މިއޮތީ ވަރަށް މީރުކޮށް ސެލެޑް ޑްރެސިންގ ތައްޔާރު ކޮށްލާނެ ގޮތުގެ ރެސިޕީ

ސެލެޑަކީވެސް މީރު ޑްރެސިންގއެއް އަޅާލައިގެން ތައްޔާރު ކޮށްފިނަމަ ވަރަށް މީރު އެއްޗެކެވެ. އެހެން ކަމުން މިއަދު ވޮއިސްގެ ބަދިގެއިން މި ގެނެސްދެނީ މީރުކޮށް ސެލެޑް ޑްރެސިންގ ތައްޔާރު ކުރާނެ ގޮތެވެ.

ބޭނުންވާ ތަކެތި

1/2 ޖޯޑު މަޔޮނައިޒް

2 ސައި ސަމުސާ މަސްޓަރޑް

3 ލޮނު މެދު (ގާނާފައި)

3 މޭޒުމަތީ ސަމުސާ ލުނބޯ ހުތް

1/2 ސައި ސަމުސާ ލޮނު

1/2 ސައިސަމުސާ އަސޭމިރުސް

1/2 ޖޯޑު އެކްސްޓްރާ ލައިޓް އޮލިވް އޮއިލް

1/2 ޖޯޑު ޕާމެޝަން ޗީޒް (ގާނާފައި)

ތައްޔާރު ކުރާނެ ގޮތް

1) ބޮޑު ތައްޓެއްގެ ތެރޭގައި އޮލިވް އޮއިލް އާއި ޗީޒް ފިޔަވައި ދެން ހުރި ހުރިހާ ތަކެތި ރަނގަޅަށް އެކުލަވާ ލާށެވެ.

2) ދެން ވަރަށް ބާރަށް ވިސްކް/ ހަލުވަމުން މަޑުމަޑުން އޮލިވް އޮއިލް އަޅަމުންދާ ށެވެ. އެއްކޮށް އަޅައި ނިމުމުންވެސް ރަނގަޅަށް ހަލުވާލަންވާނެއެވެ.

3) ފަހު ކަމަކަށް ގާނާފައި ހުރި ޗީޒް އަޅާލާފައި އެކުލަވާލާށެވެ. ދެން ފުޅި އަކަށް އަޅާލާފައި ބޭނުން ވުމުން މި ޑްރެސިންގ އަޅައިގެން ސެލެޑް ހަދަންވީއެވެ.