ރޭވިޔަސް ގިނަ ބަޔަކު ހުޅުމާލެ ފަރުމަތީ، ކޮން ކަމެއް؟

މި ދުވަސްވަރު މާލެއިން ހުޅުމާލެއަށް އަދި ހުޅުމާލެ އިން މާލެއަށް އެއްގަމާއި ކަނޑުގެ މަގުން ދަތުރުކުރާ މީހުންނަށް މި މަންޒަރު ފެންނާނެ އެވެ. އެއީ ހަވީރާއި ރޭގަނޑުގެ ވަގުތުތަކުގައި ހުޅުމާލެ ފަރުމަތި ހިކި ތޮށިމަތީ ގިނަ އަދަދެއްގެ ބަޔަކު ހަރަކާތްތެރިވާ މަންޒަރެވެ.

ހުޅުމާލެއާ މާލެ ގުޅޭ ހައިވޭ ފެށޭ ސަރަހައްދުގެ ފަރުމަތީން ތޮށިގަނޑު ވަަރަށް ބޮޑަށް ހިކޭތާ ހަފްތާއެއްހާ ދުވަސް ވަނީ އެވެ. ހެނދުނުގެ ބައެއް ވަގުތުތަކާއި ހަވީރާއި ރޭގަނޑުގެ ބައެއްގައި ބޮޑު ސަރަހައްދެއް ހިކިފައި އޮވެ އެވެ.

އެ ވަގުތުތަކުގައި ވަރަށް ގިނަ ބަޔަކު ތޮށިގަނޑު މަތީ އުޅެ އެވެ. މިއީ ބައެއް މީހުންނަށް ތަފާތު މަންޒަރެކެވެ. ވަރަށް ގިނަ މީހުން އެ މީހުން ތޮށިގަނޑު މަތީ ކުރަނީ ކީއްތޯ ސުވާލު ކުރެ އެވެ.

ހަވީރު ފަރުމައްޗަށް އެރޭ މީހުން ރޭގަނޑުވާއިރުވެސް އުޅެ އެވެ. ގުދުވެ ގުދުވެފައި އެއްޗެހި ހޮވާ މަންޒަރު ފެނެ އެވެ. ގައުތައް ދުރުކޮށް އެއްޗެއް ހޯދަން އުޅޭ ތަން ފެނެ އެވެ. ރޭވުމުން ބައްތިތައް ދިއްލާ އެ މަސައްކަތުގައި އަވަދިނެތި އުޅޭ މަންޒަރެވެ.

ބައެއް މީހުން ދަނީ އާއިލާއާ އެކުގަ އެވެ. ބައެއް މީހުން އެ މީހުންގެ އެކުވެރީންނާއެކު އެވެ. ވަކީން ގޮސް އުޅޭ މީހުން ވެސް ފެނެ އެވެ.

ފަރުހިކިފައި އޮންނަ ވަގުތު ތޮށިމަތީ ގިނަ ބަޔަކު އުޅެނީ ކެއުމަށް ބޭނުންވާ މޫދުގެ އެކި ބާވަތްތައް ހޯދުމަށެވެ. އެ ބާވަތްތަކަށް އެކި ރަށްރަށުގައި މީހުން ކިޔާ ނަންތައް ތަފާތެވެ. ބައެއް މީހުން ކިޔަނީ ސަނދަރަ އެވެ. އަނެއް ބަޔަކު ހަންދަ ވެސް ކިޔަ އެވެ. ބައެއް ހިސާބުތަކުގައި ހަންދަބުރި އޭވެސް ކިޔަ އެވެ. މީގެ އިތުރުން ކޯނާއި ތުންއެނބުރި އާއި ރާކަނިވެސް ފަރުމަތީން ފެނެ އެވެ. މިއީ ބައެއް މީހުންނަށް ވަރަށް މީރު އެއްޗެކެވެ. އޭގައިވާ މަސްކޮޅަކީ ފިހެންނާއި އެނޫން ގޮތްގޮތަށް ތައްޔާރުކޮށްގެން ކައިލާން ވަރަށް މީރު އެއްޗެކެވެ.

ފަރުހިކިފައި އޮންނަ އިރު ބައެއް ފަހަރު ވަރަށް ފަސޭހައިން ބޯވަ ވެސް ހިފެހެ އެވެ. ތޮށިމައްޗަށް ގޮސް އުޅޭ ބައެއް މީހުން ދަނީ ބޯވައެއް ފެނޭތޯ އެވެ. އެ މީހުން ފަރުމައްޗަށް ދަނީ ބޯވަ ނެގުމަށް ބޭނުންވާ ދަނގަޑުފަދަ ތަކެތި ހިފައިގެންނެވެ.

މިއީ މާލެ ސަރަހައްދުން އާންމުކޮށް ނުފެންނަ ކަމެއް ނަމަވެސް އަތޮޅުތެރޭގައި ވަރަށް ފޯރީގައި މީހުން ކުރާ ކަމެކެވެ. ފަރު ހިކުމުން ރަށުގެ ވަރަށް ގިނަ ބަަޔަކު ފަރުމައްޗަށްމ ގޮސް އުޅެ އެވެ. ބައެއް މީހުން ދަނީ ބޮލި ހޮވާށެވެ. އަނެއް ބަޔަކު ދަނީ ކުރީން ދެންނެވި ފަދަ މޫދު ކާނާގެ ބާވަތްތައް ނަގާށެވެ. އަނެއް ބަޔަކު ދަނީ ހިތްގައިމު އެ މަންޒަރު ބަލައިލާށެވެ.

ހަގީގަތުގައިވެސް އެގޮތަށް ފަރު ހިކިފައި އޮންނައިރު ހިތްގައިމު މަންޒަރެއް ފެނެ އެވެ. ރީތި ރީތި ކުދިކުދި މަސްތައް ފެންކޮޅުކޮޅުގައި ދުވެލާފައި އުޅޭ މަންޒަރު އެއީ ބަލާ ފޫހި ނުވާ މަންޒަރެކެވެ. ކުޑަކުދީން އެ މަންޒަރަށް ވަރަށް ޝައުގުވެރިވެ އެވެ. ބައެއް ކުދީން މަސް ހިފާން ވެސް އުޅެ އެވެ.

އަނެއްކޮޅުން ފަރުމަތީ ހިނގާލާ އުޅުމަކީ ހިތަށް ހަމަޖެހުން ގެނެސްދީ މުނިފޫހިވެސް ފިލާނެ ކަމަކަށް ވެ އެވެ. ރޭވިޔަސް ހުޅުމާލެ ފަަރުމަތީން ގިނަ ބަޔަކު ފެންނަނީ އެހެން ވެގެނެވެ. ފަރު ހިކިފައި އޮންނައިރު ފަރަށް ގޮސް ތަޖުރިބާކޮށްލުމަކީ ވަރަށް ސަޅި ކަމެކެވެ.