ގާސިމު މަރާލި މީހާގެ ވަނަވަރު އާންމުވެއްޖެ

އދ. މާމިގިލީ ކަނީރުމާގެ، ގާސިމު ހަސަން 59، މަރާލި މީހާގެ ވަނަވަރު އާންމުވެއްޖެއެވެ.

ގާސިމުގެ ކަރަށް ވަޅި ޖަހައި މަރާލާފައި އޮއްވާ ފެނުނީ މި މަހުގެ ހަތަރު ވަނަ ދުވަހުގެރޭ، ހުޅުމާލޭ ރީތިގަސްމަގުންނެވެ.

ގާސިމް މަރާލި ކަމަށް އިއުތިރާފުވެފައިވާ މީހާގެ ބަންދަށް ފަނަރަ ދުވަސް ޖަހައި، ކްރިމިނަލް ކޯޓުން ނެރުނު އަމުރު މިހާރު ސޯޝަލް މީޑިއާގައި ދަނީ ދައުރުވަމުންނެވެ.

އެއަމުރުގައިވާ ގޮތުން ގާސިމު މަރާލި ކަމަށް އިއުތިރާފުވީ ޅ. ހިންނަވަރު، ބޮޑުހިޔާގެ، އުމުރުން 21 އަހަރުގެ އަދުހަމް މުހައްމަދެވެ.

އައްޑޫ ސިޓީއަށް ނިސްބަތްވި ނަމަވެސް އަދުހަމް ރަޖިސްޓްރީ ކޮށްފައި އޮންނަނީ ޅ.ހިންނަވަރު ބޮޑުހިޔާގޭގައެވެ. މައުލޫމާތު ލިބޭގޮތުގައި އެއީ އޭނާގެ ދޮންބައްޕަގެ ގެއެވެ. އަދުހަމްގެ މަންމަ މިހާރު ކައިވެނިކޮށްގެން އުޅެނީ އެރަށުގެ މީހަކާއެވެ.

ކޯޓު އަމުރުގައި ބުނެފައި ވަނީ، މުއްދަތު މަޖިލީހުގައި ކުށަށް އިއުތިރާފުވެ، ކަން ހިނގި ގޮތް އަދުހަމް ކިޔައިދީފައިވާ ކަމަށެވެ. އަދި އޭނާ ގާސިމް މަރާލި ކަމަށް އިއުތިރާފުގެ ބަޔާން ލިޔެ ސޮއިކޮށްފައިވާ ކަމަށްވެސް އަމުރުގައި ބުނެފައިވެއެވެ.

ބަންދުގައި ބެހެއްޓުމަށް އަމުރުކުރި ސަބަބެއް ކަމަށް އަމުރުގައި ބުނެފައި ވަނީ، މީހަކަށް ވަޅިން ހަމަލާ ދިން ކަމަށް ބަންދާ މެދު ގޮތެއް ނިންމި މަޖިލީހުގައި އިއުތިރާފުވެ، ކަން ހިނގި ގޮތް ކިޔައިދީފައިވުމާއެކު އަނިޔާ ލިބިފައިވާ މީހާ މަރުވެފައިވުމާއެކު ކަމުގެ ބާވަތުން ބަންދުން ދޫކޮށްލައިފިނަމަ މުޖުތަމައުގެ ސަލާމަތާއި އަމަން އަމާން ކަމަށް ބުރޫއަރާފާނެތީއެވެ.

ގާސިމް ހަސަން މަރާލި މައްސަލައިގައި ހައްޔަރުގައި ހުރީ ގާސިމްގެ ގާތިލު ކަމަށާއި އެކަމަށް އިއުތިރާފުވެފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވެސް މިދިޔަ ހުކުރު ދުވަހު ކުރެއްވި ޓުވީޓެއްގައި ވަނީ ވިދާޅުވެފައެވެ.