އަލްވަދާޢު: ފިލްމު ބެލި މީހުންގެ ފަރާތުން ތައުރީފް އޮހެނީ

މިއީ ކުރިންވެސް ހީކުރެވުނު ކަމެކެވެ. އޮލިމްޕަހުގައި މިހާރު ދައްކަމުންދާ އަލްވަދާޢުގެ ޕޯސްޓަރު އަދި ޓްރެއިލާ އާއްމުކުރި ހިސާބުން މީހުންގެ ހިޔާލުތައް ފާޅުކުރަން ފެށިއެވެ. އަލްވަދާޢު ވެގެން ދާނީ މިއަހަރުގެ ތެރޭގައި ދިވެހި ސިނަމާއިން ފެނިގެންދާނޭ އެންމެ ތަފާތު ފިލްމަށެވެ. އެކަން ހިނގައިދިޔައީވެސް އެހެންނެވެ.

އޮލިމްޕަހުގައި އަލްވަދާޢު އެޅުވުމަށްފަހު ސޯޝަލް މީޑިއާގައި ފިލްމް ބެލި މީހުންގެ ކޮމެންޓްތަކަށް ބަލާއިރު، މި ފިލްމަކީ ހަމައެކަނި މިއަހަރު ނިކުތް އެންމެ ތަފާތު ފިލްމެއް ނޫނެވެ. ބެލުންތެރިން އަލްވަދާޢު ސިފަކުރީ މިއީ އޮލިމްޕަހުން މިހާތަނަށް ފެނިގެންދިޔަ އެންމެ ތަފާތު އެއް ފިލްމުގެ ގޮތުގައެވެ.

ފިލްމް ބަލާމީހުން ބޭނުންވަނީ ކޮންމެ ފަހަރަކުވެސް ތަފާތު އެއްޗެއް ބަލާލުމަށެވެ. ޑާކްރެއިނުން މިފަހަރުވެސް އެކަން ކޮށްދީފައިވާކަމަށް ފިލްމު ބެލި މީހުން ވަނީ ބުނެފައެވެ. އެގޮތުން ފިލްމްގެ ވާހައިގެ އިތުރުން، ފިލްމުގައި ފެނިގެންދާ އެކްޓަރުންގެ އެކްޓްވެސް އެހާމެ މޮޅުކަމަށް ބެލުންތެރިން ވަނީ ކޮމެންޓްކޮށްފައެވެ. އަދި ފިލްމްގެ ފެންވަރާއި، މިއީ ދެވަނަ ފަހަރަށްވެސް ބަލައި ނުލައި ދޫކޮށް ނުލެވޭނޭ ފިލްމެއްކަމަށްވެސް ފިލްމާ ބެހޭގޮތުން ބައެއް މީހުން ކޮމެންޓް ކުރިއެވެ.

ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް ޑާކްރެއިނުން ތައްޔާރުކުރި މި ފިލްމުގެ ޝޯތަކަށް ބޮޑު ތަރުހީބެއް ލިބެމުންދާއިރު، ބެލުންްތެރިންގެ އެންމެބޮޑު ޝަކުވާއަކަށް ވެފައި އޮންނަނީ ޓިކެޓް ބުކްކުރަން ބަލާއިރު ފުލްވެފައި އޮތުމެވެ  މިކަމާ ގުޅިގެން ޑާކްރެއިނުން ވަނީ އެއްދުވަހެއްގައި ދެ ގަޑިއަށް ފިލްމު ދެއްކުމަށްވެސް މަސައްކަތްކޮށްފައެވެ. ނަމަވެސް އޮލިމްޕަސް ހިންގާ ފަރާތުގެ އިންތިޒާމްތައް ހުރިގޮތުން އެކަންވަނީ ކާމިޔާބުނުވެފައެވެ.

ފިލްމްގެ ޝޯތައް ޑިސެމްބަރުމަހުގެ 20 ވަނަ ދުވަހުގެ ނިޔަލަށް ކުރިއަށްދާއިރު، ޓިކެޓް ގަތުމަށް ބޭނުންނަމަ 9911229 ނަމްބަރަށް ވައިބަރ ކުރުމުން އޮލިމްޕަހަށް ނުގޮސް ޓިކެްޓް ގަނެވޭނޭކަމަށް ޑާކްރެއިނުން ބުނެއެވެ.

"އަލްވަދާއު" މި ފިލްމުގެ ސްކްރީން ޕްލޭ ގެނެސްދީފައިވަނީ ޝަހުދާ މަހްމޫދެވެ. އަލީ ޝިފާއު (ޗިއްޕެ) ޑައިރެކްޓްކުރި މި ފިލްމްގެ މެއިން ކާސްޓުންގެ ގޮތުގައި ފެނިގެންދާނީ މަރިޔަމް މަޖުދާ (މަޖޫ) އާއި ޝަރަފުއްދީން (ޝަރަފް) އެވެ. އަދި ހަމަ އެހެންމެ މި ފިލްމުން ތަޖުރިބާކާރު އެކްޓަރު މުޙައްމަދު ރަޝީދު (ދަރާ ރަޝީދު) އާއި، އަލިފާނުން މުޅިން ތަފާތު ގޮތަކަށް ފެނިގެންދިޔަ ޝީލާ ނަޖީބް ވެސް ފެނިގެންދާނޭކަމަށް ޑާކްރެއިނުން ބުނެއެވެ.