އެމްއެންޔޫގެ ދެވަނަ ސެމިސްޓަރަށް ގުޅުނު 1400 ދަރިވަރުންގެ އޮރިއެންޓޭޝަން ބާއްވައިފި
ލިޔުންތެރިޔާ
ސްޓާފް ރައިޓަރ
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ 2026 ވަނަ އަހަރުގެ ދެވަނަ ސެމިސްޓަރަށް އަލަށް ވެއްދި 1400 ދަރިވަރުންނަށް އަމާޒުކޮށް ޖެނެރަލް އޮރިއެންޓޭޝަން ޕްރޮގްރާމެއް ކާމިޔާބުކަމާ އެކު ކުރިއަށް ގެންގޮސްފިއެވެ.
މި ޕްރޮގްރާމުގެ ފެށުމުގެ ތިން ދުވަހުގައި މައިގަނޑު ގޮތެއްގައި ބާރު އެޅީ ހަމައެކަނި ސަނަދެއް ހޯދުމުގެ ބަދަލުގައި ޢަމަލީ މައިދާނަށް ދަރިވަރުން ތައްޔާރުކުރުމުގެ މައްޗަށެވެ. އެ ދުވަސްތަކުގައި ކުރިއަށް ގެންދިޔަ ސެޝަންތަކުން ފަންނީ ހުނަރު ކުރިއެރުވުމާއި ކިޔެވުމުގެ ހަރުދަނާ އުކުޅުތަކާއި ކުތުބުޚާނާ އާއި ދިރާސާގެ ވަސީލަތްތައް ބޭނުންކުރާނެ ގޮތާއި ޒިންމާދާރު ދަރިވަރަކަށް ވުމުގެ މުހިންމުކަމާ ބެހޭ މަޢުލޫމާތު ފޯރުކޮށްދީފައިވެއެވެ.
ޓްރާންސްޕޭރެންސީ މޯލްޑިވްސްގެ ފަރާތުން ހިންގި ޚާއްޞަ ސެޝަނެއްގައި މަދަނީ ޒިންމާ އާއި ނަޒާހަތްތެރިކަމާ ގުޅޭ ވާހަކަތައް ހިއްސާކޮށް އުޖާލާ މުސްތަޤުބަލެއް ބިނާކުރުމުގައި ޒުވާނުންގެ ދައުރާ މެދު ދަރިވަރުން ހޭލުންތެރިކޮށްފައިވެއެވެ. މި ސެޝަނަކީ މުޖުތަމަޢަށް ފައިދާ ކުރާ ޤާބިލު ދަރިވަރުން ބިނާކުރުމަށް އެ ޔުނިވަރސިޓީން ގެންގުޅޭ ސިޔާސަތުތައް ރަމްޒުކޮށްދޭ ހަރަކާތެކެވެ.
އޮރިއެންޓޭޝަން ހަފުތާގެ ފަހު ދެ ދުވަސް ޚާއްޞަކޮށްފައި އޮތީ ދަރިވަރުން ކިޔަވާ ފެކަލްޓީތަކާއި ކެމްޕަސްތަކަށެވެ. އެ ދުވަސްތަކުގައި މުދައްރިސުންނާ ބައްދަލުކޮށް އެކެޑެމިކް އުޞޫލުތަކާއި ދަރިވަރުންނަށް ލިބެން ހުރި ފުރުޞަތުތަކާ ބެހޭ ތަފްޞީލީ މަޢުލޫމާތު ލިބިގެންދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
