ދިވެހި ޙައްޖުވެރިން ފުރަތަމަ ފަހަރަށް ހައިސްޕީޑް ރޭލުގައި މަދީނާއަށް
ޙައްޖުގެ އެންމެހާ އަޅުކަންތައް ފުރިހަމަ ކުރުމަށްފަހުގައި ދިވެހި ޙައްޖުވެރިން ފުރަތަމަ ފަހަރަށް ހައިސްޕީޑް ރޭލުގައި މަދީނާއަށް ދިއުމަށް ދަތުރު ފަށައިފިއެވެ.
ހައްޖުވެރިންގެ ފުރަތަމަ ގްރޫޕް ހައިސްޕީޑް ރޭލުގައި މަދީނާއަށް ދިއުމަށް ފުރިއިރު، މިއީ ހައްޖު ދަތުރުގައި ދިވެހި ހައްޖުވެރިން މަދީނާއަށް ދިއުމަށް ހައިސްޕީޑް ރޭލް ބޭނުންކުރި ފުރަތަމަ ފަހަރުކަމަށް އިސްލާމިކް މިނިސްޓްރީން ބުންޏެވެ. އެ މިނިސްޓްރީން ބުނީ ދިވެހި ޙައްޖުވެރިން މީގެ ކުރިން މައްކާއިން މަދީނާއަށް ދަތުރުކުރަމުން އައިސްފައިވަނީ ބަހުގައިކަމަށެވެ. އެގޮތުން ބަހުގައި ކުރާ މިދަތުރަށް ހަ ގަޑިއިރާ އަށް ގަޑިއިރާ ދެމެދުގެ ވަގުތު ހޭދަވެއެވެ. އެހެންނަމަވެސް ހައި ސްޕީޑު ރޭލުގައި ދަތުރުކުރަން ފެށުމުގެ ސަބަބުން މިހާރު އެ ދަތުރު ދެ ގަޑިއިރަށް ކުރުވެގެންދާނޭކަމަށް ރައްޖޭގެ ހައްޖު މިޝަނުން ވަނީ ފާހަގަކޮށްފައެވެ.
މި ބަދަލަކީ ދިވެހި ޙައްޖުވެރިންގެ ޙައްޖުގެ ކަންކަން ލުއިފަސޭހަ ކުރުމުގެ ގޮތުން ސަރުކާރުން ކުރަމުން އަންނަ މަސައްކަތުގެ ދަށުން ގެނައި ބަދަލެއް ކަމަށް މިނިސްޓްރީން ވަނީ މީގެ ކުރިން ބުނެފައެވެ. ދިވެހި ޙައްޖުވެރިން މަދީނާއަށް ދިޔުމަށް ހަމަޖެހިފައިވަނީ ޖުމުލަ ހަތަރު ގުރޫޕަކަށް ބަހާލައިގެންނެވެ.
ދިވެހި ޙައްޖުވެރިން އެނބުރި ރާއްޖެ އައުމަށް ހަމަޖެހިފައިވަނީ, މި މަހުގެ 13، 14، 16 އަދި 17 ވަނަ ދުވަހެވެ. ދިވެހިރާއްޖެއިން މިއަހަރު ޙައްޖުގެ އަޅުކަމަށް ގޮސްފައިވަނީ 1000 މީހުންނެވެ.
ސަރުކާރުން މިފަހަރު ވަނީ ހައްޖުވެރިންނަށް ލުއިފަސޭހަވާނޭހެން ގިނަ ކަންތައްތަކެއް އިންތިޒާމުކޮށްދީފައެވެ. މީގެ ތެރެއިން އެންމެ ފާހަގަކޮށްލެވެނީ މިއަހަރު މައްކާ ރޫޓު އިނީޝިއޭޓިވްގެ ހިދުމަތް ރާއްޖެއަށް ލިބުމެވެ. މީގެ އިތުރުން މިނާގެ ފޭލިގެތަކުގެ ފެންވަރު ރަނގަޅުވުމުގެ އިތުރުން ދިވެހި ހައްޖުވެރިންނަށް ހާއްސަ ކްލިނިކެއްވެސް މިފަހަރު ވަނީ ގާއިމްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
