"5 މިލިއަން ގަސް" ޕްރޮގްރާމް: އެމްޕީއެލުން 1 މިލިއަން ގަސް އިންދުމުގެ ޕްރޮގްރާމް ފަށައިފި

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފަށާފައިވާ "5 މިލިއަން ގަސް" ޕްރޮގްރާމަށް އެއްބާރުލުން ދިނުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 1 މިލިއަން ގަސް އިންދުމުގެ ޕްރޮގްރާމް ފަށައިފިއެވެ.

މިކަމަށްޓަކައި، މިއަދު ތިލަފުށީގައި ބޭއްވުނު މި ރަސްމިއްޔާތުގައި މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިގެ ވަޒީރު ޠާރިޤް އިބްރާހިމް ބައިވެރިވެވަޑައިގެން ވަނީ ގަސް އިންދަވާދެއްވާފައެވެ.

މިކަމާއި ގުޅޭ ގޮތުން މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިން ބުނީ،  ޕޯޓްސް ލިމިޓެޑުން އިންދާނެ 1 މިލިއަން ގަހަކީ ރާއްޖޭގެ ތިމާވެށި ރައްކާތެރިކުރުމަށް އެޅޭ ވަރަށް މުހިންމު ފިޔަވަޅެއް ކަމަށާއި، މި މަޝްރޫޢުގެ ސަބަބުން ރާއްޖޭގެ ގުދުރަތީ މާޙައުލު ރައްކާތެރިކޮށް ދެމެހެއްޓުމަށް އިތުރު ބާރެއް ލިބިގެންދާނެކަމަށެވެ،

ހަމައެއާއިއެކު އެ ވުޒާރާއިން ބުނީ، ޕޯޓްސް ލިމިޓެޑުގެ ސީއީއޯ ވަޖީހު އާއި މުވައްޒަފުން މި މަޝްރޫޢުގައި ބައިވެރިވުމަށް ނިންމާފައިވާ ނިންމުމަކީ ތިމާވެށި ރައްކާތެރިކުރުމަށް އެ ކުންފުނިން ދޭ އަހައްމިއްޔަތުކަން ދައްކުވައިދޭ ކަމެއްކަމަށާއި، މި މަސައްކަތުގައި އެ ކުންފުނީގެ އިސްވެރިންނާއި މުވައްޒަފުން ދައްކަމުންދާ ޝައުޤުވެރިކަމާއި ފޯރިއަކީ އެހެން ފަރާތްތަކަށްވެސް ނަމޫނާއެއްކަމަށެވެ.

އެކްސްގައި ކުރެއްވި ޕޯސްޓެއްގައި ވަޒީރު ޠާރިގު ވިދާޅުވީ، މި  ޕްރޮގުރާމްގެ ދަށުން މިހާތަނަށް 3.1 މިލިޔަން ގަސް އިންދުމަށް އެކި ފަރާތްތަކުން ޝައުޤުވެރިކަން ފާޅުކޮށްފައިވާކަމަށާއި، މިހާތަނަށް 4 ލައްކައެއްހައި ގަސް އިންދާފައިވާ ކަމަށެވެ.

ހަމައެއާއިއެކު، ކުރިއަށްއޮތް 4 އަހަރުގެ ތެރޭގައި 5 މިލިޔަނަށްވުރެ ގިނަ ގަސް އިންދޭނެކަމަށް އުއްމީދުކުރައްވާކަމަށް ވެސް ވަޒީރު ވިދާޅުވިއެވެ.