އޮޑިޓް އޮފީހުގެ މަސައްކަތްތައް ލަސްވާ ސަބަބު މާލިއްޔަތުކޮމިޓީން ބަލަނީ

އޮޑިޓަރ ޖެނެރަލް އޮފީހުގެ މަސައްކަތްތައް ލަސްވަނީ ކީއްވެގެންތޯ ބެލުމަށް މާލިއްޔަތު ކޮމިޓީއަށް އޮޑިޓަރ ޖެނެރަލް ހާޒިރުކުރުމުގެ މަސައްކަތް އެ ކޮމިޓީން ފަށައިފިއެވެ.

ރައްޔިތުން މަޖިލީހުގެ މާލިއްޔަތު ކޮމިޓީގައި މިއަދު ބޭއްވި ބައްދަލުވުމުގައި އެ ކޮމިޓީގެ މެމްބަރުން ވަނީ އޮޑިޓަރ ޖެނެރަލްގެ އޮފީހުގެ މަސައްކަތް ކުރިއަށްދާގޮތާމެދު ކަންބޮޑުވުން ފާޅުކުރައްވައި ވާހަކަދައްކަވާފައެވެ. މިއަދުގެ ބައްދަލުވުމުގައި ވާހަކަދައްކަވަމުން މާލިއްޔަތު ކޮމިޓީގެ މުގައްރަރު، އޭދަފުށި ދާއިރާގެ މެންބަރު އަހުމަދު ސަލީމް ވިދާޅުވީ އޮޑިޓަރ ޖެނެރަލް އޮފީހުގެ މަސައްކަތްތައް އެކަށީގެންވާ ގޮތެއްގައި ކުރިއަށްނުދާތީވެ މީގެކުރިން ގެނެސް ހާޒިރުކުރުމުން އެ އޮފީހުން އެދުނު ކަންކަން މަޖިލީހުގެ ތެރެއިން ކޮށްދީފައިވާކަމަށެވެ. މިގޮތުން އޮޑިޓް އޮފީހުގެ މަސައްކަތްތައް ކުރުމަށް އެކަށީގެންވާ ބަޖެޓެއް ހަމަޖައްސައިދީފައިވާކަން ސަލީމް ވިދާޅުވިއެވެ.

ނަމަވެސް އަދިވެސް ފެނިގެންދަނީ އޮޑިޓް އޮފީހުގެ މަސައްކަތްތައް ކުރަންވާވަރަށް ނުކުރެވޭތަން ކަމަށާއި، މިހާރު އެކަންކަން އެހެންވަނީ ކީއްވެގެންކަން ސާފުވާންޖެހޭކަމަށް ސަލީމް ފާހަގަކުރެއްވިއެވެ.

އައުޓްސޯސްކޮށްގެންވެސް (އޮޑިޓް) ކުރެވޭނެ ގޮތް އޮންނާނީ ހަމަޖައްސައިދީފައި އެމީހުން (އޮޑިޓް އޮފީސް) ބޭނުމިއްޔާ

ކޮމިޓީގެ މުގައްރަރު ސަލީމް ވިދާޅުވިއެވެ.

އޮޑިޓް ނުކުރެވިދާ ކޮންމެ ދުވަހަކީ ދައުލަތަށް އެކަމުގެ ގެއްލުން ލިބޭނޭ ކަމެއްކަން ފާަހަގަކުރައްވަމުން ނާޒިމް ވިދާޅުވީ، މިދިޔަ އަހަރު އޮޑިޓް އޮފީހުން 621 އޮޑިޓްކޮށް ނިންމާނޭކަމަށް ބުނިނަމަވެސް އެ އޮފީހަށް ނިންމުނީ 189 އޮޑިޓްކަމަށެވެ. މީގެ އިތުރުން މާލިއްޔަތު ކޮމިޓީގެ ފަރާތުން ހާއްސަ އޮޑިޓްގެ ގޮތުގައި 18 އޮޑިޓެއްކުރަން ދިންނަމަވެސް އޭގެ ތެރެއިންވެސް ނިމިފައިވަނީ 9 އޮޑިޓްކަމަށް ނާޒިމް ވިދާޅުވިއެވެ.

ނާޒިމް ވިދާޅުވީ އޮޑިޓް އޮފީހުން ކުރަންޖެހޭ އޮޑިޓްތައް ނުނިމުމުން ސަރުކާރުގެ ބައެއް މަޝްރޫޢުތަކަށްވެސް އެކަމުގެ ނޭދެވޭ  އަސަރުކޮށްފައިވާކަމަށެވެ. އެގޮތުން މިހާރުވެސް ބޭރުގެ ފަރާތްތަކާ ގުޅިގެން ކުރިއަށްގެންދަން ހަމަޖެހިފައިވާ ކަރަންޓް މަޝްރޫޢުއެއް މަޑުޖެހިފައިވާކަން ނާޒިމް ވިދާޅުވިއެވެ.

ކޮމިޓީގައި ވާހަކަދައްކަވަމުން ބައެއް މެމްބަރުން ވިދާޅުވެފައިވަނީ އޮޑިޓްތައް ނުނިމެނީ ގިނަފަހަރަށް ކުންފުނިތަކުގެވެސް އިހުމާލުންކން ފާހަގަކުރައްވާފައެވެ. އެގޮތުން އޮޑިޓަށް ބޭނުންވާ ބައެއްކަހަލަ މައުލޫމާތު ނުދީ ކުންފުނިތަކުން ހިފަހައްޓަމުންގެންދާކަން މާލިއްޔަތު ކޮމިޓީގެ މެމްބަރުން ވިދާޅުވިއެވެ. މިއަދުގެ ބައްދަލުވުމުގައި ކޮމިޓީގެ ބައެއް މެމްބަރުންވަނީ ސަރުކާރުގެ ބައެއް ކުންފުނިތަކުގެ ވެރިންނާއި ކުންފުނިތަކުގެ ބަލަދުވެރިފަރާތް ޕީސީބީ އަދި އޮޑިޓަރ ޖެނެރަލް ކޮމިޓީއަށް ހާޒިރުކޮށްގެން ނަމަވެސް އޮޑިޓްތައް ނުނިމި ލަސްވާ ސަބަބުތައް ދެނެގަންނަން ޖެހޭކަން ފާހަގަކުރައްވާފައެވެ. މިއަދުގެ ބައްދަލުވުމުގައި ކޮމިޓީގެ މެމްބަރުން ވާހަކަދެއްކުމަށްފަހު ނިންމާފައިވަނީ އޮޑިޓްތައް ނުނިމި ދިގުލައިގެންދާ މައްސަލަ ދެނެގަތުމަށް ކޮމިޓީއަށް އޮޑިޓަރ ޖެނެރަލް ހާޒިރުކުރާނެ ދުވަހެއް ކަނޑައެޅުމަށެވެ.