ބޮމުގެ އިންޒާރަކާ ގުޅިގެން އިންޑިގޯގެ ފްލައިޓެއް ނާގުޕޫރަށް ޑައިވާޓްކޮށްފި

ބޮމުގެ އިންޒާރަކާ ގުޅިގެން އިންޑިއާގެ އިންޑިގޯގެ ފްލައިޓެއް ނާގުޕޫރަށް ޑައިވާޓްކޮށްފިއެވެ.

އިންޑިއާގެ ވައިގެ ދަތުރުފަތުރަށް ބޮމުގެ އިންޒާރުތައް އިތުރުވަމުންދާކަން ފާހަގަކުރެވެއެވެ. މިގޮތުން އެންމެ ފަހުން އިންޑިގޯ އެއާލައިންގެ ފްލައިޓެއް ބޮމުގެ އިންޒާރަކާ ގުޅިގެން ނާގްޕޫރަށް ޑައިވާޓްކުރަން ޖެހުނެވެ. ނަމަވެސް ގިނަ އިންޒާރުތަކަކީ ދޮގު އިންޒާރުތަކެއްކަން ވަނީ ފާހަގަކުރެވިފައެވެ.

އިންޑިގޯ އިން ނެރުނު ބަޔާނެއްގައި ބުނެފައި ވަނީ މަދްޔަ ޕްރަދޭޝްގެ ޖަބަލްޕޫރުން ހައިދަރުއާބާދަށް މިއަދު ދަތުރުކުރި ފްލައިޓް 6އީ-7308 އާދީއްތަ ދުވަހުގެ ހެނދުނު ނާގްޕޫރު އިންޓަނޭޝަނަލް އެއާޕޯޓަށް ޑައިވާޓްކޮށްފައި ވަނީ އެ ބޯޓުގައި ބޮމުގެ އިންޒާރު މެސެޖެއް ލިބުމުން ކަމަށެވެ. އަދި ފްލައިޓް ނާގްޕޫރު އެއާޕޯޓުގައި ޖެއްސުމާއެކު ހުރިހާ ފަސިންޖަރުން ބޯޓުން ފޭބި ކަމަށް ވެސް ވަނީ ބުނެފައެވެ.

ފުލުހުންގެ އޮފިޝަލަކު ވިދާޅުވީ ބޮމުގެ އިންޒާރުގެ މެސެޖު ލިޔެފައި ވަނީ ކަރުދާސްކޮޅެއްގައި ކަމަށާއި، އެ ކަރުދާސް ފެނިފައިވަނީ ބޯޓުގެ ފާޚާނާއިން ކަމަށެވެ. ނަމަވެސް ސަލާމަތީ އިދާރާތަކުން ފުރިހަމައަށް ޗެކްކުރުމަށްފަހު ޝައްކު ކުރެވޭ އެއްވެސް ކަމެއް ފެނިފައި ނުވާ ކަމަށް އޮފިޝަލް އިތުރަށް ވިދާޅުވިއެވެ.

މި ބޯޓު ބަލައި ޗެކްކުރުމަށްފަހު މިއަދު މެންދުރު ފަހު އަލުން ފުރަން ވަނީ ހަމަޖެހިފައެވެ.

2024 ވަނަ އަހަރު ފެށުނީއްސުރެ އިންޑިއާގެ 41 އެއާޕޯޓަކަށް ބޮމުގެ އިންޒާރު ލިބިފައިވާކަމަށް ރިޕޯޓުތަކުގައި ބުނެއެވެ. މީގެ ތެރޭގައި އެއާ އިންޑިއާ އަދި އިންޑިގޯ ފަދަ ބޮޑެތި އެއާލައިންތަކުގެ ފްލައިޓްތަކަށް ދީފައިވާ އިންޒާރުތައް ހިމެނެއެވެ. މި އިންޒާރުތަކުގެ ސަބަބުން ފްލައިޓްތައް ޑައިވާޓްކުރުމާއި، ފަސިންޖަރުން ބޭލުމަށްފަހު ބޯޓުތައް ބަލައި ފާސްކުރަން ޖެހިފައިވެއެވެ.

ސަލާމަތީ އިދާރާތަކުން ބުނާ ގޮތުގައި މިފަދަ އިންޒާރުތައް ދޭ ފަރާތްތައް ހޯދުމަށް މަސައްކަތްތަކެއް ކުރެވެމުންދެއެވެ. އެގޮތުން މިދިޔަ ޖޫން މަހު އިންޑިގޯގެ ފްލައިޓަކަށް ދޮގު އިންޒާރެއް ދިން ތަމިލްނާޑޫ މީހަކު ވަނީ ހައްޔަރުކޮށްފައެވެ. ނަމަވެސް މިފަދަ ދޮގު އިންޒާރުތަކުގެ ސަބަބުން ވައިގެ ދަތުރުފަތުރަށް ބުރޫއަރައި، އެއާލައިންތަކަށް ބޮޑެތި ގެއްލުންތަކެއް ވަމުންދާކަން ފާހަގަކުރެވެއެވެ.

އިންޑިއާގެ ސަރުކާރުން މި މައްސަލައަށް ޚާއްސަ ސަމާލުކަމެއް ދީ، އިތުރު ފިޔަވަޅުތަކެއް އަޅަން ޖެހިފައިވާކަމަށް ދަތުރުފަތުރުގެ ދާއިރާގެ މާހިރުން ބުނެއެވެ. އަދި މިކަމުގެ ސަބަބުން އިންޑިއާގެ ވައިގެ ދަތުރުފަތުރުގެ ސިނާއަތަށް ނޭދެވޭ އަސަރުތަކެއް ކުރަމުންދާކަންވެސް ފާހަގަކުރެވެއެވެ.