ހަމަލާގެ ފަހަތުގައިވާ އެކަކުވެސް ސަލާމަތެއް ނުވާނެ: މޯދީ

ހޯމަ ދުވަހު އިރު އޮއްސުނު ވަގުތު އިންޑިއާގެ ވެރިރަށް ދިއްލީގައި ކާރެއް ގޮއްވާލުމުގައި ފަހަތުގައިވާ އެކަކުވެސް ސަލާމަތް ނުވާނެ ކަމަށާއި، އިންސާފު އަރާ ހަމަކުރާނެކަމަށް އިންޑިއާގެ ބޮޑުވަޒީރު ނަރެންދްރަ މޯދީ އިންޒާރު ދެއްވައިފިއެވެ.

މި ހާދިސާގައި 8 މީހަކު މަރުވިއެވެ. މިއީ ގަސްތުގައި ބަޔަކު ދިން ޓެރަރިސްޓް ހަމަލާއެއް ނަމަ، މިއީ ގިނަ އަހަރުތަކަކަށްފަހު އިންޑިއާގެ މައި ސިޓީއެއްގައި ދިން މިފަދަ ނުރައްކާތެރި ފުރަތަމަ ހަމަލާއެވެ. އިންޑިއާގެ ސަރަހައްދީ އިމުގެ ކައިރީގައި ހަމަލާތައް ދިނުން އާއްމުނަމަވެސް، އިންޑިއާގެ ބޮޑެތި ސިޓީތަކުގައި މިފަދަ ހަމަލާތައް ދެނީ ވަރަށް މަދުންނެވެ.

ބޫޓާނުގައި ރަސްމީ ދަތުރުފުޅެއްގައި ހުންނެވިނަމަވެސް މޯދީ ގެންދަވަނީ ސަލާމަތީ އިދާރާތައް މެދުވެރިކޮށް މި ހާދިސާގެ މައުލޫމާތު ސާފުކުރައްވަމުންނެވެ. މި ޙާދިސާ ތަހުގީގުކުރަނީ ދިއްލީ ފުލުހުންގެ ބަދަލުގައި، ކައުންޓަރ ޓެރިރިޒަންގެ ޤާނޫނުގެ ދަށުން އިންޑިއާގެ ނޭޝަނަލް އިންވެސްޓިގޭޝަން އެޖެންސީ (އެން.އައި.އޭ) އިންނެވެ. އިންޑިއާގައި ދޭ ޓެރަރިޒަމްގެ ހަމަލާތައް ތަހުގީގުކުރާ މައި އިދާރާ އަކީ އެން.އައި.އޭ އެވެ.

ހަމަލާގެ ފަހަތުގައި ބޭރުގެ އަތެއްވާކަން ސާބިތުވެއްޖެނަމަ މުޅި ދެކުނު އޭޝިއާ ސަރަހައްދަށް އެކަމުގެ ލޮޅުންތައް އަރާނެކަމަށް ތަޖުރިބާކާރުން އަންދާޒާކުރެއެވެ. އެންމެ ފަހުން ކަޝްމީރުގައި ދިން ހަމަލާއަށްފަހު އިންޑިއާއިން ބުނީ ބޭރުގެ ޤައުމަކުން އެހީތެރިވެގެން އިންޑިއާގެ ފަސްގަނޑުގައި އިތުރު ޓެރަރިސްޓް ހަމަލާއެއް ދޭ ބަޔަކު އެއިއުލާންކުރަނީ ހަނގުރާމަ ކަމަށެވެ.