ފަތުރުވެރިކަން ޕްރޮމޯޓްކުރުމަށް އަންނަ އަހަރު ޑިޖިޓަލް ކެމްޕެއިންތައް އިތުރުކުރަނީ

ފަތުރުވެރިކަން ޕްރޮމޯޓްކުރުމަށް އަންނަ އަހަރު ޑިޖިޓަލް ކެމްޕެއިންތައް އިތުރުކުރަން ނިންމާފައިވާކަމަށް މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރުސީ) އިން ބުނެފިއެވެ.

އެމްއެމްޕީއާރުސީން ބޭއްވި ނޫސްވެރިންގެ ބައްދަލުވުމެއްގައި އެ ކުންފުނިން ބުނީ، މިއަހަރު ހާސިލްކުރަން ކަނޑައެޅި އަމާޒުތައް ހާސިލްކުރެވިފައިވާކަމަށާއި، ކުރިއަށް އޮތް އަހަރު ރާއްޖެ ޕްރޮމޯޓް ކުރުމުގެ މަސައްކަތް އިތުރަށް ހަރުދަނާ ކުރުމަށް ގިނަ ކަންތައްތަކެއް ރޭވިފައިވާކަމަށެވެ.

މިގޮތުން، އެމްއެމްޕީއާރުސީގެ ޗެއަރޕާސަން އަބްދުﷲ ގިޔާސް ވިދާޅުވީ، ކޮންމެ އަހަރަކުވެސް އެ ކުންފުނީގެ 80 އިންސައްތަ ބޭނުން ކުރެވެނީ ޓްރެވެލް ޓްރޭޑް ފެއަރތަކަށްކަމަށެވެ.

އެހެންނަމަވެސް އަންނަ އަހަރު ބޮޑަށް އިސްކަން ދޭނީ ޑިޖިޓަލީ ޑްރިވެން ކެމްޕެއިންތަކަކަށްކަން ފާހަގަކުރައްވާ ގިޔާސް ވިދާޅުވީ، އޭގެ ތެރޭގައި އިންޓަނޭޝަނަލް އެއަރލައިންތަކާއި ބްރޭންޑްސް ތަކާއި ގުޅިގެންނާއި، އެޑްވަޓައިޒިން ވައިރަލް ކެމްޕެއިންސް ވެސް ހިމެނޭކަމަށެވެ.

"މީގެ ކުރިން އަޅުގަނޑުމެން ފާހަގަކޮށްފައިވާނެ، ކޮންމެ އަހަރަކުވެސް އަޅުގަނޑުމެންގެ ވަސީލަތްތަކުގެ 80 އިންސައްތަ މި ބޭނުންކުރެވޭނީ ޓްރެވެލް ޓްރޭޑް ފެއަރތަކަށް. މިއަންނަ އަހަރު އަޅުގަނޑުމެން ބޮޑަށް އިސްކަން މިދަނީ ޑިޖިޓަލީ ޑްރިވެން ކެމްޕެއިންތަކަކަށް. އެޑްވަޓައިޒިން ވައިރަލް ކެމްޕެއިންސް، ބީ ޓު ސީ ނެޓްވޯކިން އިވެންޓްސް އިންޓަނޭޝަނަލް އެއަރލައިންތަކާއި ބްރޭންޑްސް ތަކާއި ކޮލާބޮރޭޓް ވެގެން،"

ގިޔާސް ވިދާޅުވިއެވެ.

ގިޔާސް އިތުރަށް ވިދާޅުވީ، ޑަބްލިއުޓީއެމްއާއި އެހެނިހެން ފެއަރތަކަށް ކުރާ ހަރަދު ކުޑަކޮށްފައިވާކަމަށާއި، ޑަބްލިއުޓީއެމްއަށް އެކަނި ބަލާލިކަމުގައިވިއަސް 3.5 މިލިއަން ރުފިޔާ ސަލާމަތްކޮށްފައިވާކަމަށެވެ.

މިއަންނަ އަހަރަށް ބަލާއިރު، 50 އިންސައްތަ ޓްރޭޑް ޝޯތަކަށް ދާ ޚަރަދުތައް ދެނީ އެކި އެންޖީއޯތަކުންކަމަށާއި، އޭގެ ތެރޭގައި ގެސްޓްހައުސް އެސޯސިއޭޝަން، މަޓާޓޯ، މަޓީ އަދި ލިވަބޯޑު އެސޯސިއޭޝަން ހިމެނޭކަމަށް ގިޔާސް ވިދާޅުވިއެވެ.