"ސީޕީ ކަޕް ހޭންޑްބޯޅަ ޓޯނަމެންޓް 2025" ގެ ކުޅުން ފަށައިފި

ޕޮލިސް ކުލަބުގެ ފަރާތުން އިންތިޒާމްކޮށް ކުރިއަށް ގެންދާ "ސީޕީ ކަޕް ހޭންޑްބޯޅަ ޓޯނަމެންޓް 2025" ގެ ކުޅުން މިއަދު ހަވީރު ފަށައިފިއެވެ.

ޕޮލިސް ކުލަބުގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތު ދެއްވިގޮތުގައި މިއީ އެކުލަބުގެ ފަރާތުން އިންތިޒާމްކޮށް މޯލްޑިވްސް ޕޮލިސް ސާވިސްގެ ޑިޕާޓްމަންޓްތަކުގެ މެދުގައި ބާއްވާ ދެވަނަ ހޭންޑްބޯޅަ މުބާރާތެވެ. އެންމެ ފުރަތަމަ 2023 ވަނަ އަހަރު މިމުބާރާތް ބޭއްވީ، އަދި މިދިޔަ އަހަރު ނުބޭއްވި ދިއުމަށްފަހު މިއަހަރު އަލުން މިބާއްވަނީ..

އިތުރަށް ވާހަކަ ދައްކަމުން އޮފިޝަލް ވިދާޅުވީ ފުލުހުންގެ ތެރޭގައި ހޭންބޯޅަ ކުޅެން ޝައުގުވެރިކަން ހުންނަ ހުނަރުވެރި ވަރަށް ގިނަ ބައެއް އެބަތިބިކަމަށާއި، މިފަދަ މުބާރާތެއް ބޭއްވުމުގެ އެންމެ ބޮޑު މަގުސަދަކީ އެފަރާތްތަކަށް ވާދަވެރި މުބާރާތެއްގައި ވާދަކޮށްލުމުގެ ފުރުސަތު ހޯދައިދިނުން ކަމަށެވެ.

2 ފެބުރުއަރީ 2025 އިން 13 ފެބުރުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގައި މިއަހަރު ޖުމްލަ 22 ޓީމަކުން ބައިވެރިވެފައިވާއިރު، އޭގެ ތެރޭގައި ހިމެނެނީ ފިރިހެން 10 ޓީމާއި އަންހެން 12 ޓީމެވެ.

ދެ ޑިވިޝަނަކަށް ބަހާލައިގެން ކުރިއަށް ގެންދާ މިމުބާރާތުގެ އަންހެން ޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިންވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދާ ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

މީގެ އިތުރުން މުބާރާތުގެ ފިރިހެން ޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 10 ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ސެމީފައިނަލުން ފުރުސަތު ލިބިގެންދާނެއެވެ.

މިއަހަރުގެ މުބާރާތުގެ ސްޕޮންސަރުންގެ ގޮތުގައި ޕޮލްކޯ އަދި މެކްސް އައިޓަމް ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.