޕީޕީއެމް/ޕީއެންސީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
މިއަދުގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އަދުރޭ ވިދާޅުވީ ރައީސްގެ ވާޖިބުތަކާއި މަސްޢޫލިއްޔަތު އަދާކުރެއްވުމަށް ބޭނުންވެލައްވާ މަޤާމުތަކަށް މީހުން އައްޔަން ކުރުމަކީ ޤާނޫނު އަސާސީގެ 115 ވަނަ މާއްދާގެ (ޅ) ގެ ދަށުން ރައީސް އަށް ލިބިވަޑައިގެންވާ އިޚުތިޔާރެއް ކަމަށާއި އެކަން ކުރައްވަމުން ގެންދަވަނީ ޤާނޫނާއި އެއްގޮތަށް ކަމަށެވެ.
މިއަދުގެ މި ނޫސްވެރިންގެ ބައްދަލުވުމުގައި އަދުރޭ ވަނީ އެމްޑީޕީގެ ބޭފުޅުން ވެރިކަމުގައި ތިއްބަވައިގެން، އަދި މަޖިލީހުގެ ސުޕަ މެޖޯރިޓީ ނަންގަވައިގެން ތިބެ 1،200 އާއި 1،400 އާއި ދެމެދުގެ އަދަދަކަށް މަޤާމުތައް އިތުރު ކޮށްގެން ކުރެއްވީ ކޮން ކަމެއްތޯ ސުވާލުކުރައްވާފައެވެ.
އަދުރޭ ވިދާޅުވީ މި ސަރުކާރުން ރައީސް ޑރ. މުހައްމަދު މުއިއްޒު ވިދާޅުވި ފަދައިން ސިޔާސީ ވަޒީފާތައް 700 އަށް ވުރެ އިތުރު ނުކުރާނެ ކަމަށާއި އަދި މިހާތަނަށް ސިޔާސީ މަޤަމުތަކުގެ އަދަދު 500 އަށްވެސް ނާރާނެކަމަށެވެ.
"އަޅުގަނޑުމެންގެ ރައީސް ވިދާޅުވީ، 700 އަށްވުރެ އިތުރު ނުކުރައްވާނެ ކަމަށް. އަދި މިހާތަނަށް އައިއިރު އެހިސާބާއި ކައިރިވެސް ނުވޭ. އެ ބޭކާރު ވާހަކަ އެ ދައްކަނީ." މިއަދުގެ ބައްދަލުވުމުގައި އަދުރޭ ވިދާޅުވިއެވެ.
މި ސަރުކާރުން ވަޒީފާތަކަށް އައްޔަންކުރާ ފަރާތްތައް މަޤާމްތަކަށް އައްޔަށް ކުރައްވަނީ އުޅޭނެގޮތަކަށް އުޅެން ދޫކޮށްލަން ނޫންކަމަށާއި، ޑރ. މުހައްމަދު މުއިއްޒު ދިވެހިރައްޔިތުންނަށް ވެ ވަޑައިގެންނެވި ވައުދުތައް ފުރިހަމަ ކުރެއްވުމުގެ މަސައްކަތް ބާރު ސްޕީޑުގައި ކުރިއަށް ގެންދިއުމަށް ކަމަށެވެ.
"ރައީސް ޑރ. މުހައްމަދު މުއިއްޒުގެ މެނިފެސްޓޯ ތަންފީޒު ކުރައްވަން މިއުޅެނީ. އެއްގޮތަކަށް ވެސް ބޭކާރު ކަންކަންކޮށް ވަގުތު ހޭދަ ކުރާކަށް ނޫން. އެހެންކަމުން އިދިކޮޅުން އެ ދައްކަނީ ބޭކާރު ވާހަކައެއް" އަދުރޭ ވިދާޅުވިއެވެ.
އަދުރޭ މިހެން ވިދާޅުވެފައި ވާއިރު މިސަރުކާރުގައި ސްޓޭޓު މިނިސްޓަރުންނާއި، ޑެޕިއުޓީ މިނިސްޓަރުން ގިނަކަމަށް ބުނެ އިދިކޮޅުން އަންނަނީ ސަރުކާރަށް ފާޑުކިޔަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
