ލާމަރުކަޒީ ގާނޫނަށް ވަރަށް އަވަހަށް އިސްލާހު ހުށަހަޅާނަން- ރައީސް ސާލިހު
ލާމަރުކަޒީ ގާނޫނަށް އިސްލާހުތައް ގެނައުމަށްފަހު ވަރަށް އަވަހަށް މަޖިލީހަށް ހުށަހަޅުއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
އެމްޑީޕީގެ ޕްރަމަރީ ކާމިޔާބްކުރި ފަރާތްތަކަށް ޓިކެޓް ހަވާލުކުރުމަށް ބޭއްވި އެޖެންޑާ ނަވާރަ ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ސަރުކާރުން އެންމެ މުހިންމު މަސައްކަތެއްގެ ގޮތުގައި މިހާރު ކުރަމުން އަންނަ މަސައްކަތަކީ ލާމަރުކަޒީ ގާނޫނު އިސްލާހު ކުރުމުގެ މަސައްކަތް ކަމަށާއި އެކަމަކީ ވަކިން ޚާއްސަކޮށް އެމްޑީޕީގެ ވިސްނުމެއް ކަމަށްފާހަގަކުރައްވާ ރައީސް ވިދާޅުވީ އެމަނިކުފާނު އެންމެ ދެކެން ބޭނުންވާ ދުވަހަކީ ރާއްޖޭގެ ވެރިކަމުގެ ނިޒާމް ފައްކާވެގެން އަންނަ އިރު ރާއްޖޭގެ ރަށުކައުންސިލް ތަކަށް ބާރުތައް ދެވި މާލީގޮތުންވެސް ކައުންސިލްތައް ބާރުވެރިވެގެން ދިއުން ކަމަށެވެ. އަދި ބޭނުންވާ މުހިއްމު އިސްލާހުތަކާއިއެކު ވަރަށް އަވަހަށް ލާމަރުކަޒީ ނިޒާމަ އިސްލާހުގެނައުމަށް މަޖިލީހަށް ހުށަހަޅުއްވާނެ ކަމަށް ރައީސް ފާހަގަކުރެއްވިއެވެ. އަދި އެމަނިކުފާނު ވެވަޑައިގެންނެވި ވައުދުތަކުގެ ގާނޫނީ އޮނިގަނޑު ނިންމާނީ ރައްޔިތުންގެ މަޖިލީހުން ކަމަށާއި، އަދި ވެރިކަމަށް އަންނަ ވެވަޑައިގެންނެވި ވައުދުތައް އެންމެ ފުރިހަމަ ގޮތުގައި ފުއްދައިދެވޭނީ މަޖިލީހުގެ ތާއީދާއި އެކުގައި ކަމަށްވެސް ރައީސް ފާހަގަކުރެއްވިއެވެ. ސަރުކާރުގެ މެޖޯރިޓީ މަޖިލީހުގައި އޮތުމަކީ މުހިންމު ކަމެއް ކަމަށާއި، އަދި މަޖިލީހުގައި އެންމެ މުހިންމު ދައުރެއް އަދާކުރެވޭނީ އެމްޑީޕީއަށް ކަމަށް ރައީސް ސޯލިހު ވިދާޅުވިއެވެ.
މީގެ އިތުރުންވެސް ސަރުކާރުން މިހާތަނަށް ކުރައްވާފައިވާ ކަންތައްތަކަށް ރައީސް ވަނީ އަލިއަޅުއްވާލައްވާފައެވެ. އަދި ރައީސްގެ ވާހަކައިގައި އެމްޑީޕީގެ ޕްރައިމަރީގައި ވާދަކުރައްވައިގެން ޓިކެޓް ހޯއްދެވި ހުރިހާ ފަރާތްތަކަށް މަރުހަބާ ވިދާޅުވެފައިވާއިރު، އެމްޑީޕީގެ ޕްރައިމަރީ ކުރިއަށް ގެންދިޔަ ގޮތާއިމެދު ފަހުރުވެރިވާކަމަށްވެސް ރައީސް ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
