ޗުއްޓީއަށް ރާއްޖެއިން ބޭރަށް ދަތުރުކުރާ ދިވެހިންގެ އަދަދު ދަށްވެއްޖެ

އެހެން ފަހަރުތަކާ ހިލާފަށް މިފަހަރުގެ ސްކޫލް ބަންދުގައި ރާއްްްޖެއިންބޭރަށް ދަތުރުކުރާ ދިވެހިންގެ އަަދަދު ނިސްްބަަތުންްްް ދަށަށްގޮސްފައިވާކަމަށް ބައެއް އެއާލައިންތަކުން ބުނެފިއެވެ.

ވޮއިސް އާ މައުލޫމާތު ހިއްސާކުރި ބައެއް އެއާލައިންތަކުން ބުނީ، މިފަހަރުގެ ސްކޫލް ބަންދުގައިރާއްޖެއިން ބޭރަށް ދަތުރުކުރާ ދިވެހިންގެ އަދަދު ދަށްވެފައިވާކަމަށެވެ. އޭގެ ސަބަބުތަކުގެ ތެރޭގައި ޑޮލަރު ލިބުން އުނދަގޫވުމަކީ އެންމެބޮޑު މައްސަލަކަަމަށް އެއާލައިންތަކުން ފާހަގަކުރިއެވެ.

އެއާޕޯޓުން ފުރާއިރު، ހަމަޖެހިފައިވާ އުސޫލުން ކޮންމެ ދިވެއްސަކަށްވެސް ބީއެމްއެލުން 500 ޑޮލަރު ގަންނަން ލިބެއެވެ. މިހާރު ރައްޓެއްސެއް މެދުވެރިކޮށް ބޭންކް ރޭޓްގައި ޑޮލަރު ނުލިބޭނަމަ ދެން ޖެހެނީ ކަޅުބާޒާރުގައި ޑޮލަރު ބޮޑުއަގުގައި ގަންނާށެވެ. ވޮއިސްއާ ވާހަކަދައްކަމުން ބައެއް މީހުން ބުނީ، ކަޅުބާޒާރުގައި މިހާރު ޑޮލަރުގެ އަގު 18 ރުފިޔާއިން މައްޗަށްގޮސްފައިވާކަމަށެވެ.

ޑޮލަރު ލިބުން ދަތިނަމަވެސް ސްކޫލްބަންދާ ދިމާކޮށް ސިއްހީ ބޭނުމުގެ އިތުރުން ވިޔަފާރިކޮށްލުމަށް މިހާރުވެސް ދިވެހިން ބޭރަށް ފުރަމުންގެންދާކަމަށް ބައެއް ޓްރެވަލް އޭޖެންޓުން ބުންޏެވެ.

ވޮއިސްއާ މައުލޫމާތު ހިއްސާކުރަމުން ރާއްޖޭގެ އެންމެބޮޑު އެއް ޓްރެވަލް ކުންފުނި، އިނަ މޯލްޑިވްސްގެ ވެރިޔާ މުހައްމަދު ފިރާގުވެސް ވަނީ، މިފަހަރުގެ ޗުއްޓީގައި ރާއްޖެއިން ބޭރަށް ދަތުރުކުރާ ދިވެހިންގެ އަދަދު މަދުކަން ފާހަގަކުރައްވާފައެވެ. ފިރާގް ވިދާޅުވީ އެހެން ފަހަރުތަކާ އަޅާބަލާއިރު، މިފަހަރު މާބޮޑަށްވެސް ދަތުރުކުރާ މީހުން މަދުވެފައިވާކަމަށެވެ.

ޑޮލަރު ލިބުން ދަތިވިނަމަވެސް މިފަހަރުގެ ސްކޫލްބަންދުގައިވެސް ކޮންމެވެސް ވަރަކަށް ދިވެހިން ބޭރަށް ފުރަމުން އަންނައިރު، ދިވެހިން ގިނައިން ދަތުރުކުރާ މަންޒިލްތަކުގެ ތެރޭގައި ހިމެނެނީ މެލޭޝިއާ، ބެންކޮކް، އިންޑިއާ އަދި ސްރީލަންކާ ކަމަށް ޓްރެވަލް އޭޖެންޓުން މައުލޫމާތު ދެއެވެ. މިއީ ދިވެހިން އާއްމުގޮތެއްގައި ދިވެހިން އަބަދުވެސް ދަތުރުކޮށް އުޅޭ މަންޒިލްތަކެވެ.