ރައީސް ޔާމީންގެ ވެރިކަމުގައި ރާއްޖެ ވަނީ ދުނިޔެއިން އެކަހެރިކޮށްލާފައި: ވަޒީރު ޠާރިގު
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ރާއްޖެ، ދުނިޔެއިން އެކަހެރިކުރެއްވި ކަމަށް މޫސުމީ ބަދަލުތަކާއި، ތިމާވެށްޓާއި، ހަކަތައާ ބެހޭ ވަޒީރު ޠާރިގް އިބްރާހީމް ވިދާޅުވެއްޖެއެވެ.
ވަޒީރު ޠާރިގް މިފަދައިން ވިދާޅުވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، އދ ގެ އާއްމު މަޖިލީހުގައި ދެއްކެވި ވާހަކަފުޅަށް ރައީސް ޔާމީން ފާޑުވިދާޅުވުމާއި ގުޅިގެން އެކްސް ގައި ކުރެއްވި ޕޯސްޓެއްގައެވެ.
މިގޮތުން ވަޒީރު ޠާރިގު ވިދާޅުވީ، ރައީސް ޔާމީންގެ 5 އަަހަރުގެ ދައުރުގައި އެންމެ ފަހަރަކުވެސް ޔޫއެންޖީއޭއަށް ވަޑައިގެންފައިނުވާ ކަމަށާއި، ޑިޕްލޮމަސީއަށް އަހައްމިއްޔަތުކަން ނުދެއްވާ ކަމަށެވެ.
ވަޒީރު ޠާރިގު ވިދާޅުވީ، 2015 ވަނަ އަހަރު، ދުނިޔޭގެ ލީޑަރުން އެސްޑީޖީތަކާއި ޕެރިސް އެއްބަސްވުމަށް އެއްވި އިރުވެސް ޔާމީން ވަޑައިނުގަންނަވާ ކަމަށާއި، ވެރިކަމުގެ މުޅި ދައުރުގައި ވެސް އަމަލު ކުރެއްވީ މިފަދައިން ކަމަށެވެ.
ލީޑަރުން ވާންޖެހޭނީ، ރައްޔިތުންގެ މަސްލަހަތު ހުރި ގޮތަށް ކަންކަން ކުރިއަށް ގެންދަވާ، އެ ކަންކަން ތަމްސީލުކުރައްވާ ބޭފުޅުންނަށްކަން ފާހަގަކުރައްވާ ވަޒީރު ޠާރިގު ވިދާޅުވީ، ރައީސް ޔާމީން އުޅުއްވީ ބައިނަލްއަގުވާމީ މައިދާނުން ފިލަން ކަމަށާއި، އެމަނިކުފާނުގެ ވެރިކަމުގައި ދުނިޔެއިން ރާއްޖެ އެކަހެރިވެގެންދިޔަ މަންޒަރު ފެނިގެން ދިޔަ ކަމަށެވެ.
"އދގެ ސަލާމަތީ މަޖިލީހުގައި ވާހަކަފުޅު ދެއްކެވި ފުރަތަމަ ދިވެހި ރައީސްގެ ގޮތުގައި ރައީސް މުޢިއްޒު ވަނީ ތާރީޚުގައި ލިޔުއްވާފަ. އަދި ރައީސް ވަނީ އަޅުގަނޑުމެންނަކީ ދުނިޔެއަށް ހުޅުވިފައިވާ ބައެއްކަން ދައްކުވައިދެއްވާފަ. އަޅުގަނޑުމެން މަސައްކަތްކުރާނީ އެކުގައި ހައްލު ހޯދުމަށް. ގައުމީ މަސްލަހަތުގެ މައްޗަށް ބިނާކޮށް."
ވަޒީރު ޠާރިގު ވިދާޅުވިއެވެ.
ވަޒީރު ޠާރިގު ވިދާޅުވީ، ރައީސް ޑރ.މުޙައްމަދު މުޢިއްޒުގެ ދަށުން ޚިދުމަތް ކުރުމަށް ފަޚުރުވެރިވެވަޑައިގަންނަވާ ކަމަށާއި، އެމަނިކުފާނު ލީޑަރޝިޕްގެ ދަށުން، ގައުމަށްޓަކައި ކުރައްވާ އިހުލާސްތެރި މަސައްކަތް ފެންނަކަމަށެވެ.
އދ ގެ ސަލާމަތާއި ބެހޭ މަޖިލީހުގައި ވާހަކަދެއްކެވި ފުރަތަމަ ދިވެހި ރައީސްގެ ގޮތުގައި، ރައީސް ޑރ.މުޢިއްޒު ތާރީޚު ލިޔުއްވާފައިވާ ކަމަށާއި، ރާއްޖެއަކީ ދޭދޭގުޅުންތައް ބަދަހިކުރަން ބޭނުންވާ ޤައުމެއްކަން ދައްކުވައިދިނުމުގެ އިތުރުން، ދިވެހިން އިސްކޮށް، ރާއްޖެ ޤަބޫލުކުރާ ސިޔާސަތުތައް އިސްކޮށް ޖެހޭ ކޮންމެ މައްސަލައަކަށްވެސް ޙައްލު ހޯއްދަވާނެކަން ދައްކުވައިދީފައިވާކަމަށް ވެސް ވަޒީރު ޠާރިގު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
