ރާއްޖެއާ ގުޅިގެން ދެ ޤައުމަށްވެސް ފައިދާވާނެ ގިނަ ކަންކަން ކުރެވިދާނެ: ލަންކާގެ ބޮޑުވަޒީރު

ދިވެހިރާއްޖެއާ ސްރީލަންކާ އާ ދެ ޤައުމު ގުޅިގެން ދެ ޤައުމަށް މަންފާވާނޭ ގިނަ ކަންތައްތަކެއް ކުރެވިދާނޭކަމަށް އަވައްތެރި ސްރީލަންކާގެ ބޮޑުވަޒީރު ޑރ.ހަރިނީ އަމަރަސޫރިއާ ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު ސްރީލަންކާއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ބޭއްވިގެންދިޔަ މޯލްޑިވްސް ބިޒްނަސް ފޯރަމްގައި ވާހަކަދައްކަވަމުން ސްރީލަންކާގެ ބޮޑުވަޒީރު ވަނީ ރާއްޖެއާ އޮންނަ ގުޅުމުގެ މައްޗަށް އަލިއަޅުއްވާލައްވައި ވާހަކަދައްކަވާފައެވެ. އަދި ރާއްޖެ އާއި ލަންކާ ގުޅިގެން ވިޔަފާރިއާއި އިގްތިސާދީ ގުޅުން ކުރިއަށް ގެންދިއުމުގެ މުހިންމުކަމާ ގުޅޭގޮތުންވެސް ވަނީ ވާހަކަދައްކަވާފައެވެ.

ދިވެހިރާއްޖެއަކީ މި ސަރަހައްދުގައި ލަންކާގެ އެންމެ ގާތް އަދި ޒަމާންވީ ވިޔަފާރީގެ އެއް ބައިވެރިޔާކަން ފާަހަގަކުރައްވަމުން ބޮޑުވަޒީރު ޑރ.ހަރިނީ ވިދާޅުވީ، ދެ ޤައުމުގެ ގުޅުމަށް އެތައް ސަތޭކަ އަހަރެއް ވެފައިވާއިރު، ދެ ޤައުމުގެ ދެެމދު އޮތް ވިޔަފާރިއާއި އިގްތިސާދީ ގުޅުންތައް މިހާރަށްވުރެ ބޮޑަށް ފުޅާކުރެވިދާނެ ކަމަށެވެ. އެގޮތުން ފަތުރުވެރިކަމަކީ ސްްރީލަންކާ އާއި ދިވެހިރާއްޖޭގެ އިގްތިސާދަށް ވެސް ބޮޑެތި ފައިދާތަކެއް ކުރާ މުހިންމު ސިނާއަތެއް ކަމަށާއި، ރާއްޖޭގެ ދުނިޔެ ގަބޫލުކުރާ ފަތުރުވެރިކަމުގެ ކާމިޔާބީގައި ސްްރީލަންކާގެ ބައެއް ކުންފުނިތަކުން ވެސް  އިންވެސްޓްކޮށްފައިވާކަމަށެވެ. އެގޮތުން އަދިވެސް ފަތުރުވެރިކަމުގެ ސިނާއަތުގައި ދެ ޤައުމު ގުޅިގެން އިތުރަށް  މަސައްކަތް ކުރުމުގެ އަގުހުރި ފުރުސަތުތައް ހުރިކަމަށް ބޮޑުވަޒީރު ވިދާޅުވިއެވެ.

ތަފާސްހިސާބުތަކަށް ބަލާއިރު، 2025 ވަނަ އަހަރު ދެ ގައުމުގެ ދެމެދުގައި ކުރެވުނު 137 މިލިއަން އެމެރިކާ ޑޮލަރުގެ ވިޔަފާރިއަކީ އޭގެ އަސްލު ގާބިލިއްޔަތަށްވުރެ މާ ދަށް އަދަދެއްކަން ފާހަގަކުރައްވަމުން ބޮޑުވަޒީރު ހަރިނީ ވިދާޅުވީ، ދެ ޤައުމުގެ ވިޔަފާރީގެ ގުޅުން ފުޅާކުރުމަށް އަދިވެސް ބައިވަރު ފުރުސަތުތައް އެބަހުރިކަމަށެވެ.

