ފްލެޓް ދޫކުރުމުގެ އުސޫލުގައި ހުރި ކަންބޮޑުވުންތަކަށް އެފްޑީސީގެ ބަހެއް އަދިނެތް

ގެދޮރުވެރިޔާ ސްކީމްގައި ހިމެނޭ 4،000 ފްލެޓް ދޫކުރުމުގައި ފަހި ދިރިއުޅުން ކޯޕަރޭޝަން (އެފްޑީސީ) ގެ އުސޫލްތައް ހުރިގޮތުން ފަހި ޔޫނިއަން ޖަމިއްޔާއިން އިއްޔެވަނީ ކަންބޮޑުވުންފާޅުކޮށް ބަޔާނެއް ނެރެފައެވެ. އެ ޖަމިއްޔާއިން މި ބަޔާން ނެރެފައި ވަނީ ފްލެޓްތަކާ ގުޅޭގޮތުން ހުރި ކަންބޮޑުވުންތަކާއި އަދި އެނޫންވެސް ކަންކަމާ ގުޅޭގޮތުން މައުލޫމާތު ހޯދުމަށް އެފްޑީސީގެ އިސްވެރިންނާއެކު އިއްޔެ ބޭއްވި ބައްދަލުވުމަށްފަހުއެވެ.

މި ބަޔާނުގައި ފަހިޔޫނިއަނުން ވަނީ ފްލެޓްތައް ދޫކުރާއިރު މިލްކްކުރެވޭ ގޮތަށް އޮންނަ އުސޫލާއި، ތަޅުދަނޑި ހަވާލުކުރުމާއި، އަދި ޖޫރިމަނާކުރުމުގައި އަމަލުކުރަން ނިންމާފައިވާ އުސޫލާމެދު ކަންބޮޑުވުން ފާޅުކޮށްފައެވެ.

ފަހިދިރިއުޅުން ކޯޕަރޭޝަނުން ދޫކުރާ ފްލެޓްތަކުގެ އެއްބަސްވުން 25 އަހަރަށް ހެދުމަށް ނިންމާފައިވާއިރު، ފްލެޓްތައް މިލްކްކުރެވޭނީ އެ މުއްދަތުގައި ދެއްކުމަށް އޮންނަ ފައިސާ ދައްކައި ހަލާސްކުރުމުންކަމަށް ހައުސިން މިނިސްޓްރީން ވަނީ ކަނޑައަޅާފައެވެ. މިކަމާ ގުޅޭގޮތުން ފަހި ޔޫނިއަނުްނ ބުނެފައިވަނީ ހިޔާ ފްލެޓްތައް ދޫކޮށްފައިވަނީ އެއްބަސްވުމުގައި ސޮއިކުރާ ހިސާބުން މިލްކުވާގޮތަށް ކަމަށާއި، އެ މަޝްރޫޢުގައި ޑައުންޕޭމަންޓް ދައްކަން ނުޖެހި ތަޅުދަނޑިވެސް ހަވާލުކުރިކަމަށެވެ.

ފަހި ޔޫނިއަނުން އެންމެ ކަންބޮޑުވާ ކަމެއްގެ ގޮތުގައި ފާހަގަކުރި އެއްކަމަކީ ކަނޑައެޅިފައިވާ ތާރީހަށް މަހުކުލި ނުދައްކައިފިނަމަ ކުރާ ޖޫރިމަނާއެވެ. އެ ޖަމިއްޔާއިން ވަނީ މަހުގެ 10 އެއްގެ ކުރިން ކުލި ނުދައްކައިފިނަމަ ކުރާ ޖޫރިމަނާ ބޮޑުކަން ފާހަގަކޮށްފައެވެ. އެގޮތުން 7,000 ރުފިޔާ ދައްކަންޖެހޭ ފަރާތްތަކުން، ޖޫރިމަނާގެ ގޮތުގައި 15،000 ރުފިޔާ، އަދި 9،000 ރުފިޔާ ދައްކަންޖެހޭ އެޕާޓްމަންޓްތަކުން ޖޫރިމަނާގެ ގޮތުގައި 25،000 ރުފިޔާގެ އަދަދެއް ދައްކަންޖެހޭކަން އެޖަމިއްޔާގެ ބަޔާނުގައި ވަނީ ފާހަގަކޮށްފައެވެ.

ފަހި ޔޫނިއަނުގެ ބަޔާނުގައި ބުނެފައިވަނީ މިކަންކަމަކީ އެ ފްލެޓްތައް ދޫކުރާނޭކަމަށް ސަރުކާރުން ގެންގުޅުނު އުސޫލްތަކާ ހިލާފްކަމެއްކަމަށާއި، ހިޔާ އަދި ވިނަރެސް ފްލެޓަށް ލުއިދިން ބީދައިން 4،000 ޔުނިޓްތައް ލިބޭ ފަރާތްތަކަށްވެސް ލުއިތައްދޭން ޖެހޭނޭކަމަށެވެ.

