ޒައިދު ނަޝީދަށް: ޕްރިންސް މުހައްމަދު ގައިގައި ބައްދައިގެން އޮތް އިރު އެވަރެއްނެތް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ޔޫއޭއީއަށް ކުރެއްވި ދަތުރުފުޅުގައި، ސައޫދީ އަރަބިއްޔާގެ ވަލީ އަހުދު މުހައްމަދު ބިން ސަލްމާނު އާއި ގާތްގުޅުމެއް ބޭއްވުމަށްފަހު، ސައޫދީ އަރަބިއްޔާއަކީ ހަރުކަށި ފިކުރު އާލާކުރާ ގައުމެއް ކަމަށް ނަޝީދު ވިދާޅުވުމުން، ޝައިހު އަލީ ޒައިދު، ނަޝީދަށް ރައްދުދެއްވައިފިއެވެ.
ރައީސް ނަޝީދު މިފަދައިން ވިދާޅުވި އިރު މިމަހުގެ އެއްވަަނަ ދުވަހު އެމަނިކުފާނާއި ރައީސް ސޯލިހު ޔޫއޭއީ އަށް ކުރެއްވި ދަތުރުފުޅުގައި ސައޫދީ އަރަބިއްޔާގެ ވަލީ އަހުދު މުހައްމަދު ބިން ސަލްމާނު އާ ބައްދަލުކުރައްވައި ދެ ގައުމުގެ ގުޅުން އިތުރަށް ބަދަހި ކުރުމާއި ގުޅޭ ގޮތުން މަޝްވަރާކުރައްވާފައި ވެއެވެ. އަދި އެބައްދަލުވުމުގައި ނަންގަވައިފައިވާ ފޮޓޯތައްވެސް މީސް މީޑިއާގައި ނަޝީދު އާންމުކުރައްވާފައި ވެއެވެ. ފޮޓޯތަކުން ފެންނަ ގޮތުގައި ރައީސް ސޯލިހާއި ރައީސް ނަޝީދުގެ މެދުގައި އެބޭފުޅުން ގައިގައި ބައްދައިގެން ހުންނެވީ ސައޫދީގެ ޕްރިންސް މުހައްމަދެވެ.
ކައުންސިލަރުންނަށް އަމާޒުކޮށްގެން ދެ ދުވަހުގެ މުއްދަތަކަށް ކްރޮސް ރޯޑުގައި އިއްޔެ ކުރިޔަށް ގެންދިޔަ "ވިއަވަތި" މަސާހިންތާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވެފައިވަނީ، ސައުދީ އަރަބިއްޔާގެ އިތުރުން އެހެން ގައުމުތަކުންވެސް ހަރުކަށި ފިކުރު އާލާކުރާ ކަމަށެވެ. އެ ގައުމުތަކުން ދިވެހި ދަރިވަރުން ތައުލީމު އުނގެނިގެން އެނބުރި ގައުމަށް އަންނަނީ ރާއްޖެއަށް ބޭނުންވާ ތައުލީމު އުނގެނިގެންތޯ ބަލަންޖެހޭ ކަމަށެވެ.
ނަޝީދުގެ އެވާހަކަފުޅަށް ރައްދު ދެއްވައި ޝައިހު އަލީ ޒައިދު މިރޭ ކުރެއްވި ޓުވީޓެއްގައި ވިދާޅުވީ، ނަޝީދަކީ ދެ ފުށް ދެގޮތް ބޭފުޅެއް ކަމަށެވެ.
''ސައޫދީ ވަލީ އަހުދު މުހައްމަދު ބިން ސަލްމާން ގައިގައި ބައްދައިގެން، އޮޅުލައިގަނެގެން ހުންނެވި އިރު އެވަރެއް ނެތް. މިހާރު ސައޫދީ އަކީ ޓެރަރިޒަމް ފަތުރާ ތަނެއް. ދެފުށް ދެގޮތްކަން މުޅިން އެހެން ލެވެލްއަކަށް.'' ޝައިހު ޒައިދު ވިދާޅުވިއެވެ.
ޒައިދު ވިދާޅުވީ، ސައޫދީ އަރަބިއްޔާގެ އެއްވެސް ޔުނިވާސިޓީއަކީ ހަރުކަށި ވިސްނުން ކިޔަވައިދޭ ތަންތަން ނޫން ކަމަށެވެ.
ނަޝީދުގެ އެވާހަކަފުޅަށް ޒައިދު ރައްދު ދެއްވި އިރު، އިސްލާމީ ގައުމުތައް ހިމެނޭ އޯއައިސީގެ ސެކްރެޓަރީ ޖެނެރަލްގެ އެޑްވައިޒަރުގެ މަގާމުގައި ހުންނެވި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމުވެސް ވަނީ ނަޝީދުގެ އެވާހަކަތަށް ރައްދު ދެއްވައި އަރަބި ބަހުން ޓުވީޓެއް ކުރައްވައިފައެވެ.
ސައޫދީ އަރަބިއްޔާގައި ވަޒީފާ އަދަކުރައްވަމުން ގެންދަވާ ޝަހީމު ކުރެއްވި ޓުވީޓުގައި ވިދާޅުވެފައިވަނީ، ސައުދީ އަރަބިއްޔާގެ ޔުނިވަސިޓީތަކުން ތައުލީމް ފޯރުކޮށްދޭ ގޮތް އޭނާ އަށް އަމިއްލަފުޅަށް ވެސް ތަޖުރިބާ ކުރެވިފައިވާ ކަމަށެވެ.
ނަޝީދު ކުރެއްވީ އެއްވެސް އަސާސެއް ނެތް ތުހުމަތެއް ކަމަށް ޝަހީމު ވިދާޅުވިއެވެ.
ސައުދީ އަރަބިއްޔާގެ ޔުނިވަސިޓީތަކުން ދަސްވެނިވެފައިވާ ބޭފުޅުން ރާއްޖޭގައި ވެސް އިސް މަގާމުތަކެއް ފުރުއްވާފައިވާ ކަމަށާއި އެބޭފުޅުންނަކީ ދިވެހިންގެ އިހްތިރާމް ލިބިވަޑައިގެން ތިއްބެވި ބޭފުޅުން ކަމަށް ޝަހީމް ވިދާޅުވިއެވެ.
ސައުދީ އަރަބިއްޔާ އަށް ކުދިން ކިޔަވަން ނުފޮނުވަން ނަޝީދު އިންޒާރު ދެއްވާފައި ވާތީ އެކަން އެންމެ ހަރުކަށި އިބާރާތުން ޝަހީމު ވަނީ ކުށްވެރި ކުރައްވައިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
