ޑައިވިނަށް ގޮސް އުޅެނިކޮށް ގެއްލުނު ފަތުރުވެރިންގެ ހަށިގަނޑުތައް ހޯދައިފި
ލިޔުންތެރިޔާ
ޚަދީޖާ އަރުފާ
ޑައިވިނަށް ގޮސް އުޅެނިކޮށް ގެއްލުނު 4 ފަތުރުވެރިންގެ ހަށިގަނޑުތައް އެމްްއެންޑީއެފުން ހޯދައިފިއެވެ.
އެމްއެންޑީއެފުން ބުނީ، ޑައިވިނަށް ގޮސް އުޅެނިކޮށް ގެއްލުނު 4 ފަތުރުވެރިން ހޯދުމަށް އެމްއެންޑީއެފް ކޯސްޓްގާޑާއި، ފުލުހުންގެ ޚިދުމަތާއި އަދި އިޓަލީ ސަރުކާރުން ހަމަޖެއްސި ބޭރުގެ ތަޖުރިބާކާރު ޑައިވަރުން ގުޅިގެން މިއަދު ހިންގި އޮޕަރޭޝަނުގައި، އެމީހުންގެ ހަށިގަނޑުތައް ލޮކޭޓްކުރެވިފައިވާ ކަމަށެވެ.
އަދި އެމީހުންގެ ހަށިގަނޑުތައް ފެނިފައިވަނީ އެމީހުން ޑައިވް ކުރި ކޭވް (ހޮހަޅަ) ތެރެއިން ކަމަށެވެ.
އެމްއެންޑީއެފުން އިތުރަށް ބުނީ، ކުރިއަށް ހުރި ޑައިވްތަކުގައި އެމީހުންގެ ހަށިގަނޑުތައް ކޭވްއިން ނެގުމުގެ މަސައްކަތް ކުރުމަށް ރޭވިފައިވާ ކަމަށެވެ.
ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު ހަތަރު ފަތުރުވެރިން ހޯދުމުގެ އޮޕަރޭޝަނުގައި ބައިވެރިވުމަށް ފިންލޭންޑްގެ ތަޖުރިބާކާރު ތިން ޑައިވަރުން ރާއްޖެ އައީ އިއްޔެއެވެ.
ރައީސް އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެފައިވާ ގޮތުން، ފިންލޭންޑުގެ މި ޑައިވަރުން ރާއްޖެ އައީ އިޓަލީވިލާތުގެ ސަރުކާރުން ހުށަހެޅި ހުށަހެޅުމަކަށް ކަމަށެވެ.
އަދި އެ ޓީމުގައި ކޭވް ޑައިވިން ސްޕެޝަލިސްޓެއް ވެސް ހިމެނޭ ކަމަށާ، ޓީމު ރާއްޖެއައީ ކަމަށް ބޭނުންވާ ސާމާނުވެސް ހިފައިގެންނެވެ.
ގެއްލުނު ފަތުރުވެރިން ހަށިގަނޑުތައް ފިންލޭންޑްގެ ޑައިވަރުންގެ އެހީގައި ހޯދިފައިވާއިރު، އެ ފަތުރުވެރިން ހޯދުމުގެ މަސައްކަތުގައި އުޅުނު، ސާޖަންޓް ފަސްޓް ކްލާސް މުޙައްމަދު މަހުދީ ވަނީ ހަށިގަނޑުތައް ހޯދުމުގެ މަސައްކަތުގައި އުޅެނިކޮށް މިމަހު 16 ވަނަ ދުވަހު ނިޔާވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