ހާއްސަކޮށް ކާބޯތަކެއްޗާއި މަސްވެރިކަމުގެ އުފެއްދުންތައް ތައްޔާރުކުރުމުގެ ދާއިރާއާއި، ބްލޫ އިކޮނޮމީ އާއި، އަދި އިއާދަކުރަނިވި ހަކަތަ ފަދަ އެތައް ދާއިރާއަކުން ގުޅިގެން މަސައްކަތް ކުރުމުގެ ފުރުސަތު އެބައޮތް. ޖަޒީރާ ގައުމުތަކެއްގެ ގޮތުގައި، އަޅުގަނޑުމެންގެ މުއްސަނދި ކަނޑުގެ ވަސީލަތްތައް ބޭނުންކޮށްގެން، ދެމެހެއްޓެނިވި މަސްވެރިކަމާއި މެރިކަލްޗާ ފަދަ ދާއިރާތަކުން ފަންނީ މައުލޫމާތާއި ތަޖުރިބާ ހިއްސާކޮށްގެން ވަރުގަދަ ބައިވެރިވުންތަކެއް އުފެއްދިދާނެ

ސްރީލަންކާގެ ބޮޑުވަޒީރު ޑރ.ހަރިނީ އަމަރަސޫރިއާ

މި ރަސްމިއްޔާތުގައި ވާހަކަދައްކަވަމުން ބޮޑުވަޒީރު ވަނީ ރާއްޖެއާ ސްރީލަންކާ އާ ދެމެދު އޮންނަ ގުޅުމަކީ ހުރިހާ ގިތަކުން ބެލިނަމަވެސް ނަމޫނާ ގުޅުމެއްކަން ފާހަގަކުރައްވައި ގުޅުން ދެމެހެއްޓުމަށް ރާއްޖެއިން ދެމުންގެންދާ އެއްބާރުލުން ފާހަގަކުރައްވާފައެވެ. އެގޮތުން ރާއްޖެ ފާަހގަކުރެވިފައިވަނީ ސްރީލަންކާގެ ފަންނީ މުވައްޒަފުންގެ މެދުގައި އަގުވަޒަންކުރެވޭ ޤައުމަކަށް ކަން ވަޒީރު ވިދާޅުވިއެވެ. މިހާރުވެސް 20،000 އަށްވުރެ ގިނަ ލަންކާ މީހުން ރާއްޖޭގެ މަސައްކަތްތެރިކަމުގެ ބާޒާރުގައި، ހާއްސަކޮށް ފަތުރުވެރިކަމުގެ ދާއިރާގައި ހަރަކާތްތެރި ވަމުންގެންދާކަމަށް ބޮޑުވަޒީރުގެ ވާހަކަފުޅުގައި ވިދާޅުވިއެވެ. އަދި ލަންކާގެ މަސައްކަތްތެރިންނަށް ރާއްޖެއިން ދޭ އެހީތެރިކަމާއި މެހެމާންދާރީއަށް އަށް އެކަމަނާ ވަނީ ޝުކުރު އަދާކުރައްވާފައެވެ.

މީގެ އިތުރުން އެކަމަނާ ވަނީ މިފަހުން ސްރީލަންކާއަށް ކުރިމަތިވި މޫސުމީ ވިއްސާރާގައި ރާއްޖެއިން ލިބުނު އެހީތެރިކަމުގެ ވާހަކަވެސް ދައްކަވާފައެވެ. އެގޮތުން ދިވެހި ސަރުކާރާއި، ވިޔަފާރިވެރިންނާއި، ރައްޔިތުން ސްްރީލަންކާއާށް ދިން އެހީން ހާމަވީ މިއީ އާދައިގެ އެއްބާރުލުމަކަށްވުރެ ބޮޑު ވަރުގަދަ ރަހުމަތްތެރިކަމެއްގެ ގޮތުގައި ކަމަށެވެ.

މި ރަސްމިއްޔާތުގައި ވާހަކަދައްކަވަމުން ބޮޑުވަޒީރު ހަރިނީ ވަނީ ރާއްޖެއިން ވިޔަފާރިކުރުމުގައި ސްރީލަންކާ ހިޔާރުކޮށް، ދެޤައުމުގެ މެދުގައި ކުރެވޭ ވިޔަފާރީގެ އެކިއެކި މުއާމަލާތްތައް އިތުރުކުރުމަށް އެދިވަޑައިގަންނަވާފައެވެ.