އުރީދޫގެ 20 ވަނަ އަހަރީ ދުވަހާ ގުޅުވައިގެން، އެމްބެސެޑަރުންނާއެކު ހާއްސަ މެޗްތަކެއް ކުޅެފި

އުރީދޫ މޯލްޑިވްސްގެ 20 ވަނަ އަހަރީ ދުވަހުގެ މުނާސަބަތުގައި އެކުންފުނީގެ ބްރޭންޑް އެމްބެސެޑަރުންނާއެކު، އެކުވެރިކަމުގެ ހާއްސަ މެޗްތަކެއް ކުޅެފިއެވެ.

މެޗްތަކުގެ ކުޅުން ކުރިއަށް ގެންގޮސްފައިވަނީ ހުޅުމާލޭ ޓާފްދަނޑުގައެވެ. ފުރަތަމަ މެޗްގައި އުރީދޫ ބައްދަލުކުރީ ދިވެހި ފުޓްބޯޅައިގެ ގަދަ ބާރެއް ކަމަށްވާ، މާޒިޔާ ސްޕޯޓްސް ކްލަބްގެ މެނޭޖްމަންޓް ޓީމާއެވެ. މިމެޗް 7-4 ގެ ނަތީޖާއަކުން ކާމިޔާބުކުރީ މާޒިޔާގެ ޓީމެވެ.

ދެވަނަ މެޗްގައި އުރީދޫ ބައްދަލުކުރީ ހަބޭސްއާއެވެ. މިމެޗް އުރީދޫއިން ކާމިޔާބުކުރީ 6-5 ގެ ނަތީޖާއަކުންނެވެ. މި ދެމެޗްގައިވެސް އުރީދޫގެ އިސްވެރިންވެސް ވަނީ ފެނިގެންގޮސްފައެވެ.

އުރީދޫ މޯލްޑިވްސް އަކީ ވަތަނިއްޔާ ނަމުގައި ރާއްޖެއަށް މޯބައިލް ނެޓްވަރކްގެ ހިދުމަތް ފެށުމާ ހަމައިންވެސް ދިވެހި ކުޅިވަރަށް އެކި ގޮތްގޮތުން އެހީތެރިކަން ފޯރުކޮށްދެމުން އަންނަ ކުންފުންޏެކެވެ. ފަހުން އުރީދޫނަމަށް ބަދަލުވެ، އެކުންފުނިން ދިވެހި ކުޅިވަރަށް ދެމުން އަންނަ އެހީތެރިކަން ފުޅާވެގެން ދިޔައިރު، ދިވެހި ފުޓްބޯޅައިގެ މައި ލީގްވެސް ވަނީ އެކި ސީޒަންތަކުގައި ސްޕޮންސަރކޮށްފައެވެ.

މީގެ އިތުރުން ރާއްޖޭގެ ފުޓްބޯޅަ ކްލަބްތަކަށް ކޮންމެ އަހަރަކުވެސް އެކުންފުނީގެ އެހީތެރިކަން ލިބެމުން އަންނަކަން ފާހަގަކޮށްލެވެއެވެ. އެގޮތުން އުރީދޫ ފާހަގަކުރެވިފައިވަނީ ފުޓްބޯޅަ އާއި އެނޫންވެސް ކުޅިވަރުތައް ދެމެހެއްޓުމަށް މާލީ ގޮތުން އެންމެބޮޑަށް އެހީތެރިވާ އެއް ކުންފުނީގެ ގޮތުގައެވެ.

އުރީދޫ މޯލްޑިވްސް އިން ރާއްޖޭގައި ހިދުމަތް ދެމުން އަންނަތާ 20 އަހަރު ވެފައިވާއިރު، އެކުންފުނިން ގެންދަނީ މުއާސަލާތީ ހިދުމަތުގެ އިތުރުން އިޖުތިމާއީ ޒިންމާގެ ދަށުންވެސް ގިނަ މަސައްކަތްތަކެއް ކުރަމުންނެވެ.