ގުޅީފަޅުން ގޯތި ލިބުނު މީހުންނަށް ބާއްވާ ގުރުއަތުލުން އަންނަ އަންގާރަ ދުވަހު
ގުޅީފަޅުން ގޯތި ލިބުނު މީހުންނަށް ބިން ލިބޭ ޕްލޮޓް ކަނޑައަޅުމަށް ބާއްވާ ގުރުއަތުލުން އަންނަ އަންގާރަ ދުވަހު އޮންނާނެކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާއިން ހާމަކޮށްފިއެވެ.
ގުޅިފަޅުން ގޯތި ލިބުނު މީހުންނަށް ބިން ލިބޭ ޕްލޮޓް ކަނޑައަޅުމަށް ބާއްވާ ގުރުއަތުލުން، އަންގާރަ ދުވަހު ހެނދުނު 9:00އިން ފެށިގެން ދަރުބާރުގޭ ރަންނަބަނޑޭރި މާލަމުގައި ކުރިއަށްދިޔުމަށް ހަމަޖެހިފައިވާއިރު، ގެދޮރުވެރިކަމާ ބެހޭ ވުޒާރާއިން ބުނީ، ގުރުއަތުލުމުގެ ކަންކަން ބަލަން ވަނުމުގެ އިންތިޒާމް ހަމަޖައްސާފައިވާކަމަށެވެ.
ހަމައެއާއިއެކު، ގުރުއަތުލުން ކުރިއަށްދާ ވަގުތު، ދައުލަތުގެ މީޑިއާ، ޕީއެސްއެމުން ލައިވް ކުރުމަށްވެސް ވަނީ ހަމަޖެހިފައެވެ.
ޖުމްލަ 3520 ގޯތި ގުޅީފަޅުން ދޫކުރާއިރު، ގެދޮރުވެރިކަމާއި ބެހޭ ވުޒާރާއިން ވަނީ އެތަނުން ގޯތި ލިބޭ މީހުންގެ ހުރިހާ ކެޓަގަރީތަކުގެ ލިސްޓްވެސް، ގުރުއަތާއި ގުޅިގެން ގެޒެޓުކޮށްފައިވާ ލިސްޓްގައި ހިމަނާފައެވެ.
ގުޅިފަޅުން ދޫކުރާ ގޯތިތަކަކީ:
1) 1250 އަކަފޫޓުގެ 669 ގޯތި
2) 1650 އަކަފޫޓުގެ 1234 ގޯތި
3) 2050 އަކަފޫޓުގެ 916 ގޯތި
4) 2450 އަކަފޫޓުގެ 473 ގޯތި
5) 2850 އަކަފޫޓުގެ 158 ގޯތި
6) 3250 އަކަފޫޓުގެ 49 ގޯތި
7) 3650 އަކަފޫޓުގެ 21 ގޯތި
ގެދޮރުވެރިކަމާއި ބެހޭ ވުޒާރާއިން ބުނީ، ގުޅީފަޅުގެ ބިން ލިބޭ ފަރާތްތަކުގެ ގުރުއަތުނެގުމުގެ ކަންކަން ކުރިއަށް ގެންދާނީ އެ ވުޒާރާއިން އެކުލަވާލާފައިވާ ލިސްޓުގައިވާ ތަރުތީބުންކަމަށާއި، ބިން ލިބޭ ފަރާތެއްގެ ބަދަލުގައި އެހެން ފަރާތަކުން ޙާޟިރުވާން ބޭނުންނަމަ، ބިން ލިބޭ ފަރާތުގެ އިއުތިރާޒެއްނެތް ކަމުގެ ލިޔުމަކާއި އައިޑީކާޑްގެ ކޮޕީ ގެންނަންޖެހޭނެ ކަމަށެވެ.
ގޯތިލިބޭ ފަރާތްތަކުގެ ގުރުއަތުނަގާ ނިމުމުން، ގޯތިތަކުގެ ރަޖިސްޓްރީއާއި، ބިން ލިބޭ ފަރާތްތަކާއެކުވާ އެއްބަސްވުންތަކާއިގުޅޭ މަޢުލޫމާތު ގެދޮރުވެރިކަމާ ބެހޭ ވުޒާރާއިންއިން ފަހުން ޙިއްސާކުރާ ގޮތަށް ވަނީ ހަމަޖެހިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
