ލޯންޗެއް އެކްސިޑެންޓްވެ ދެމީހަކަށް ބޮޑެތި އަނިޔާތަކެއް؛ ލޯންޗުގެ ކުރީކޮޅު އޮތީ “ފުނޑުފުނޑު ވެފައި“

މާލެ ކައިރީގައި ދަތުރުކުރަމުންދިޔަ ލޯންޗެއް އެކްސިޑެންޓްވެ، އޭގައި ތިބި ދެ މީހަކަށް ބޮޑެތި އަނިޔާތަކެއް ވެއްޖެއެވެ.

މި ހާދިސާ ހިނގާފައިވަނީ ދެ މީހުންނާއެކު ދަތުރުކުރަމުންދިޔަ "ޓުއަރ ގާރޑް" ނަމަކަށް ކިޔާ ލޯންޗެއްގައެވެ.

އެމްއެންޑީއެފުން ބުނިގޮތިގައި، މި ލޯންޗް ދަތުރު ކުރަމުން ދިޔައީ ވިލިގިލިން ގިރިލަންކަންފުއްޓަށް ދިއުމަށެވެ. އަދި ލޯންޗު އެކްސިޑެންޓުވި ކަމުގެ މައުލޫމާތު ލިބިފައި ވަނީ، ލޯންޗް ވިލިގިއްޔާ ވަރަށް ކައިރީގައި އޮއްވައެވެ.

މި ހާދިސާގެ މަޢުލޫމާތު ލިބުމާއެކު، އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަން އިން ވަނީ އެ ސަރަޙައްދަށް ގޮސް އެހީތެރިކަން ފޯރުކޮށްދީފައެވެ.

އެމްއެންޑީއެފުން މައުލޫމާތުދީފައިވާ ގޮތުން މި އެކްސިޑެންޓްގައި ލޯންޗުގައި ތިބި ދެ ފަޅުވެރިންނަށް އެކިވަރުގެ ބޮޑެތި ހާނިކަތަކެއް ލިބިފައިވެއެވެ. އަދި އެމްއެންޑީއެފްގެ އެހީތެރިކަމާއެކު މި ދެ މީހުން މިހާރު ވަނީ މާލެ ގެނެސް، އައިޖީއެމް ހޮސްޕިޓަލުގައި ފަރުވާދޭން ފަށާފައި ކަމަށްވެސް ބުންޏެވެ.

އެމްއެންޑީއެފުން ވަނީ ހާދިސާގައި ގެއްލުންވި ލޯންޗުގެ ފޮޓޯވެސް އާންމުކޮށްފައެވެ. ފޮޓޯއިން ފެންނަ ގޮތުގައި އެ ލޯންޗަށް ވަނީ ވަރަށް ބޮޑެތި ގެއްލުންތަކެއް ވެފައެވެ. އެގޮތުން ލޯންޗުގެ ކުރީބައި އޮތީ ވަރަށް ބޮޑަށް ހަލާކުވެ، ފުނޑުފުނޑުވެފައެވެ.

މި އެކްސިޑެންޓް ހިނގަން މެދުވެރިވި ސީދާ ސަބަބެއް އެމްއެންޑީއެފުން ރަސްމީކޮށް ހާމަކޮށްފައެއް ނުވެއެވެ.

ނަމަވެސް، މަޢުލޫމާތު ލިބިފައިވާ ގޮތުގައި މި ހާދިސާ ހިނގީ ދަތުރުކުރަމުންދިޔަ ދެ ލޯންޗެއް ޖެހިގެންނެވެ. އަދި "ޓުއަރ ގާރޑް" ލޯންޗުގައި ޖެހުނު އަނެއް ލޯންޗު މަޑުނުކޮށް ފިލާފައިވާ ކަމަށްވެސް މަޢުލޫމާތު ލިބެއެވެ.

ލޯންޗު އެކްސިޑެންޓް ވީގޮތް މޯލްޑިވްސް ޕޮލިސް ސާވިސް އިން އަންނަނީ ބަލަމުންނެވެ.