ފޭސް 3 ކުން ގޯތި ލިބުނު މީހުންނަށް އާ ރަޖިސްޓްރީއެއް ހައްދައިދެނީ

ހުޅުމާލެ ފޭސް ތިނަކުން ގޯތި ލިބުނު މީހުން ރަޖިސްޓްރީ އާކުރަން ފުރުސަތު ދިނުމަށް ނިންމައި ގުޅީފަޅުން ގޯތި ލިބުނު މީހުންނަށްވެސް އިތުރު ފުރުސަތެއް ދިނުމަށް ހައުސިން މިނިސްޓްރީން ނިންމައިފިއެވެ.

މިކަމާ ގުޅޭގޮތުން މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން އާއްމުކުރި އިއުލާނެއްގައި ބުނެފައިވަނީ، ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭންއަށް ގެނެވުނު ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ބަދަލުވެފައިވާކަމަށެވެ.

ތިންވަނަ ފިޔަވަހިން ގޯތި ލިބިފައިވާ ފަރާތްތަކުގެ މެދުގައި ވަނީ މިދިޔަ ޑިސެމްބަރުމަހުގެ 20 ވަނަ ދުވަހު ގުރުއަތުލުން ކުރިއަށް ގެންގޮސްފައެވެ. މިނިސްޓްރީން ބުނީ ގޯތިތައް ކުރިން ހުރިތަނަށް އައި ބަދަލާ ގުޅިގެން، ގޯތި ލިބޭ ފަރާތްތަކަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާޠިލުކޮށް، އައު ބަންޑާރަގޯތީގެ ރަޖިސްޓަރީ ދޫކުރުމަށް ހަމަޖެހިފައިވާކަމަށެވެ.

މިހާތަނަށް ގޯތީގެ ރަޖިސްޓަރީ ޙަވާލުކޮށްފައިނުވާ ފަރާތްތަކަށް ގޯތީގެ ރަޖިސްޓަރީ ހަވާލުކުރުމާއި ގޯތި ޙަވާލުކުރުމުގެ އެއްބަސްވުމުގެ ސޮއިކުރުމަށް ހަމަޖެހިފައިވާއިރު، އިއްޔެއިން ފެށިގެން މާޗްމަހުގެ 15 ވަނަ ދުވަހުގެ ނިޔަލަށް "ހިޔާވެހި ޕޯޓަލް" މެދުވެރިކޮށް "ބަންޑާރަ ގޯތީގެ ރަޖިސްޓްރީ" އާ ޙަވާލުވުމަށް އެޕޮއިންޓްމަންޓްއަށް އެދުމުގެ ފުރުޞަތު ހުޅުވާލާފައިވާކަމަށް މިނިސްޓްރީން ބުނެއެވެ.

އަދި މި މުއްދަތުގެ ތެރޭގައި ގުޅީފަޅުގެ އެއްބަސްވުމުގައި ސޮއިކޮށް ރަޖިސްޓްރީއާ ޙަވާލުވެފައިނުވާ ފަރާތްތަކަށްވެސް އެ މުއްދަތުގެ ތެރޭގައި ބަންޑާރަ ގޯތީގެ ރަޖިސްޓްރީ އާ ހަވާލުވުމަށް އެޕޮއިންޓްމަންޓަށް އެދުމުގެ ފުރުސަތު ލިބިގެންދާނޭކަމަށްވެސް ހައުސިން މިނިސްޓްރީން ބުންޏެވެ.

އެޕޮއިންޓްމަންޓަށް އެދޭއިރު ހުށަހަޅަންޖެހޭ ލިޔެކިއުން:

- ހެކިވެރިއެއްގެ ގޮތުގައި ސޮއިކުރުމަށް ހާޒިރުވާނެ އެކެއްގެ އައިޑީކާޑު

- ގޯތިލިބޭ ފަރާތް ނޫން އެހެން ފަރާތެއް ހާޒިރުވާނަމަ ޕަވާއޮފް އެޓާނީ އާއި އައިޑީކާޑު ކޮޕީ

- މިނިސްޓްރީ އާއި ގޯތި ލިބޭ ފަރާތާ ދެމެދު ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުމުގެ ކޮޕީ

- މިނިސްޓްރީން ގޯތި ލިބޭ ފަރާތަށް ކުރިން ދޫކުރި ބަންޑާރަ ގޯތީގެ ރަޖިސްޓްރީގެ ކޮޕީ

ހުޅުމާލޭ ތިންވަނަ ފިޔަވަހީގައި ހިއްކުމަށް ކަނޑައެޅިފައިވާ 63 ހެކްޓަރުގެ ބިން ހިއްކުމުގެ މަސައްކަތް އެއްކޮށް ނިމިފައިވާއިރު، އެތަނުން 1،351 ގޯތި ދިނުމަށް ވަނީ ނިންމާފައެވެ.

މީގެ އިތުރުން ގުޅީފަޅުން ގޯތި ދިނުމަށް 150 ހެކްޓަރުގެ ބިން ހިއްކާފައިވާއިރު، އެތަނުން 3،520 ގޯތި ދޫކުރުމަށް ނިންމާފައިވާކަމަށް ސަރުކާރުން ވަނީ ބުނެފައެވެ.