އަނެއްކާވެސް ދޯންޏެއް ފަރަށް އެރުމުގެ ހާދިސާއެއް
ލިޔުންތެރިޔާ
އަބްދުﷲ ހުސައިން
މާލެއިން ފުރައިގެން ތ.އަޮޅު ވޭމަންޑޫއަށް ދަތުރުކުރި ދޯންޏެއް ފަރަށް އަރައިފިއެވެ.
މިފަހަރު ފަރަށް އެރި ދޯންޏަކީ "އަލްމަޖްރާ" ދޯންޏެވެ. މި ހާދިސާއާ ގުޅޭގޮތުން ފުލުހުން އެކްސްގައި ކުރި ޕޯސްޓެއްގައި ބުނެފައިވަނީ، އެ ދޯނި ފަރަށްއެރިކަމުގެ މައުލޫމާތު ލިބުނީ ފަތިހު 5:34 ގައި ކަމަށެވެ. އަލްމަޖްރާ ދޯނި އަރާފައިވަނީ ދިއްގިރި ކައިރި ފަރަށެވެ.
ފުލުހުން ބުނީ ދޯނި ފަރަށް އެރިކަމުގެ މައުލޫމާތު ލިބިގެން ވ. އަތޮޅު ފުލުހުން އެ ސަރަހައްދަށް ދިޔައިރު، އެ ދޯނިން ދަތުރުކުރި 3 މީހުން ހާލުގައި ޖެހި ފަރުމަތީގައި ތިއްބައި ފެނިފައިވާކަމަށެވެ.
އެ މީހުން ފުލުހުންގެ ލޯންޗަށް ނަގައި މިހާރު ފެލިދޫއަށް ގެންގޮސްފައިވާއިރު، ދޯނީގައި ތިބި 3 މީހުންގެ ހާލު ރަނގަޅުކަމަށް ފުލުހުން ވަނީ ބުނެފައެވެ. ދޯނީގައި ތިބީ ބަންގްލަދޭޝްއަށް ނިސްބަތްވާ މީހަކާއި ދެ ދިވެހިންނެވެ. ދޯނި އަޑިއަށް ދިޔައިރު، އެ ދޯނީގައި ގިނަ އަދަދެއްގެ ޕީވީސީ ފިލާ އަދި އެބާވަތުގެ ގިނަ ސާމާނު ހުރިކަމަށް އެމީހުން ވަނީ ބުނެފައެވެ.
އެހެންކަމުން އެ ދޯނީގައި ހުރި ތަކެތި އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށްފުލުހުން ވަނީ އެދިފައެވެ.
މިދުވަސްވަރަކީ މޫސުން ގޯސް ދުވަސްވަރެއްކަމުން ދަތުރަށް ފެށުމުގެ ކުރިން މޫސުމާ ބެހޭ އެންމެފަހުގެ މައުލޫމާތު ހޯދުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