ގެދޮރުވެރިޔާ ސްކީމުން ދޫކުރާ ފްލެޓްތައް ދޫކުރުމުގެ އުސޫލްތަކާ ގުޅިގެން ފަހި ޔޫނިއަން ޖަމިއްޔާއިން ކަންބޮޑުވުން ފާޅުކޮށް ބަޔާނެއް ނެރުނު ނަމަވެސް ފަހި ދިރިއުޅުން ކޯޕަރޭޝަން (އެފްޑީސީ) އަދި މިކަމާ ގުޅޭގޮތުން ވަކި އެއްޗެކޭ ބުނެފައެއް ނުވެއެވެ. ނަމަވެސް ވޮއިސްއާ ވާހަކަދައްކަމުން އެފްޑީސީގެ އޮފިޝަލަކު ވަނީ ފަހި ޔޫނިއަންގެ ޖަމިއްޔާގެ ބަޔާނުގައި ބައެއްކަހަލަ އޮޅުންތައް ހިމެނޭކަން ފާހަގަކޮށްފައެވެ. އެގޮތުން އެކަމާ ގުޅޭގޮތުން ހާމަކުރަންޖެހޭ މައުލޫމާތުތައް މިއަދުގެ ވަގުތެއްގައި އާއްމުކުރާނޭކަމަށް ވަނީ މައުލޫމާތު ލިބިފައެވެ.

ސޯޝަލް ހައުސިން ޔުނިޓްތަކަށް ކުލި ނުދެއްކުމަކީ ބޮޑު މައްސަލައެކެވެ. މިކަމުގެ ކަންބޮޑުވުން ބައިނަލްއަޤްވާމީ މާލީ އިދާރާތަކުންވެސް ވަނީ ހާމަކޮށްފައެވެ. އެޗްޑީސީގެ ތަފާސްހިސާބުތަކުން ދައްކާގޮތުގައި ހިޔާ މަޝްރޫޢު އެކަނިންވެސް ކުލީގެ ގޮތުގައި އެޗްޑީސީއަށް ނުދައްކާ 700 މިލިއަނަށްވުރެ ގިނަ ރުފިޔާ އެބައޮތެވެ. މީގެ އިތުރުން ހުޅުމާލޭ ފޭސް އެކެއްގައި ހުރި ފްލެޓްތަކުންވެސް އެޗްޑީސީއަށް 200 މިލިއަނަށްވުރެ ގިނަ ރުފިޔާ ނުލިބި އެބައޮތެވެ.

އެޗްޑީސީގެ ފްލެޓްތަކަށް ކުލި ނުދައްކާ މައްސަލަ ބޮޑުވެފައިވާއިރު، ފްލެޓްތަކަށް ކަސްޓަމަރުން ކުލި ދައްކަމުންދާ ގޮތުގެ މައުލޫމާތު މޯލްޑިވްސް މަނިޓަރީ އޮތޯރިޓީ، އެމްއެމްއޭ ގައި ގާއިމުކޮށްފައިވާ ކްރެޑިޓް އިންފޮމޭޝަން ޔުނިޓާ ހިއްސާކުރަމުންދާކަމަށް އެޗްޑީސީން ވަނީ ހާމަކޮށްފައެވެ. އެޗްޑީސީން ބުނެފައިވަނީ، ކަސްޓަމަރުންގެ ކްރެޑިޓާ ބެހޭ މަޢުލޫމާތު އެމްއެމްއޭ ގައި ގާއިމުކޮށްފައިވާ ކްރެޑިޓް އިންފޮމޭޝަން ސިސްޓަމާ ހިއްސާކޮށްފައިވަނީ އެކުންފުނީގެ ހިންގުން ހަރުދަނާ ކުރުމުގެ ގޮތުން ކަމަށެވެ.

އެމްއެމްއޭގެ ކްރެޑިޓް ލިސްޓްގައި ކުލިނުދައްކާމީހުންގެ ނަންތައް ހިމެނުމުން ކުރިއަށް އޮތްތަނުގައި އެފަދަ ފަރާތްތަކަށް ބޭންކްތަކުން ލޯނު ހޯދުމާއި އެނޫންވެސް މާލީގޮތުން ކުރަންޖެހޭ މުއާމަލާތްތައް ކުރުމުގައި ހުަރަސްތަކެއް ކުރިމަތިވެގެންދާނެއެވެ. މިއީ ދުނިޔޭގެ ކުރިއަރާފައިވާ ޤައުމުތަކުގައި މިހާރުވެސް ކަންކަން ކުރަމުން އަންނަ ގޮތެވެ. ކްރެޑިޓް ހިސްޓްރީ ރަނގަޅު ނޫންނަމަ، ބޭންކްތަކުގެ އިތުރުން ލީސިން ކުންފުނިތަކުން މިހާރުވެސް އެމީހަކަށް ލޯނާއި ކްރެޑިޓް އުސޫލުން ހިދުމަތް ދެމުން ނުދާކަން ފާހަގަކޮށްލެވެއެވެ.